Amọsi 5:1-27
5 “Owhé Islaeli tọn E, sè ohó ehe he yẹn to didọ sọta we taidi avihàn* de dọmọ:
2 ‘Awhli lọ, yèdọ Islaeli, ko jai;Ewọ masọ sọgan fọnṣite ba.
E ko yin kọgbẹ́ e go to aigba etọn titi ji;Mẹde ma tin nado ze e ṣite.’
3 “Na nuhe Oklunọ Nupojipetọ Jehovah dọ die:
‘Gbẹtọ ma na pò hú kanweko to tòdaho he mẹ gbẹtọ fọtọ́n nọ tọ́n sọn yì awhàn;Podọ gbẹtọ ma na pò hú ao to dehe mẹ gbẹtọ kanweko nọ tọ́nyi sọn, na owhé Islaeli tọn.’+
4 “Na nuhe Jehovah dọna owhé Islaeli tọn die:
‘Mì dín mi bo gbọṣi ogbẹ̀.+
5 Mì dín Bẹtẹli blo,+Mì yì Gilgali+ kavi dasá yì Beẹli-ṣeba blo,+Na e họnwun dọ Gilgali na yì kanlinmọgbenu,+Bẹtẹli nasọ jẹvọ́.*
6 Mì dín Jehovah bo gbọṣi ogbẹ̀,+Na e nikaa wujẹgbonu taidi miyọ́n de do owhé Josẹfu tọn ji,Bo na fiọ Bẹtẹli bọ mẹde ma nasọ tin nado ṣimiyọ́n etọn.
7 Mì nọ diọ whẹdida dodo zun vivẹ́,Mì sọ nọ zín dodowiwa do odò.+
8 Mẹlọ he basi pipli sunwhlẹvu lẹ tọn he nọ yin Kima* po pipli sunwhlẹvu lẹ tọn he nọ yin Kesili* po,+Mẹlọ he nọ diọ zinvlu gọ́ngọ́n zun afọnnu,Mẹlọ he nọ hẹn okle dózin di ozán,+Mẹlọ he nọ ylọ osin hùmẹ tọn lẹ pliNado kọ̀n yé jẹgbonu do aigba nukunmẹ+—Jehovah wẹ e nọ yin.
9 E na hẹn vasudo nado wujẹgbonu sọta huhlọnnọ,Bo gbọnmọ dali hẹn vasudo wá figángán lẹ ji.
10 Yé gbẹwanna mẹhe nọ gbẹnunamẹ to họngbo tòdaho lọ tọn ji lẹ,Yé masọ yiwanna mẹhe nọ dọ nugbo lẹ paali.+
11 Na mì nọ biọ ogle hihaya-kuẹ* to wamọnọ siBo nọ yí jinukun etọn taidi takuẹ wutu,+Mì ma na gbọṣi owhé zannu pipà tọn he mì ko gbá lẹ mẹ+Mọ mì ma na nù ovẹn sọn vẹngle dagbedagbe he mì ko pọ̀ lẹ mẹ.+
12 Na yẹn yọ́n lehe gufinfọn* mìtọn sù sọPodọ lehe ylando mìtọn lẹ klo sọ—Mì nọ vannukundo dodonọ,Mì nọ yí alọgodo-kuẹ,Mì sọ nọ tẹ̀ wamọnọ jlọjẹ etọn to họngbo tòdaho lọ tọn ji.+
13 Enẹwutu, mẹhe tindo zinzin lẹ na gbọṣi abọẹ to ojlẹ enẹ mẹ,Na ojlẹ nugbajẹmẹji tọn de wẹ e na yin.+
14 Mì dín nuhe yin dagbe, e ma yin oylan,+Na mì nido gbọṣi ogbẹ̀.+
Whenẹnu, Jehovah Jiwheyẹwhe awhànpa lẹ tọn na nọhẹ mì,Kẹdẹdile mì dọ do.+
15 Mì gbẹwanna nuhe ylan, bo yiwanna nuhe yin dagbe,+Mì dike whẹdida dodo ni gbayipe to họngbo tòdaho lọ tọn ji.+
E sọgan yindọ Jehovah Jiwheyẹwhe awhànpa lẹ tọnNa do nukundagbe hia pipotọ Josẹfu tọn lẹ.’+
16 “Enẹwutu, nuhe Jehovah Jiwheyẹwhe awhànpa lẹ tọn, yèdọ Jehovah dọ die:
‘Avihàn na gbayipe gbọn tòplitẹn lẹpo,Podọ to tòhomẹ-liho lẹpo ji wẹ yé na nọ dọ te dọ, “Ṣo, ṣo!”
