2 Timoti 3:1-17
3 Ṣigba, hiẹ ni yọ́n ehe, dọ to azán godo tọn+ lẹ mẹ, ojlẹ awusinyẹn tọn he vẹawu nado pehẹ lẹ na wá tin.
2 Na gbẹtọ lẹ na yin wanyina mẹdetiti tọ́, wanyina akuẹtọ, awagundotọ, saklanọ, nùzantọ, tolivẹ do mẹjitọ lẹ go tọ́, mayọndagbenọ, nugbomadọtọ,
3 owanyi jọwamọ tọn matindotọ, gbigbọ gbekọndopọ tọn matindotọ, mẹhẹngbletọ, wazẹjlẹgonọ, kanylantọ, owanyi dagbewà tọn matindotọ,
4 mẹdehiatọ, tasinyẹntọ, mẹhe nọ gbọn kikla dali yigo, wanyina gbẹdudu tọ́ kakati nido yin wanyina Jiwheyẹwhe tọ́,
5 mẹhe tindo awusọhia jijọ-di-Jiwheyẹwhe tọn, ṣigba bo mọ́n huhlọn etọn;+ podọ omẹ ehelẹ dè wẹ hiẹ ni joagọ sọn.
6 Yewlẹ mẹ wẹ mẹhe nọ yí ayiha gigẹdẹ do dín aliho biọ whédo lẹ mẹ nọ fọ́n sọn bo nọ doyẹklọ yọnnu madogánnọ he ko tlọ biọ ylando mẹ lẹ, mẹhe nọ yin anadena gbọn ojlo voovo lẹ dali,
7 bosọ nọ to nuplọn to whepoponu ṣogan bo ma nọ penugo gbede nado tindo oyọnẹn he pegan nugbo tọn.
8 Todin, aliho he mẹ Jannesi po Jambele po diọnukunsọ Mose te, mọ wẹ omẹ ehelẹ ga to nukundiọsọ nugbo lọ do. Omẹ mọnkọtọn lẹ ko gblezọn mlẹnmlẹn to ayiha mẹ, bo ma yin alọkẹyi to yise lọ mẹ.
9 Etomọṣo, yé ma na tindo nukọnyiyi dogọ ba, na nulú yetọn na họnwun hezeheze na mẹlẹpo, kẹdẹdile e yindo na sunnu awe enẹlẹ.+
10 Ṣigba, hiẹ ko na ayidonugo sọwhiwhe tọn nuplọnmẹ ṣie, aliho gbẹzan tọn ṣie,+ lẹndai ṣie, yise ṣie, homẹfa ṣie, owanyi ṣie, akọndonanu ṣie,
11 homẹkẹn po yajiji lẹ po he nkọ n’pehẹ to Antioku,+ to Ikonioni,+ to Listla.+ Yẹn doakọnna homẹkẹn ehelẹ podọ Oklunọ whlẹn mi sọn yemẹpo mẹ.+
12 Na nugbo tọn, mẹhe to jijlo nado nọgbẹ̀ po mẹdezejo na Jiwheyẹwhe po to kọndopọ mẹ hẹ Klisti Jesu lẹpo na yin homẹkẹndo ga.+
13 Ṣigba, mẹylankan lẹ po mẹblutọ lẹ po na to yinylan deji dogọ, yé na to mẹklọ bo nasọ to yinyin kiklọ.+
14 Ṣigba, hiẹ ni zindonukọn to nuhe hiẹ ko plọn bo ko yin linlẹndiọna nado yise lẹ mẹ,+ na hiẹ yọ́n mẹhe dè hiẹ plọn yé sọn lẹ
15 podọ sọn ovu whenu gbọ́n+ wẹ hiẹ ko yọ́n kandai wiwe lẹ,+ ehe penugo nado hẹn we yin nuyọnẹntọ na whlẹngán gbọn yise to Klisti Jesu mẹ gblamẹ.+
16 Owe-wiwe lẹpo wẹ yin gbigbọdo sọn Jiwheyẹwhe dè+ bo yin alenu na mẹpinplọn,+ na wọhẹmẹ, na nulẹ hinhẹn sọgbe,* na mẹplọnlọdidomẹgo to dodowiwa mẹ,+
17 na omẹ Jiwheyẹwhe tọn nido sọgan pegan to gigọ́ mẹ bo yin hinhẹn sọgbe mlẹnmlẹn na azọ́n dagbe lẹpo.
Nudọnamẹ Odò Tọn
^ Kavi “na nuvọjlado.”
