2 Samuẹli 4:1-12
4 To whenue visunnu Sauli tọn Iṣi-boṣẹti*+ sè dọ Abneli ko kú to Heblọni,+ obu jẹ e ji* bọ Islaeli pete sọ biọ bẹwlu mẹ.
2 Sunnu awe wẹ yin ogán na ogbẹ́ jaguda tọn he yin visunnu Sauli tọn tọn lẹ: sunnu lọ lẹ dopo nọ yin Baanahi bọ awetọ nọ yin Lekabi. Yé yin visunnu Limọni Beẹlọtinu lọ tọn sọn hẹnnu Bẹnjamini tọn mẹ. (Na Beẹlọti+ lọsu nọ yin hihia di apadewhe Bẹnjamini tọn dai.
3 Beẹlọtinu lẹ ko họ̀njẹgbé yì Gitaimi+ bo lẹzun mẹhe to jonọ-gbéji lẹ to finẹ kakajẹ egbé.)
4 Todin, Jonatani+ visunnu Sauli tọn tindo visunnu de he afọ etọn lẹ kúsẹ́.*+ Owhe atọ́n wẹ e tindo to whenue linlin wá sọn Jezleẹli+ gando okú Sauli po Jonatani po tọn go, bọ yọnnu nukunpedomẹgotọ etọn ze e bo họ̀n, ṣigba dile e to hinhọ̀n po obu po, visunnu lọ flẹ jai bo lẹzun sẹkunọ. Oyín etọn wẹ Mẹfiboṣẹti.+
5 Visunnu Limọni Beẹlọtinu lọ tọn lẹ, yèdọ Lekabi po Baanahi po yì owhé Iṣi-boṣẹti tọn gbè to owhè ṣádada mẹ to whenue e to gbigbọjẹ to whèmẹ.
6 Yé biọ owhé lọ gbè taidi dọ likun wẹ yé jlo na bẹ, bo sọnú adọ̀mẹ na ẹn; enẹgodo Lekabi po nọvisunnu etọn Baanahi po+ họnyi.
7 Whenue yé biọ owhé lọ gbè, ewọ to aimimlọn to adọzan etọn ji to abò mẹ, yé sọ sọnú in bo hù i bosọ sán ota etọn sẹ̀. Enẹgodo, yé ze ota etọn bo zingbejizọnlin to ozán lọ pete mẹ gbọn aliho he yì Alaba lọ ji.
8 Yé sọ hẹn ota Iṣi-boṣẹti+ tọn wá na Davidi to Heblọni bo dọna ahọlu dọmọ: “Ota Iṣi-boṣẹti visunnu Sauli, yèdọ kẹntọ towe+ he to okú* towe dín+ dai lọ tọn die. Jehovah ko yiahọsu to Sauli po kúnkan etọn lẹ po go na oklunọ ṣie ahọlu to egbé.”
9 Ṣigba, Davidi gblọnna Lekabi po nọvisunnu etọn Baanahi po, yèdọ visunnu Limọni Beẹlọtinu lọ tọn lẹ dọmọ: “Dile Jehovah, mẹhe whlẹn mi* sọn ayimajai lẹpo mẹ lọ togbẹ̀,+
10 whenue mẹde wá dọna mi dọ, ‘Sauli ko kú,’+ bo lẹndọ wẹndagbe de wẹ e hẹnwa na mi, n’wle e bo hù i+ to Ziklagi. Ahọsumẹ he wẹnsagun lọ mọyi sọn dè e niyẹn!
11 Nẹmunẹmu wẹ wá yin whenue mì mẹylankan lẹ hù dodonọ de to owhé etọn titi gbè to adọzan etọn ji! Be n’ma na kàn ohùn etọn biọ sọn alọ mìtọn mẹ+ bo de mì sẹ̀ sọn aimẹ ya?”
12 Whenẹnu, Davidi degbena jọja sunnu lẹ nado hù yé.+ Yé sọ sán alọ po afọ yetọn lẹ po sẹ̀ bo ze yé plá do núgo+ to osindò lọ kọ̀n to Heblọni. Ṣigba, yé ze ota Iṣi-boṣẹti tọn bo dì i do ṣiọditẹn Abneli tọn to Heblọni.
Nudọnamẹ Odò Tọn
^ To paa mẹ, “visunnu Sauli tọn.”
^ To paa mẹ, “alọ etọn lẹ gbọjọ.”
^ Kavi “he yin pòtẹnnọ.”
^ Kavi “alindọn.”
^ Kavi “mẹhe fli alindọn ṣie gọ̀.”
