2 Pita 3:1-18
3 Mẹyiwanna lẹ emi, ehe wẹ wekanhlanmẹ awetọ he yẹn to kinkan hlan mì todin, to ehe mẹ yẹn gbọn nuflinmẹ dali do to nugopipe nulẹnpọn ganji tọn mìtọn lẹ fọndote, kẹdẹdile yẹn ko basi do to tintan lọ mẹ,+
2 na mì nido flin nuhe yẹwhegán wiwe lẹ ko dọ wayi* lẹ podọ gbedide Oklunọ po Mẹwhlẹngántọ lọ po tọn he yin nina gbọn apọsteli mìtọn lẹ gblamẹ.
3 Jẹnukọn whẹ́, mì ni yọnẹn dọ to azán godo tọn lẹ mẹ, mẹṣankotọ lẹ na wá po mẹṣanko yetọn po bo na to zọnlinzin sọgbe hẹ ojlo yetọn titi lẹ+
4 bo nasọ to didọmọ: “Fie wẹ tintin tofi etọn he yin opagbe etọn do lọ te?+ Yèdọ, sọn azán he gbè tọgbo mítọn lẹ ko damlọn to okú mẹ, mọ wẹ nulẹpo gbẹ́ te kẹdẹdile yé te do pẹpẹ sọn bẹjẹeji nudida tọn gbọ́n.”+
5 Na yé wọnji nugbo lọ go sọn ojlo mẹ wá dọ, sọn hohowhenu, olọn lẹ gọna aigba de he mlindopọ jẹgbonu sọn osin mẹ podọ to osin ṣẹnṣẹn ko tin gbọn ohó Jiwheyẹwhe tọn dali;+
6 podọ gbọn onú enẹlẹ dali, aihọn whenẹnu tọn yin vivasudo to whenuena yè yí osin do gọ́ ẹ.+
7 Ṣigba, gbọn ohó dopolọ dali, olọn lẹ po aigba lọ po he tin todin yin whiwhla na miyọ́n bo to yinyin hihla dai kakajẹ azán whẹdida tọn po vasudo omẹ jijọ-madi-Jiwheyẹwhe tọn lẹ tọn po gbè.+
8 Etomọṣo, mẹyiwanna lẹ emi, mì dike bo wọn nugbo ehe blo, dọ azán dopo to Jehovah* dè taidi owhe fọtọ́n podọ owhe fọtọ́n taidi azán dopo.+
9 Jehovah* ma to gbàndọn gando opagbe etọn go,+ dile mẹdelẹ nọ lẹn gbàndindọn do, ṣigba e to homẹfa na mìtọn wutu, na e ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.+
10 Ṣogan, azán Jehovah* tọn+ na wá taidi ajotọ,+ to ehe mẹ olọn lẹ na juwayi plaun+ to nudidọ sinsinyẹn de mẹ, ṣigba nugonu he hùnmiyọ́n sinsinyẹn lẹ na yọ́, bọ aigba po azọ́n he tin to e mẹ lẹ po na yin didehia.+
11 To whenuena e yindọ onú ehe lẹpo na yin hinhẹn yọ́ to aliho ehe mẹ, mì lẹnnupọndo omẹ nankọ he e jẹ dọ mìwlẹ ni yin to walọ wiwe lẹ po nuyiwa mẹdezejo na Jiwheyẹwhe tọn lẹ po mẹ ji,
12 dile mì to tenọpọn bo to tintin tofi azán Jehovah* tọn hẹn do ayiha mẹ gligli,*+ to whenue olọn lẹ na gbọn miyọ́n dali yin vivasudo+ bọ nugonu lọ lẹ na gbọn yozò sinsinyẹn dali yọ́!
13 Ṣigba, kẹdẹdi opagbe etọn, olọn yọyọ lẹ po aigba yọyọ de po tin he míwlẹ to tenọpọn,+ podọ ofi ehelẹ wẹ dodowiwa na nọ nọ̀.+
14 Enẹwutu, mẹyiwanna lẹ emi, to whenuena e yindọ mì to tenọpọn onú ehelẹ, mì wà nuhe go mì pé lẹpo na ewọ nido mọ mì to godo mẹ madodiho, madoblọ podọ to jijọho mẹ.+
15 Humọ, mì nọ pọ́n homẹfa Oklunọ mítọn tọn hlan taidi whlẹngán, kẹdẹdile mẹmẹsunnu mẹyiwanna mítọn Paulu ko kanwe etọn hlan mì do ga sọgbe hẹ nuyọnẹn he yin nina ẹn,+
16 bo to hodọ gando onú ehelẹ go dile ewọ nọ wà do to wekanhlanmẹ etọn lẹpo mẹ. Ṣigba, onú delẹ tin to yé mẹ he vẹawu nado mọnukunnujẹemẹ, bọ wunvinọ* po mẹhe ma lodo lẹ po nọ to kọslona onú ehelẹ, kẹdẹdile yé nọ basi do ga na pipotọ Owe-wiwe lẹ tọn, na vasudo yedetiti tọn.
17 Enẹwutu, mì mẹyiwanna lẹ emi, na mì ko yọ́n ehe jẹnukọn, mì nọ họ́ mìde na mì nikaa yin hinhẹn buali gbọn nuṣiwa sẹ́nhẹngbatọ lẹ tọn dali bo hẹn tenọgli* mìtọn bu.+
18 Lala, ṣigba mì to whinwhẹ́n zọnmii to nukundagbe majẹhẹ po oyọnẹn Oklunọ Mẹwhlẹngántọ mítọn Jesu Klisti po tọn mẹ. Ewọ tọn wẹ gigo todin podọ kaka yì ojlẹ madopodo. Niṣẹ.*
Nudọnamẹ Odò Tọn
^ Kavi “ko dọ dọdai etọn.”
^ Kavi “jlo vẹkuvẹku.” To paa mẹ, “to mizọnmizọn do na.”
^ Kavi “mẹhe gbọagba nupinplọn tọn.”
^ Kavi “dolilo.”
^ Kavi “Amẹn” to Glẹkigbe mẹ.
