2 Samuẹli 13:1-39
13 Todin, visunnu Davidi tọn Absalọmi tindo nọviyọnnu whanpẹnọ de he nọ yin Tamali,+ Amnọni+ visunnu Davidi tọn sọ yiwanna ẹn.
2 Ehe to tuklado Amnọni sọmọ bọ ewọ bẹ azọ̀n, na Tamali nọviyọnnu etọn wutu, na viyọnnu lọ to alọji bọ e taidi nuhe ma yọnbasi na Amnọni nado wà nudepope hẹ ẹ.
3 Todin, Amnọni tindo họntọn de he nọ yin Jehonadabi,+ yèdọ visunnu Ṣimẹa,+ he yin nọvisunnu Davidi tọn; Jehonadabi yin sunnu bibitọ de.
4 Enẹwutu, e dọna ẹn dọmọ: “Naegbọn hiẹ he yin visunnu ahọlu tọn do nọ blawu sọmọ to afọnnu lẹpo? Naegbọn a ma nado dọ ẹ na mi?” Amnọni sọ gblọnna ẹn dọmọ: “N’yiwanna Tamali, nọviyọnnu+ Absalọmi nọvisunnu ṣie tọn wẹ be.”
5 Jehonadabi gblọnna ẹn dọmọ: “Mlọnai to adọzan towe ji bo basi di mẹhe to azọ̀njẹ. Eyin otọ́ towe wá pọ́n we, dọna ẹn dọ, ‘Jaale, dike nọviyọnnu ṣie Tamali ni wá dè e bo wá dà núdùdù na mi. Eyin ewọ wá dà núdùdù awutunọ tọn* to nukun ṣie mẹ, yẹn na dù i to alọ etọn mẹ.’”
6 Enẹwutu, Amnọni mlọnai bo basi di mẹhe to azọ̀njẹ, bọ ahọlu wá nado pọ́n ẹn. Whenẹnu, Amnọni dọna ahọlu dọmọ: “Jaale, dike Tamali nọviyọnnu ṣie ni wá dè e bo wá basi akla hìhì* awe na mi to nukun ṣie mẹ, na yẹn nido dù i to alọ etọn mẹ.”
7 Davidi sọ dowẹn hlan Tamali to whégbè dọmọ: “Jaale, yì owhé nọvisunnu towe Amnọni tọn gbè bo dà núdùdù* na ẹn.”
8 Tamali sọ yì owhé nọvisunnu etọn Amnọni tọn gbè, fihe e to aimimlọn te. Ewọ sọ yí linfin bo yàn ẹn bosọ yí i do basi akla hìhì lẹ to nukun etọn mẹ.
9 Enẹgodo, e yí nudà-panu lọ bo ze akla hìhì lọ lẹ donukọnna ẹn. Ṣigba, Amnọni gbẹ́ nado dù bo dọmọ: “Mì dọna mẹlẹpo nado tọ́n sọn dè e!” Enẹwutu, mẹlẹpo tọ́n sọn e dè.
10 Todin, Amnọni dọna Tamali dọmọ: “Ze núdùdù* lọ wá abò mẹ, na yẹn nido dù i to alọ towe mẹ.” Whenẹnu, Tamali bẹ akla hìhì* he e ko basi lọ lẹ bo hẹn yé wá nọvisunnu etọn Amnọni dè to abò mẹ.
11 To whenue e hẹn yé wá nọvisunnu etọn dè na e nido dù, ewọ tẹdo e go bo dọmọ: “Wá mlọnai hẹ mi, nọviyọnnu ṣie.”
12 Ṣigba, Tamali dọna ẹn dọmọ: “Lala, nọvisunnu ṣie! A dowinyan mi blo, na onú mọnkọtọn ma nọ jọ to Islaeli.+ A wà winyannu ehe blo.+
13 Fitẹ n’na gbọn po winyan ehe po? Podọ hiẹ lọsu na nọ yin pinpọnhlan di dopo to sunnu he zan walọ he huwinyan lẹ mẹ to Islaeli. Todin, jaale yì dọho hẹ ahọlu, na ewọ ma na gbẹ́ nado jo mi na we.”
