2 Kọlintinu lẹ 10:1-18
-
Paulu yiavùnlọna lizọnyizọn etọn (1-18)
-
Adánwanu mítọn lẹ ma yin agbasalan tọn lẹ (4, 5)
-
10 Todin, yẹnlọsu Paulu yí walọmimiọn po homẹdagbe Klisti tọn po do vẹ̀ mì,+ dile etlẹ yindọ n’nọ sọawuhia to ṣẹnṣẹn mìtọn di mẹhe yìdo,+ n’nọ yin adọgbotọ de na mì to whenue yẹn ma tin to finẹ.+
2 Yẹn vẹ̀ mì, na to whenue yẹn na wá, yẹn nikaa to dandannu glọ nado yinuwa po adọgbigbo po bo na ze afọdide sinsinyẹn he yẹn ko lẹn lẹ sọta mẹdelẹ he nọ pọ́n mí hlan taidi dọ mí to zọnlinzin to agbasa-liho.
3 Na dile etlẹ yindọ mí nọ zinzọnlin sọgbe hẹ agbasalan, mí ma nọ funawhàn sọgbe hẹ nuhe mí yin to agbasalan mẹ.
4 Na adánwanu awhànfunfun tọn mítọn lẹ ma yin agbasalan tọn lẹ gba,+ ṣigba Jiwheyẹwhe wẹ hẹn yé yin huhlọnnọ+ nado họ́ nuhe hẹnai lẹ liai.
5 Na mí to hoyijlẹdohogo agọ̀ lẹ podọ onú dahodaho lẹpo he yin zizedaga sọta oyọnẹn Jiwheyẹwhe tọn họliai,+ podọ mí to linlẹn lẹpo hẹnwa mẹmẹglọ mẹ nado hẹn yé setonuna Klisti;
6 mí ko sọ wleawufo nado hẹn yasanamẹ wá mẹhe zindonukọn to tolivivẹ mẹ lẹpo ji,+ to whenue mìwlẹ na ko do tonusise mìtọn titi hia to gigọ́ mẹ.
7 Mìwlẹ nọ pọ́n nulẹ hlan sọgbe hẹ awusọhia gbonu tọn yetọn. Eyin mẹdepope kudeji dọ emi yin Klisti tọn, mì gbọ ewọ ni vọ́ nulẹnpọn do nugbo ehe ji: Kẹdẹdile ewọ yin Klisti tọn do, mọ wẹ mílọsu yin do ga.
8 Na eyin yẹn na tlẹ doawagun vude zẹjlẹgo gando aṣẹ he Oklunọ na mí nado jlọ mì dote bọ e ma yin nado zìn mì dai lọ go,+ yẹn ma na yin winyando.
9 Na yẹn ma jlo dọ e ni wá taidi dọ yẹn to tintẹnpọn nado dobuna mì gbọn wekanhlanmẹ ṣie lẹ dali.
10 Na yé nọ dọmọ: “Wekanhlanmẹ etọn lẹ pẹ̀n bo tindo huhlọn, ṣigba tintin tofi ewọ lọsu tọn yin madogánnọ podọ ohó etọn nọ vlẹ.”
11 Mì gbọ omẹ mọnkọtọn ni lẹnnupọn dọ nuhe mí dọ* to wekanhlanmẹ mítọn lẹ mẹ to whenue mí ma tin to finẹ, nudopolọ wẹ mí nasọ wà* to whenue mí na tin to finẹ.+
12 Na mí ma hà nado ze mídelẹ do otẹn dopolọ mẹ po mẹdelẹ po kavi yí mídelẹ jlẹdo mẹdelẹ he nọ pà yedelẹ go.+ Ṣigba, to whenue yé to whẹdana yede sọgbe hẹ nujinọtedo yedetiti tọn lẹ bo to yede yijlẹdo yede go, yé ma tindo nukunnumọjẹnumẹ.+
13 Etomọṣo, mí ma na doawagun zẹ̀ dogbó he yin didena mí lẹ go gba, ṣigba sọgbe hẹ dogbó aigba-denamẹ he Jiwheyẹwhe má na mí lọ tọn, bo dlẹnkanna ẹn, etlẹ yin kakajẹ mì dè.+
14 Na nugbo tọn, mí ma to dogbó aigba-denamẹ mítọn tọn lẹ hẹngblo deji taidi dọ e ma dlẹnkan jẹ mì dè wẹ nkọ, na míwlẹ wẹ yin omẹ tintan he hẹn wẹndagbe Klisti tọn kaka wá mì dè.+
15 Lala, mí ma to awagundo zẹ̀ dogbó he yin didena mí lẹ go to tuklajẹ mẹdevo tọn lẹ mẹ gba, ṣigba mí tindo todido dọ, dile yise mìtọn to jijideji, nuhe mí ko wà na yin hinhẹn jideji, to aigba-denamẹ mítọn ji. Whenẹnu wẹ mí na sudeji dogọ,
16 na mí nido lá wẹndagbe lọ to otò devo lẹ mẹ he zẹ̀ mìtọn go, bọ mí ma nado doawagun to nuhe ko yin wiwadotana to aigba-denamẹ mẹdevo tọn ji mẹ.
17 “Ṣigba, mẹhe to awagundo, gbọ e ni nọ doawagun to Jehovah* mẹ.”+
18 Na e ma yin mẹhe nọ pà ede wẹ nọ yin alọkẹyi gba,+ ṣigba mẹhe Jehovah* pà.+
