2 Ahọlu lẹ 5:1-27
5 Todin, Naamani he yin awhàngán ahọlu Silia tọn yin omẹ nukundeji de he oklunọ etọn nọ doyẹyigona taun, na gbọn ewọ gblamẹ wẹ Jehovah na awhàngbigba* Silia. Ewọ yin awhànfuntọ huhlọnnọ de mahopọnna dọ pòtọnọ de wẹ.*
2 To mẹgbeyinyan yetọn dopo whenu, Silianu lẹ wle viyọnnu pẹvi de taidi kanlinmọ sọn aigba Islaeli tọn ji bọ e wá lẹzun devizọnwatọ asi Naamani tọn.
3 E sọ dọna klunọ-yọnnu etọn dọmọ: “Eyin oklunọ ṣie sọgan yì yẹwhegán+ he to Samalia lọ dè wẹ! Whenẹnu, ewọ na hẹn pòzọ̀n etọn gbọ.”+
4 Enẹwutu, ewọ* hẹn linlin lọ yì na oklunọ etọn bo dọ nuhe viyọnnu he wá sọn Islaeli lọ ko dọ lẹ na ẹn.
5 Ahọlu Silia tọn sọ dọmọ: “Dedo hadopo! Yẹn nasọ do wekanhlanmẹ de hlan ahọlu Islaeli tọn.” Ewọ sọ dedo bo hẹn talẹnti* fataka tọn ao, ṣekẹli sika tọn 6 000 po awù voovo ao po.
6 E sọ hẹn wekanhlanmẹ lọ wá ahọlu Islaeli tọn dè, ehe dọmọ: “Yẹn do devizọnwatọ ṣie Naamani hlan we po wekanhlanmẹ ehe po, na hiẹ nido hẹn pòzọ̀n etọn gbọ.”
7 Tlolo he ahọlu Islaeli tọn hia wekanhlanmẹ lọ, e tlẹ́n awù etọn lẹ bo dọmọ: “Jiwheyẹwhe wẹ n’ka yin nado hù podọ nado hẹn dogbẹ̀ ya?+ Na ewọ do dawe ehe hlan mi bo dọ dọ yẹn ni hẹn pòzọ̀n etọn gbọ! Mìlọsu sọgan mọdọ aklọ̀n dín wẹ e te to go e.”
8 Ṣigba, whenue Eliṣa omẹ Jiwheyẹwhe nugbo lọ tọn sè dọ ahọlu Islaeli tọn ko tlẹ́n awù etọn lẹ, e dowẹn hlan ahọlu to afọdopolọji dọmọ: “Naegbọn hiẹ do tlẹ́n awù towe lẹ? Jaale, gbọ ewọ ni wá dè e, na e nido yọnẹn dọ yẹwhegán de tin to Islaeli.”+
9 Enẹwutu, Naamani wá po osọ́ etọn lẹ po gọna osọ́-kẹkẹ awhàn tọn etọn lẹ bo ṣite to họntonu ohọ̀ Eliṣa tọn.
10 Ṣigba, Eliṣa do wẹnsagun de hlan nado dọna ẹn dọmọ: “Yì, bo lawu to Jọdani+ mẹ whla ṣinawe,+ agbasa towe nasọ yin hinhẹngọwa bọ hiẹ na yin hinhẹn zun wiwe.”
11 Whenẹnu, Naamani gblehomẹ bo wleali dedo bosọ to didọmọ: “Nuhe n’dọna dee dai wẹ yindọ, ‘Ewọ na tọ́n wá dè e bo na ṣite tofi bo nasọ ylọ oyín Jehovah Jiwheyẹwhe etọn tọn, e nasọ hẹn alọ etọn yigodo yinukọn gbọn pòzọ̀n lọ ji nado hẹn ẹn gbọ.’
12 Be Abana po Falpali po, yèdọ tọ̀sisa Damasku tọn lẹ,+ ma pọnte hú otọ̀ Islaeli tọn lẹpo ya? Be n’ma gán lawu to yé mẹ bo yin hinhẹn zun wiwe wẹ?” E sọ lẹkọ bo dedo po adi po.
13 Todin, devizọnwatọ etọn lẹ dọnsẹpọ ẹ bo dọmọ: “Otọ́ ṣie, eyin onú vonọtaun de wẹ yẹwhegán lọ ko dọna we nado wà dai wẹ, be hiẹ ma na ko wà ẹ ya? Nẹmunẹmu wẹ todin lo, whenue e dọna we poun dọ, ‘Yì lawu bo yin hinhẹn zun wiwe’?”
14 Enẹwutu, ewọ jẹte yì bo whèadin do* Jọdani mẹ whla ṣinawe, kẹdẹdile omẹ Jiwheyẹwhe nugbo lọ tọn ko dọ do.+ Agbasa etọn sọ yin hinhẹngọwa taidi agbasa yọpọ sunnu+ de tọn bọ ewọ yin hinhẹn zun wiwe.+
15 Enẹgodo, e lẹkọyi omẹ Jiwheyẹwhe nugbo lọ tọn dè,+ yèdọ ewọ po mẹhe hodo e lẹpo po,* e sọ ṣite to nukọn etọn bo dọmọ: “N’ko wá yọnẹn todin dọ Jiwheyẹwhe de ma tin to fidevo depope to aigba ji adavo to Islaeli.+ Todin, jaale kẹalọyi nunina* de sọn devizọnwatọ towe si.”