14 Ṣigba, e gbẹ́ nado dotoaina nọviyọnnu etọn, huhlọn etọn sọ hugan nọviyọnnu etọn tọn bọ e zanhẹ ẹ gánnugánnu bo dowinyan ẹn.
15 Enẹgodo, Amnọni jẹ wangbẹna nọviyọnnu etọn ji sinsinyẹn, sọmọ bọ wangbẹna etọn na nọviyọnnu etọn wá sinyẹn taun hú owanyi he e tindo na ẹn dai. Amnọni sọ dọna ẹn dọmọ: “Fọ́n; e yá, tọ́n dedo!”
16 Amọ́, Tamali dọna ẹn dọmọ: “Lala, nọvisunnu ṣie, nado yàn mi tọ́n todin sọ ylanhu nuhe a ko wà na mi!” Ṣigba, Amnọni gbẹ́ nado dotoaina ẹn.
17 Enẹwutu, Amnọni ylọ jọja devizọnwatọ etọn bo dọna ẹn dọmọ: “Jaale bo de omẹ ehe sẹ̀ sọn nukọn ṣie bosọ suhọ̀n do e do gbonu.”
18 (Nalete, tewu vonọtaun* de wẹ Tamali do, na awù mọnkọtọn lẹ wẹ viyọnnu alọji ahọlu tọn lẹ nọ do.) Devizọnwatọ lọ sọ plan ẹn tọ́njẹgbonu, bo suhọ̀n do e do gbonu.
19 Whenẹnu, Tamali ba afín do ota+ bo tlẹ́n tewu whanpẹnọ he e do; e sọ bẹ alọ plá ota bo dedo bosọ to avivi dile e to yìyì.
20 Enẹwutu, nọvisunnu etọn Absalọmi+ kanse e dọmọ: “Nọvisunnu towe Amnọni wẹ wà ehe na we ya? Todin, nabọẹ nọviyọnnu ṣie. Nọvisunnu towe wẹ ewọ.+ A ze ayiha towe do ehe ji blo.” Enẹgodo, Tamali nọ nọ̀ edeṣo to owhé Absalọmi nọvisunnu etọn tọn gbè.
21 Whenue Ahọlu Davidi sè onú ehe lẹpo, homẹgble e sinsinyẹn.+ Ṣigba, e ma jlo na hẹn homẹgble visunnu etọn Amnọni, na ewọ wẹ yin plọnji etọn bọ e yiwanna ẹn wutu.
22 Absalọmi masọ dọ nudepope na Amnọni, vlavo dagbe kavi oylan; na Absalọmi gbẹwanna+ Amnọni, na e ko dowinyan nọviyọnnu etọn Tamali wutu.+
23 To owhe awe pipé godo, mẹhe nọ pà ofún na lẹngbọ Absalọmi tọn lẹ tin to Baali-hazọli, sẹpọ Eflaimi,+ Absalọmi sọ basi oylọna visunnu ahọlu tọn lẹpo.+
24 Absalọmi sọ wá ahọlu dè bo dọmọ: “Yè to ofún pà na lẹngbọ devizọnwatọ towe tọn lẹ. Ahọlu po devizọnwatọ etọn lẹ po ni jaale bo hodo mi yì.”
25 Ṣigba, ahọlu dọna Absalọmi dọmọ: “Lala, visunnu ṣie. Eyin mímẹpo yì, mí na lẹzun agbàn pinpẹn de na we.” Dile ewọ tlẹ to vivẹ̀ ẹ mapote, ahọlu ma yigbe nado yì, amọ́ e dona ẹn.
26 Whenẹnu, Absalọmi dọmọ: “Eyin hiẹ ma gán yì, jaale dike nọvisunnu ṣie Amnọni ni hodo mi yì.”+ Ahọlu sọ gblọnna ẹn dọmọ: “Naegbọn ewọ nado hodo we yì?”
27 Ṣigba, Absalọmi vẹ̀ ẹ, sọmọ bọ e do Amnọni po visunnu ahọlu tọn lẹpo po hlan nado yì hẹ ẹ.
