2 Otànnugbo lẹ 22:1-12
22 Mẹhe nọ nọ̀ Jelusalẹm lẹ sọ yí Ahazia he yin visunnu pẹvi pete etọn do doahọlu do otẹn etọn mẹ, na jaguda-gbẹ́ he wá osla lọ mẹ po Alabianu lẹ po ko hù visunnu mẹho lọ lẹpo wutu.+ Enẹwutu, Ahazia visunnu Jeholami tọn jẹ gandu ji taidi ahọlu Juda tọn.+
2 Owhe 22 wẹ Ahazia tindo to whenue e duahọlu, e sọ dugán to Jelusalẹm na owhe dopo. Oyín onọ̀ etọn tọn wẹ Atalia,+ yèdọ ovivi* Omli+ tọn.
3 Ewọ lọsu zinzọnlin gbọn aliho whédo Ahabi tọn+ ji, na onọ̀ etọn wẹ lẹzun ayinamẹtọ etọn to nuylankan wiwà mẹ.
4 E sọ to nuhe ylan to nukun Jehovah tọn mẹ lẹ wà mapote, kẹdẹdi whédo Ahabi tọn, na yé lẹzun ayinamẹtọ etọn lẹ na vasudo etọn, to okú otọ́ etọn tọn godo.
5 E hodo ayinamẹ yetọn bo zọnhẹ Jeholami visunnu Ahọlu Ahabi Islaeli tọn nado yì funawhàn hẹ Ahọlu Hazaẹli+ Silia tọn to Lamọti-giliadi,+ fie ogádetọ lẹ gbleawuna Jeholami te.
6 Podọ e lẹkọwa Jezleẹli+ nado jẹgangan sọn awugble etọn lẹ mẹ, yèdọ apà he yé ko do e go to Lama to whenue e hoavùn hẹ Ahọlu Hazaẹli Silia tọn.+
Ahazia* visunnu Jeholami+ ahọlu Juda tọn sọ jẹte yì Jezleẹli nado yì pọ́n Jeholami+ visunnu Ahabi tọn, na ewọ ko yin awugblena* wutu.+
7 Ṣigba, Jiwheyẹwhe hẹn aijijẹ Ahazia tọn wá to whenue e yì Jeholami dè; podọ to whenue e wá, ewọ po Jeholami po tọ́nyi nado yì pé Jehu+ ovivi* Nimṣi tọn, mẹhe Jehovah ko yiamisisadode nado de* whédo Ahabi tọn sẹ̀ sọn aimẹ.+
8 Whenue Jehu jẹ whẹdida hẹnṣẹ ji do whédo Ahabi tọn ji, e mọ ahọvi Juda tọn lẹ po nọvisunnu Ahazia tọn lẹ sin visunnu lẹ po, yèdọ lizọnyizọnwatọ Ahazia tọn lẹ bo hù yé.+
9 Enẹgodo, e dín Ahazia mọ; yé wle e to fie e whlá ede do to Samalia bo hẹn ẹn wá Jehu dè. Yé sọ hù i bo dì i,+ na yé dọmọ: “Ovivi Jehoṣafati he yí ahun etọn lẹpo do dín Jehovah tọn wẹ ewọ.”+ Mẹdepope ma pò to whédo Ahazia tọn mẹ he tindo nugopipe nado deanana ahọluduta lọ.
10 Whenue Atalia+ he yin onọ̀ Ahazia tọn mọdọ visunnu etọn ko kú, e fọ́n bo và kúnkan ahọlu tọn Juda tọn+ pete* sudo.
11 Ṣigba, Jehoṣabeati viyọnnu ahọlu tọn ze Jehoaṣi+ visunnu Ahazia tọn bo fìn in sọn visunnu ahọlu tọn he dona yin hùhù lẹ mẹ bosọ ze ewọ po nukunpedomẹgotọ etọn po whlá do abò homẹ tọn de mẹ. Jehoṣabeati viyọnnu Ahọlu Jeholami+ tọn (he yin asi Jehoiada+ yẹwhenọ lọ tọn podọ nọviyọnnu Ahazia tọn) tẹnpọn bo ze e whlá do Atalia, bọ ewọ ma hù i.+
12 Visunnu lọ gbọṣi yé dè na owhe ṣidopo bo yin whiwhla do ohọ̀ Jiwheyẹwhe nugbo lọ tọn mẹ dile Atalia to gandu do aigba lọ ji.
Nudọnamẹ Odò Tọn
^ To paa mẹ, “viyọnnu.”
^ Kavi “ewọ to azọ̀njẹ.”
^ To alọnuwe hoho Heblugbe tọn delẹ mẹ, “Azalia.”
^ To paa mẹ, “visunnu.”
^ To paa mẹ, “sán.”
^ To paa mẹ, “và okún ahọluduta tọn Juda tọn lẹpo.”
