2 Otànnugbo lẹ 3:1-17
3 Sọlomọni sọ jẹ ohọ̀ Jehovah tọn+ gbá ji to Jelusalẹm to Osó Molia+ ji, fie Jehovah ko sọawuhia Davidi otọ́ etọn+ te, yèdọ to nọtẹn he Davidi ko wleawudaina lọ to likun-flétẹn Olnani+ Jẹbusinu lọ tọn.
2 E bẹ họ̀gbigbá lọ jẹeji to azán awetọ gbè to osun awetọ mẹ, to owhe ẹnẹtọ gandudu etọn tọn mẹ.
3 Dodonu he Sọlomọni doai nado gbá ohọ̀ Jiwheyẹwhe nugbo lọ tọn do e ji dite na awagbà 60 bo gblo na awagbà 20,+ sọgbe hẹ aliho nujijlẹ tọn hoho lọ.*
4 Atọ̀họ̀ he to nukọn lọ dite na awagbà 20, sọgbe hẹ gbigblo ohọ̀ lọ tọn* bọ jiyiyi etọn yin awagbà 20;* ewọ sọ và sika akú na ẹn to homẹ.+
5 E sọ tùn owhlẹ junipeli tọn lẹ dote do ohọ̀ daho lọ go, bo và sika dagbedagbe na ẹn,+ enẹgodo e yí yẹdide odétin+ po gẹdẹ+ po tọn lẹ do doaṣọ́na ẹn.
6 Humọ, e tẹ́ zannu akuẹgegenu tọn whanpẹnọ lẹ+ do ohọ̀ lọ go; sika+ he wá sọn Palivaimi wẹ e yizan.
7 E sọ và sika na ohọ̀ lọ, ozà-tin lẹ, họntonu lẹ, adó etọn lẹ po ohọ̀n etọn lẹ po;+ podọ e de yẹdide kelubimi lẹ tọn do adó lọ lẹ go.+
8 E sọ gbá abò* Fiwiwe Gbaugbau tọn lọ;+ tedidi etọn sọzẹn hẹ gbigblo ohọ̀ lọ tọn, yèdọ awagbà 20, podọ gbigblo etọn yin awagbà 20. E sọ và sika dagbedagbe+ talẹnti* 600 na ẹn.
9 Sika he yin yiyizan na oṣó lẹ pẹnzin sọ ṣekẹli* 50; e sọ và sika na abò aga tọn lẹ.
10 Enẹgodo, e basi ojlẹmọ kelubimi tọn awe do abò* Fiwiwe Gbaugbau tọn lọ mẹ bo và sika na yé.+
11 Tedidi awà kelubimi lọ lẹ tọn+ lẹ tọn pete yin awagbà 20; awà kelubimi tintan tọn dopo dite na awagbà atọ́n bo sọ́ adó ohọ̀ lọ tọn, bọ awà etọn awetọ dite na awagbà atọ́n bo sọ́ dopo to awà kelubimi awetọ tọn lẹ mẹ.
12 Podọ awà kelubimi awetọ tọn dopo dite na awagbà atọ́n bo sọ́ adó ohọ̀ lọ tọn he to awà awetọ ji, bọ awà etọn awetọ dite na awagbà atọ́n bo sọ́ dopo to awà kelubimi tintan tọn lẹ mẹ.
13 Kikẹ̀ awà kelubimi ehelẹ tọn yin awagbà 20; yé sọ ṣite to afọ yetọn lẹ ji bo pannukọn homẹ ohọ̀ lọ tọn.*
14 E sọ yí sekan juju, sekan sopẹ́-sinmẹnọ, ahóvọ̀ po avọ̀ dagbedagbe po do basi họmẹgbòvọ̀+ lọ bo de yẹdide kelubimi lẹ tọn do e mẹ.+
15 Enẹgodo, e tùn dòtin gànvẹẹ tọn awe+ do ohọ̀ lọ nukọn bọ yé dite na awagbà 35, podọ ota dòtin tọn he to dòtin dopodopo ji aga yiji na awagbà atọ́n.+
16 E wleawuna gẹdẹ he taidi kọnú lẹ bo bẹ yé do aga dòtin lọ lẹ tọn, e sọ basi pomeglanate* 100 bo to yé do gẹdẹ lọ lẹ go.
17 E tùn dòtin lọ lẹ do tẹmpli lọ nukọn, yèdọ dopo to adusiwhé* podọ awetọ to amiyọnwhé;* e sọ ylọ oyín dehe to adusiwhé lọ tọn dọ Jakini* podọ dehe to amiyọnwhé lọ tọn dọ Boazi.*
Nudọnamẹ Odò Tọn
^ To paa mẹ, awagbà dopo nọ sọzẹn hẹ cm 44,5, ṣigba mẹdelẹ lẹndọ “aliho nujijlẹ tọn hoho lọ” dlẹnalọdo awagbà gaa he sọzẹn hẹ cm 51,8. Pọ́n Nud. B14.
^ Alọnuwe hohowhenu tọn delẹ dọ “120,” to whenue alọnuwe devo lẹ po lẹdogbedevomẹ delẹ po dọ “awagbà 20.”
^ Kavi “awagbà 20 na gbigblo ohọ̀ lọ tọn.”
^ To paa mẹ, “ohọ̀.”
^ To paa mẹ, “ohọ̀.”
^ Enẹ wẹ, pànta Fiwiwe lọ.
^ Kavi “hùwaji.”
^ Kavi “agewaji.”
^ Zẹẹmẹdo “Na Ewọ [enẹ wẹ, Jehovah] Ni Hẹn Lodo Gligli.”
^ Vlavo zẹẹmẹdo “To Huhlọn Mẹ.”
