2 Otànnugbo lẹ 21:1-20
21 Enẹgodo, Jehoṣafati yin hinhẹn nado mlọnai hẹ tọgbo etọn lẹ bo yin dìdì dopọ hẹ tọgbo etọn lẹ do Tòdaho Davidi tọn mẹ; visunnu etọn Jeholami sọ lẹzun ahọlu do otẹn etọn mẹ.+
2 Nọvisunnu etọn lẹ, yèdọ visunnu Jehoṣafati tọn lẹ wẹ Azalia, Jehiẹli, Zekalia, Azalia, Mikaẹli po Ṣefatia po; omẹ ehe lẹpo wẹ yin visunnu Ahọlu Jehoṣafati Islaeli tọn.
3 Otọ́ yetọn ko sọ na yé nunina fataka po sika po tọn susu, gọna nuhọakuẹ lẹ po tòdaho gángán lẹ po to Juda;+ ṣigba e ze ahọluduta lọ jo na Jeholami,+ na ewọ wẹ plọnji lọ.
4 Whenue Jeholami jẹ gandu ji do ahọluduta otọ́ etọn tọn ji, e hẹn otẹn etọn lodo gbọn ohí yíyí do hù nọvisunnu etọn lẹpo+ po ahọvi Islaeli tọn delẹ po dali.
5 Owhe 32 wẹ Jeholami tindo to whenue e duahọlu, e sọ dugán to Jelusalẹm na owhe ṣinatọ̀n.+
6 E zinzọnlin gbọn aliho ahọlu Islaeli tọn lẹ tọn ji,+ kẹdẹdile mẹhe wá sọn whédo Ahabi tọn mẹ lẹ ko wà do, na viyọnnu Ahabi tọn wẹ yin asi etọn;+ e sọ to nuhe ylan to nukun Jehovah tọn mẹ lẹ wà mapote.
7 Ṣigba, Jehovah ma jlo na hù whédo Davidi tọn sudo, na alẹnu he e ko basi hẹ Davidi wutu,+ na e ko dopagbe nado na miyọ́ngbán de ewọ po visunnu etọn lẹ po kakadoi.+
8 To azán etọn lẹ gbè, Edomi fọngu do Juda ji+ bo wá do ahọlu etọn titi ai to godo mẹ.+
9 Enẹwutu, Jeholami po awhàngán daho etọn lẹ po gọna osọ́-kẹkẹ etọn lẹpo dasá yì nado tọ́nawhàn yé, e sọ fọ́n to zánmẹ bo gbawhàn Edominu he lẹdo e pé lẹ tọn gọna awhàngán daho osọ́-kẹkẹ lẹ tọn lẹ.
10 Ṣigba, Edomi gbẹ́ zindonukọn to gufinfọn etọn sọta Juda mẹ kakajẹ egbé. Libna+ lọsu sọ fọngu do e ji to ojlẹ enẹ mẹ, na e ko gbẹkọ Jehovah Jiwheyẹwhe tọgbo etọn lẹ tọn go wutu.+
11 Humọ, e gbá ofi yiaga+ lẹ do osó Juda tọn lẹ ji nado hẹn mẹhe nọ nọ̀ Jelusalẹm lẹ lọga to gbigbọ-liho, e sọ hẹn Juda buali.
12 To nukọn mẹ, owẹ̀n he Elija+ yẹwhegán lọ kàn de wá e dè dọmọ: “Nuhe Jehovah Jiwheyẹwhe Davidi tọgbo towe tọn dọ die, ‘Hiẹ ma zinzọnlin gbọn aliho Jehoṣafati+ otọ́ towe tọn lẹ ji kavi to aliho Ahọlu Asa+ Juda tọn tọn lẹ ji.
13 Ṣigba, hiẹ nọ zinzọnlin gbọn aliho ahọlu Islaeli+ tọn lẹ tọn ji bo nọ hẹn Juda po mẹhe nọ nọ̀ Jelusalẹm lẹ po nado lọga to gbigbọ-liho+ kẹdẹdi galilọ whédo Ahabi tọn,+ hiẹ tlẹ sọ hù nọvisunnu towe titi lẹ,+ yèdọ whédo otọ́ towe tọn, mẹhe pọnte hugan we lẹ.
14 Enẹwutu, Jehovah na hẹn nugbajẹmẹji daho wá omẹ towe lẹ, visunnu towe lẹ, asi towe lẹ po nutindo towe lẹpo po ji.
15 Hiẹ na nọ jẹazọ̀n mapote, etlẹ yin azọ̀n adọ̀vi tọn, kaka bọ adọ̀vi towe lẹ na tọ́njẹgbonu na azọ̀n lọ wutu, yèdọ egbesọegbesọ.’”
16 To whenẹnu, Jehovah fọ́n+ Filistinu+ lẹ* po Alabianu+ he to Etiopianu lẹ pá lẹ po do Jeholami ji.
17 Yé sọ tọ́nawhàn Juda bo dín ali biọ e mẹ gánnugánnu bosọ bẹ nutindo he to owhé* ahọlu tọn gbè lẹpo sọyi,+ gọna visunnu etọn lẹ po asi etọn lẹ po; visunnu dopo gee he yin pipò dai na ẹn wẹ Jehoahazi,*+ yèdọ visunnu etọn pẹvi pete.
18 To ehe lẹpo godo, Jehovah sọ yí azọ̀n jẹmagbọ adọ̀vi tọn de do sayana ẹn.+
19 To nukọn mẹ, yèdọ to whenue owhe awe pipé ko juwayi, adọ̀vi etọn lẹ tọ́njẹgbonu na azọ̀n etọn wutu, bọ e wá kú to awufiẹsa sinsinyẹn azọ̀n etọn tọn mẹ; omẹ etọn lẹ masọ hẹn miyọ́n nado ji do ota etọn mẹ kẹdẹdile miyọ́n ko yin hinhẹn nado ji do ota tọgbo etọn lẹ tọn mẹ do.+
20 Owhe 32 wẹ e tindo to whenue e duahọlu, e sọ dugán to Jelusalẹm na owhe ṣinatọ̀n. Okú etọn ma vẹna mẹdepope. Enẹwutu, yé dì i do Tòdaho Davidi tọn+ mẹ, amọ́ e ma yin do yọdò ahọlu lẹ tọn mẹ.+
Nudọnamẹ Odò Tọn
^ To paa mẹ, “gbigbọ Filistinu lẹ tọn.”
^ Kavi “họ̀nmẹ.”
^ Sọ nọ yin yiylọdọ Ahazia.
