2 Kọlintinu lẹ 12:1-21
-
Numimọ Paulu tọn lẹ (1-7a)
-
‘Owùn to agbasalan mẹ’ Paulu tọn lẹ (7b-10)
-
E ma whè hú apọsteli dahodaho lẹ (11-13)
-
Onú Kọlintinu lẹ tọn nọ duahunmẹna Paulu (14-21)
12 Yẹn dona doawagun. E ma doale, ṣigba yẹn na zindonukọn jẹ numimọ jiawu lẹ+ po osọhia Oklunọ tọn lẹ po ji.+
2 Yẹn yọ́n dawe de he to kọndopọ mẹ hẹ Klisti, bọ ewọ yin zize sọyi olọn atọ̀ntọ mẹ to owhe 14 die—vlavo to agbasa mẹ wẹo kavi e ma yin to agbasa mẹ wẹo, yẹn ma yọnẹn; Jiwheyẹwhe wẹ yọnẹn.
3 Mọwẹ, yẹn yọ́n dawe mọnkọtọn de—vlavo to agbasa mẹ kavi e ma yin po agbasa po, yẹn ma yọnẹn; Jiwheyẹwhe wẹ yọnẹn—
4 bọ ewọ yin zize sọyi paladisi mẹ bo sè ohó he ma dona yin didọ lẹ he yè ma na dotẹnmẹ gbẹtọvi depope nado dọ.
5 Dawe mọnkọtọn mẹ wẹ yẹn na doawagun te, ṣigba yẹn ma na doawagun to dee mẹ gba, adavo gando madogán ṣie lẹ go.
6 Na eyin yẹn tlẹ jlo na doawagun, yẹn ma na yin nulunọ, na yẹn na dọ nugbo lọ. Ṣigba, yẹn dapana mọwiwà, na mẹdepope nikaa lẹn mi jẹ hú nuhe e mọ to dè e kavi nuhe e sè sọn dè e,
7 kiki na osọhia sẹhundaga mọnkọtọn lẹ he yẹn mọyi wutu.
Na yẹn nikaa ze dee daga zẹjlẹgo, owùn de yin nina mi to agbasalan mẹ,+ yèdọ angẹli Satani tọn, nado to nuli mi, bọ yẹn ma nado ze dee daga zẹjlẹgo.
8 Whla atọ̀n wẹ yẹn vẹ̀ Oklunọ gando ehe go, na e nido sọgan tọ́n sọn yẹn mẹ.
9 Ṣigba, e dọna mi dọmọ: “Nukundagbe majẹhẹ ṣie ko pé we, na huhlọn ṣie to yinyin hinhẹn zun pipé to madogán towe mẹ.”+ Enẹwutu, yẹn na yí ayajẹ daho do doawagun gando madogán ṣie lẹ go, na huhlọn Klisti tọn nido sọgan gbọṣi ji e taidi gòhọ de.
10 Enẹwutu, homẹ nọ hùn mi to madogán lẹ mẹ, to mẹzunzun lẹ mẹ, to ojlẹ nuhudo tọn lẹ mẹ, to homẹkẹn lẹ po awusinyẹnnamẹnu lẹ po mẹ, na Klisti tọn wutu. Na to whenue yẹn yin madogánnọ, whenẹnu wẹ yẹn yin huhlọnnọ.+
11 Yẹn ko lẹzun nulunọ. Mìwlẹ wẹ hẹn mi nado yinmọ, na mìwlẹ dona ko pà mi. Na yẹn ma do dee hia whè hú apọsteli dahodaho mìtọn lẹ to onú dopo tata mẹ, eyin yẹn ma tlẹ yin nude.+
12 Na nugbo tọn, ohia apọsteli-yinyin tọn lẹ yin didohia to ṣẹnṣẹn mìtọn gbọn akọndonanu tlala dali,+ podọ gbọn ohia lẹ po nujiawu* lẹ po gọna azọ́n huhlọnnọ lẹ dali.+
13 Na aliho tẹ mẹ wẹ mìwlẹ ma mọ nukundagbe sọ agun he pò lẹ te, eyin e ma yindọ na yẹn ma lẹzun agbàn pinpẹn de na mì poun wutu wẹ?+ Mì jo oylan ehe na mi sọn ojlo mẹ wá.
14 Mì pọ́n! Whla atọ̀ntọ die he yẹn wleawufo nado wá mì dè, podọ yẹn ma na lẹzun agbàn pinpẹn de. Na yẹn ma to nutindo mìtọn lẹ dín gba,+ adavo mìlọsu lẹ; na e ma yin ovi lẹ+ wẹ dona bẹ nulẹ pli na mẹjitọ yetọn lẹ gba, ṣigba mẹjitọ lẹ na ovi lẹ.
15 Na yẹn tọn, yẹn na yí ayajẹ do yí dee zan bo na yí dee zan to gigọ́ mẹ na mì.*+ Eyin yẹn yiwanna mì sisosiso sọmọ, be e ma jẹ dọ mìlọsu lẹ ni yiwanna mi domọ ya?
16 Ṣigba, depope he e sọgan yin, yẹn ma doagban pinpẹn de na mì.+ Etomọṣo, mìwlẹ dọ dọ, yẹn yin “ayiha wintinwintinnọ” podọ “ayiha gigẹdẹ” wẹ yẹn yí do wle mì.
17 Yẹn ma hò mì dù gbọn mẹhe yẹn dohlan mì lẹ depope gblamẹ, kavi yẹn wàmọ wẹ?
18 Yẹn dotuhomẹna Titu podọ yẹn do mẹmẹsunnu lọ hlan po e po. Titu ma hò mì dù paali, kavi e wàmọ wẹ?+ Gbigbọ dopolọ mẹ wẹ mí zinzọnlin te, kavi e ma yin mọ wẹ? To afọdòmẹ dopolọ lẹ mẹ, kavi e ma yin mọ wẹ?
19 Be linlẹn wẹ mìwlẹ te sọn tẹgbẹ dọ avùnlọyina mídelẹ wẹ mí te to nukọn mìtọn ya? Jiwheyẹwhe nukọn wẹ mí to hodọ te to kọndopọ mẹ hẹ Klisti. Ṣigba, mẹyiwanna lẹ emi, yanwle nuhe wà mí te lẹpo tọn wẹ nado jlọ mì dote.
20 Na obu to dìdì mi dọ to aliho de mẹ, to whenue yẹn na wá, yẹn sọgan nọma mọ mì dile yẹn na ko jlo do podọ yẹn sọgan nọma sọawuhia dile mìwlẹ na ko jlo do, ṣigba kakatimọ, avùn, awuwhàn, adánjijẹ whẹwhẹ, wiwọ́, ajàndido, mẹnudidọ, mẹdelẹ he nọ gbọn kikla dali yigo, podọ bẹwlu sọgan ko tin to ṣẹnṣẹn mìtọn.
21 Vlavo, eyin yẹn lẹkọwa, Jiwheyẹwhe ṣie sọgan whiwhẹ mi to nukọn mìtọn, bọ yẹn sọgan to dandannu glọ nado nọ aluẹmẹ, na susu mẹhe ko waylando wayi bo ma ko lẹnvọjọ sọn mawé, fẹnnuwiwa zanhẹmẹ tọn* po walọ gblezọn tasinsinyẹn tọn* yetọn lẹ po mẹ wutu.