Yé na ylọ glesi lẹ nado nọ aluẹmẹPodọ mẹhe yí aluẹmẹninọ do dó azọ́n lẹ nado doavihàn.’
17 ‘Avihàn na gbayipe gbọn vẹngle lẹpo mẹ;+Na yẹn na jugbọn ṣẹnṣẹn mìtọn,’ wẹ Jehovah dọ.
18 ‘Dindọn wẹ na mẹhe to nukundo azán Jehovah tọn vẹkuvẹku lẹ!+
To whelọnu lo, etẹwẹ azán Jehovah tọn na zẹẹmẹdo na mì?+
Azán zinvlu tọn wẹ e na yin, kakati nido yin hinhọ́n tọn.+
19 E na taidi dawe de he họ̀nna kinnikinni bo yì pé beali,Podọ to whenue e biọ ohọ̀ etọn mẹ bo ze alọ etọn do adó go, odàn de hẹ̀nadu i.
20 Be azán Jehovah tọn ma na yin zinvlu tọn kakati nido yin hinhọ́n tọn ya;Be e ma na yin zinvlu gọ́ngọ́n tọn kakati nido yin hinhọ́n tọn ya?
21 Yẹn gbẹwanna hùnwhẹ mìtọn lẹ sinsinyẹn,+Yẹn masọ nọ tindo homẹhunhun depope to owán gblingblin opli vonọtaun mìtọn lẹ tọn mẹ.
22 Eyin mì tlẹ basi avọ́nunina mimẹ̀ blebu po avọ́nunina lẹ po na mi,Yẹn ma nọ tindo homẹhunhun depope to yé mẹ;+Yẹn ma nasọ yí nukundagbe do pọ́n avọ́sinsan jijọho tọn lẹ he mì nọ yí kanlin dojó lẹ do basi.+
23 Mì nọla na mi po zingidi ohàn mìtọn lẹ tọn po;Mì sọ yí hànjinu okànnọ mìtọn lẹ do hò hàngbe milomilo lẹ do otó mẹ na mi ba blo.+
24 Mì dike whẹdida dodo ni to sisà taidi osin,+Podọ dodowiwa taidi tọ̀sisa he ma nọ doalọte.
25 Owhé Islaeli tọn E, be hiẹ hẹn avọ́sinsan lẹ po avọ́nunina lẹ po wá na miNa owhe 40 enẹlẹ to danfafa ji wẹ ya?+
26 Todin, mì na to dandannu glọ nado ze Sakuti ahọlu mìtọn po Kewani* po yì,Yèdọ boṣiọ mìtọn lẹ, he yin sunwhlẹvu yẹwhe mìtọn tọn, ehe mì basi na mìde,
27 Yẹn na do mì hlan kanlinmọgbenu zẹ̀ Damasku go,’+ wẹ mẹhe oyín etọn nọ yin Jehovah Jiwheyẹwhe awhànpa lẹ tọn dọ.”+
Nudọnamẹ Odò Tọn
^ Kavi “ohàn aluẹmẹninọ tọn.”
^ Kavi vlavo, “lẹzun nuhe dabla.”
^ Vlavo pipli sunwhlẹvu lẹ tọn he nọ yin Oliọni.
^ Vlavo sunwhlẹvu Pleiadi lẹ to pipli sunwhlẹvu lẹ tọn he nọ yin Taulusi mẹ.
^ Kavi “takuẹ aigba tọn.”
^ Kavi “sẹ́nhẹngba.”
^ Yẹwhe awe ehelẹ sọgan to alọdlẹndo planẹti Saturne, he nọ yin sinsẹ̀n di yẹwhe de.