16 Ṣigba, Eliṣa dọmọ: “Dile Jehovah he n’nọ sẹ̀n* lọ togbẹ̀, yẹn ma na kẹalọyi i.”+ Ewọ sọ vẹ̀ ẹ nado kẹalọyi i, amọ́ e gbẹ́ gbidigbidi.
17 To godo mẹ, Naamani dọmọ: “Eyin mọ wẹ, jaale gbọ okọ́ aigba ehe tọn he otlò* awe sọgan hẹn ni yin nina devizọnwatọ towe, na devizọnwatọ towe ma nasọ basi avọ́nunina mimẹ̀ kavi avọ́sinsan de hlan yẹwhe devo depope ba adavo Jehovah.
18 Ṣigba, Jehovah ni jona devizọnwatọ towe na onú dopo ehe: Eyin oklunọ ṣie biọ ohọ̀* Limọni tọn mẹ nado dẹ́ do odò to finẹ, awà ṣie go wẹ e nọ ganjẹ, bọ n’nọ to dandannu glọ nado dẹ́ do odò to ohọ̀ Limọni tọn mẹ. Eyin yẹn dẹ́ do odò to ohọ̀ Limọni tọn mẹ, Jehovah ni jaale bo jo ehe na devizọnwatọ towe.”
19 Ewọ sọ dọna ẹn dọmọ: “Yì to jijọho mẹ.” Whenue e ko yì sọn e dè bo ko zingbejizọnlin jẹ obá de mẹ godo,
20 Gehazi+ he yin devizọnwatọ Eliṣa omẹ Jiwheyẹwhe nugbo lọ tọn+ dọna ede dọmọ: ‘Ogán ṣie ko jo Naamani Silianu+ ehe do bo ma kẹalọyi nuhe e hẹnwa lẹ. Dile Jehovah togbẹ̀, n’na dowezun jẹgodo na ẹn bo na yí nude sọn e si.’
21 Enẹwutu, Gehazi dómọna Naamani. Whenue Naamani mọdọ mẹde to wezundo ja to godo na ẹn, e jẹte sọn osọ́-kẹkẹ etọn mẹ nado wá pé e bo dọmọ: “Nude jọ wẹ ya?”
22 Ewọ sọ gblọn dọmọ: “Nude ma jọ. Ogán ṣie wẹ do mi hlan bo dọmọ, ‘Pọ́n! Din tlolo wẹ dẹpẹ awe delẹ sọn visunnu yẹwhegán lẹ tọn lẹ mẹ wá dè e sọn lẹdo osó tọn Eflaimi tọn mẹ. Jaale, na yé talẹnti fataka tọn dopo po awù awe po.’”+
23 Naamani sọ dọmọ: “Eya, yí talẹnti awe.” E sọ to vivẹ̀ ẹ mapote+ bo blá talẹnti fataka tọn awe do saki awe mẹ gọna awù awe, e sọ bẹ yé na awe to devizọnwatọ etọn lẹ mẹ bọ yé jẹnukọnna ẹn po agbàn lọ lẹ po.
24 Whenue e jẹ Ofẹli,* e bẹ nulọ lẹ sọn alọ yetọn mẹ bo bẹ yé do họmẹ bosọ do sunnu lọ lẹ hlan. To whenue yé ko yì godo,
25 e biọ họmẹ wá bo ṣite to ogán etọn pá. Todin, Eliṣa dọna ẹn dọmọ: “Fie wẹ a wá sọn, Gehazi?” Ṣigba, e dọmọ: “Devizọnwatọ towe ma yì fide.”+
26 Eliṣa sọ dọna ẹn dọmọ: “Be ahun ṣie ma tin to finẹ hẹ we to whenue dawe lọ jẹte sọn osọ́-kẹkẹ etọn mẹ nado wá pé we ya? Be ojlẹ lọ die nado kẹalọyi fataka kavi nado kẹalọyi awù, olivie-gle, vẹngle, lẹngbọ, oyìn, devisunnu kavi deviyọnnu lẹ ya?+
27 Todin, pòzọ̀n Naamani tọn+ na bẹpla hiẹ po kúnkan towe po kakadoi.” To afọdopolọji, ewọ tọ́n sọn nukọn etọn po pòzọ̀n po bo wé di osin-agó.+
Nudọnamẹ Odò Tọn
^ Kavi “whlẹngán.”
^ Kavi “dọ e to azọ̀n agbasa go tọn de jẹ.”
^ Vlavo, ehe na ko to alọdlẹndo Naamani.
^ Kavi “ylọn ede do.”
^ To paa mẹ, “dona.”
^ To paa mẹ, “ewọ po osla lọ pete po.”
^ To paa mẹ, “mẹhe nukọn yẹn ṣite te.”
^ Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
^ Kavi “tẹmpli.”
^ Lẹdo de to Samalia, vlavo okọ́ta de kavi figángán de.
