2 Samuẹli 10:1-19
-
Amọni po Silia po ṣíawhàn (1-19)
10 To godo mẹ, ahọlu Amọninu+ lẹ tọn kú, bọ visunnu etọn Hanuni lẹzun ahọlu do otẹn etọn mẹ.+
2 Whenẹnu, Davidi dọmọ: “N’na do owanyi nugbo hia Hanuni visunnu Nahaṣi tọn dile otọ́ etọn ko do owanyi nugbo hia mi do.” Enẹwutu, Davidi do devizọnwatọ etọn lẹ hlan nado yì miọnhomẹna ẹn, na otọ́ etọn he kú wutu. Ṣigba, whenue devizọnwatọ Davidi tọn lẹ wá aigba Amọninu lẹ tọn ji,
3 ahọvi Amọninu lẹ tọn lẹ dọna Hanuni oklunọ yetọn dọmọ: “A lẹndọ yẹyidogona otọ́ towe wẹ Davidi te gbọn homẹmiọnnamẹtọ lẹ didohlan we dali wẹ ya? Be e ma yin nado dindona tòdaho lọ bo bẹ̀ ẹ pọ́n bosọ và ẹ sudo wutu wẹ Davidi do dó devizọnwatọ etọn lẹ hlan we ya?”
4 Enẹwutu, Hanuni wle devizọnwatọ Davidi tọn lẹ bo whlẹ́ ogbì yetọn lẹ jẹ odaa+ bosọ sán awù yetọn lẹ do alinkàn bo do yé hlan.
5 To whenue ehe yin didọna Davidi, e do sunnu lẹ hlan to afọdopolọji nado yì pé yé, na yé ko yin winyando tlala wutu; ahọlu sọ dọna yé dọmọ: “Mì gbọṣi Jẹliko+ kaka ogbì mìtọn lẹ nado vọ́ wú, enẹgodo mì na lẹkọwa.”
6 To nukọn mẹ, Amọninu lẹ mọdọ emi ko lẹzun awuhiọnu de na Davidi, enẹwutu Amọninu lẹ domẹhlan nado dà Silianu he to Bẹti-lehobi+ lẹ po Silianu he to Zoba+ lẹ po do awhàn mẹ, yèdọ awhànfuntọ he nọ zọ̀n afọ 20 000; podọ ahọlu Maaka+ tọn po sunnu 1 000 po; podọ sunnu 12 000 sọn Iṣtobi.*+
7 Whenue Davidi sè ehe, e do Joabi po awhànpa lọ pete po hlan, gọna awhànfuntọ huhlọnnọ etọn lẹ.+
8 Amọninu lẹ sọ tọ́njẹgbonu bo to yede kannukannu di awhànfuntọ do họngbo tòdaho lọ tọn ji, bọ Silianu he wá sọn Zoba po Lehobi po gọna Iṣtobi* po Maaka po lẹ tin to ovò to danji.
9 Whenue Joabi mọdọ awhàn lọ jlo na gbà emi sọn nukọn po godo po, e de delẹ sọn awhànfuntọ dagbe hugan Islaeli tọn lẹ mẹ bo to yé kannukannu nado yì pehẹ Silianu lẹ.+
10 E de sunnu he pò lẹ do anademẹ* Abiṣai nọvisunnu etọn tọn glọ,+ na ewọ nido to yé kannukannu nado yì pehẹ Amọninu lẹ.+
11 Enẹgodo, e dọmọ: “Eyin huhlọn Silianu lẹ tọn hugan mi, whenẹnu hiẹ na wá gọalọna mi; amọ́ eyin huhlọn Amọninu lẹ tọn hugan we, be yẹn wẹ na wá gọalọna we.
12 Mí dona yin huhlọnnọ bo yin adọgbotọ+ do omẹ mítọn lẹ tamẹ podọ do tòdaho Jiwheyẹwhe mítọn tọn lẹ tamẹ, Jehovah nasọ wà nuhe yọ́n to nukun etọn mẹ.”+
13 To whenẹnu, Joabi po sunnu etọn lẹ po tọ́n pé Silianu lẹ nado funawhàn hẹ yé, bọ yé họnyi sọn nukọn etọn.+
14 Whenue Amọninu lẹ mọdọ Silianu lẹ ko họnyi, yelọsu họnyi sọn Abiṣai nukọn bo biọ tòdaho lọ mẹ. Enẹgodo, Joabi lẹkọ sọn Amọninu lẹ godo bo wá Jelusalẹm.
15 Whenue Silianu lẹ mọdọ Islaeli ko gbawhàn yetọn, yé vọ́ yedelẹ bẹpli.+
16 Hadadezẹli+ sọ domẹhlan Silianu he to agbegbe Tọ̀sisa* lọ+ tọn ji lẹ, bọ yé wá Helami to anademẹ Ṣobaki ogán awhànpa Hadadezẹli tọn glọ.
17 Whenue linlin lọ yin nina Davidi, e bẹ Islaeli pete pli to afọdopolọji bo dasá Jọdani bosọ wá Helami. Silianu lẹ sọ to yede kannukannu nado yì pé Davidi bo hoavùn hẹ ẹ.+
18 Ṣigba, Silianu lẹ họnyi sọn Islaeli nukọn; Davidi sọ hù osọ́-kẹkẹ kùntọ 700 po osọ́nọ 40 000 po sọn Silianu lẹ mẹ, e sọ hù Ṣobaki ogán awhànpa yetọn tọn bọ e kú do finẹ.+
19 Whenue ahọlu lọ lẹpo, devizọnwatọ Hadadezẹli tọn lẹ mọdọ Islaeli ko gbawhàn yetọn, yé yawu basi alẹnu jijọho tọn hẹ Islaeli bo lẹzun mẹmẹglọ na yé;+ bẹsọn whenẹnu, Silianu lẹ nọ dibu nado gọalọna Amọninu lẹ.
Nudọnamẹ Odò Tọn
^ Kavi “sọn sunnu Tobi tọn lẹ mẹ.”
^ Kavi “sunnu Tobi tọn lẹ.”
^ To paa mẹ, “do alọmẹ na.”
^ Enẹ wẹ, Euflate.