28 Absalọmi sọ degbena devizọnwatọ etọn lẹ dọmọ: “Mì to aṣeji, bọ whenue ahun Amnọni tọn na ko gọ́ na ayajẹ na ovẹn wutu, n’na dọna mì dọ, ‘Mì hù Amnọni!’ Whenẹnu, mìwlẹ dona hù i. Mì dibu blo. E ma yin yẹn wẹ degbena mì ya? Mì yin huhlọnnọ bo yin adọgbotọ.”
29 Enẹwutu, devizọnwatọ Absalọmi tọn lẹ wà na Amnọni pẹpẹ dile Absalọmi ko degbena yé do; whenẹnu visunnu ahọlu tọn he pò lẹpo fọ́n bọ dopodopo yetọn hẹ otlò* yetọn ji bo họnyi.
30 Dile yé gbẹ́ to aliji, linlin jẹ Davidi dè dọmọ: “Absalọmi ko hù visunnu ahọlu tọn lẹpo bọ dopo tata to yé mẹ ma họ̀ngán.”
31 Enẹwutu, ahọlu fọ́n bo tlẹ́n awù etọn lẹ bosọ mlọn kọmẹ, bọ devizọnwatọ etọn lẹpo ṣite to e dè po awù tintlẹ́n lẹ po to okọ̀.
32 Ṣigba, Jehonadabi+ visunnu Ṣimẹa,+ he yin nọvisunnu Davidi tọn dọmọ: “Oklunọ ṣie ni ma lẹndọ visunnu jọja ahọlu tọn lẹpo wẹ yin hùhù blo, na Amnọni kẹdẹ wẹ yin hùhù.+ Ehe yin bibasi to gbedide Absalọmi tọn glọ, mẹhe ko magbe nado wà ehe+ sọn azán he gbè Amnọni ko dowinyan nọviyọnnu etọn+ Tamali.+
33 Todin, oklunọ ṣie ahọlu ni ma na ayidonugo linlin lọ* blo, ehe dọ dọ, ‘Visunnu ahọlu tọn lẹpo wẹ ko yin hùhù’; na Amnọni kẹdẹ wẹ yin hùhù.”
34 To ojlẹ enẹ mẹ, Absalọmi họ̀njẹgbé.+ To ojlẹ de godo, nuhọ́tọ lọ ze nukun etọn daga bo mọ mẹsusu ja to aliho he e dogodo lọ ji to osó lọ pá.
35 Whenẹnu, Jehonadabi+ dọna ahọlu dọmọ: “Pọ́n! Visunnu ahọlu tọn lẹ ko lẹkọwa. Nugbo wẹ devizọnwatọ towe dọ.”
36 Dile e dọho fó, visunnu ahọlu tọn lẹ biọ whégbè bo to avivi po awhá po; ahọlu po devizọnwatọ etọn lẹpo po sọ viavi vivẹvivẹ.
37 Ṣigba, Absalọmi họ̀njẹgbé bo yì Talmai+ visunnu Amihudi ahọlu Gẹṣuli tọn dè. Davidi sọ nọ aluẹmẹ na visunnu etọn na azán susu.
38 To whenue Absalọmi ko họ̀njẹgbé bo yì Gẹṣuli+ godo, e nọ dọ́n na owhe atọ̀n.
39 To godo mẹ, Ahọlu Davidi jlo vẹkuvẹku nado yì Absalọmi dè, na e ko duto awubla* okú Amnọni tọn ji.
Nudọnamẹ Odò Tọn
^ Kavi “akla homẹmiọnnamẹ tọn.”
^ To paa mẹ, “akla hìhì he tindo awusọhia ahun tọn.”
^ Kavi “akla homẹmiọnnamẹ tọn.”
^ To paa mẹ, “akla hìhì he tindo awusọhia ahun tọn.”
^ Kavi “akla homẹmiọnnamẹ tọn.”
^ Kavi “he yin aṣọ́dona.”
^ Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
^ To paa mẹ, “ma ze ahun etọn do linlin lọ ji.”
^ Kavi “ko mọ homẹmiọnnamẹ yí do.”
