Daniẹli 2:1-49
2 To owhe awetọ gandudu Nẹbukadnẹzali tọn mẹ, e kudlọ delẹ he dotukla ẹ*+ sọmọ bọ e ma sọgan damlọn.
2 Ahọlu sọ degbe nado ylọ yẹwhenọ nujlẹtọ lẹ, afinyọnnọ lẹ, owọ́ntọ lẹ po Kaldeanu lẹ* po pli, na yé nido dọ odlọ ahọlu tọn lẹ na ẹn. Yé sọ wá bo nọte to ahọlu nukọn.+
3 Whenẹnu, ahọlu dọna yé dọmọ: “N’kudlọ de, podọ e to tuklado mi, na n’jlo* na yọ́n odlọ he n’kú lọ.”
4 Kaldeanu lẹ sọ gblọnna ahọlu to Alamaikigbe* mẹ+ dọmọ: “Ahọlu E, hiẹ ni nọgbẹ̀ kakadoi. Dọ odlọ lọ na devizọnwatọ towe lẹ, míwlẹ nasọ dọ tadena lọ na we.”
5 Ahọlu sọ gblọnna Kaldeanu lẹ dọmọ: “Gbèta godo tọn ṣie die: Eyin mì ma hẹn odlọ lọ zun yinyọnẹn na mi, gọna tadena etọn, awutugonu mìtọn lẹ na yin jijá do flinflin, owhé mìtọn lẹ nasọ yin didiọ zun adàdo otò tọn.*
6 Ṣigba, eyin mì dọ odlọ lọ po tadena etọn po, mì na mọ nunina lẹ, ahọsumẹ po gbégbò daho po yí sọn dè e.+ Enẹwutu, mì dọ odlọ lọ po tadena etọn po na mi.”
7 Yé sọ gblọnna ẹn whla awetọ dọmọ: “Ahọlu ni dọ odlọ lọ na devizọnwatọ etọn lẹ, míwlẹ nasọ dọ tadena etọn.”
8 Ahọlu gblọn dọmọ: “Yẹn yọnẹn ganji dọ ayiha kàn wẹ mì te nado hẹn whenu gú, na mì yọ́n nuhe gbèta ṣie godo tọn yin ganji.
9 Eyin mì ma hẹn odlọ lọ zun yinyọnẹn na mi, yasanamẹ dopolọ wẹ to ote pọ́n mìmẹpo. Ṣigba, mìwlẹ ko kọngbedopọ nado dolalo na mi bo klọ mi kaka ninọmẹ lọ nado diọ. Enẹwutu, mì dọ odlọ lọ na mi, yẹn nasọ yọnẹn dọ mì sọgan basi zẹẹmẹ tadena etọn tọn.”
10 Kaldeanu lẹ gblọnna ahọlu dọmọ: “Mẹde ma tin to aigba* ji he na penugo nado wà nuhe biọ ahọlu te, na ahọlu daho de kavi ayimatẹn-gán de ma ko biọ onú mọnkọtọn yẹwhenọ nujlẹtọ kavi afinyọnnọ kavi Kaldeanu depope pọ́n.
11 Nuhe biọ ahọlu te vẹawu, podọ mẹde ma tin he sọgan dọ ehe na ahọlu adavo yẹwhe lẹ he ma nọ nọ̀ gbẹtọvi lẹ ṣẹnṣẹn.”*
12 To whenẹnu, ahọlu gblehomẹ sinsinyẹn bo degbe nado và nuyọnẹntọ Babilọni tọn lẹpo sudo.+
13 To whenue gbedide lọ tọ́n bọ nuyọnẹntọ lẹ dona yin hùhù, yé dín Daniẹli po gbẹdohẹmẹtọ etọn lẹ po nado hù yelọsu ga.
14 To ojlẹ enẹ mẹ, Daniẹli yí wuntuntun po zinzin po do dọho hẹ Aliọki, mẹhe yin ogán na hihọ́tọ ahọlu tọn lẹ, he ko tọ́nyi nado hù nuyọnẹntọ Babilọni tọn lẹ.
15 E kanse Aliọki, mẹhe yin awhàngán ahọlu tọn lọ dọmọ: “Naegbọn ahọlu do na gbedide sinsinyẹn mọnkọtọn?” Aliọki sọ dọ whẹho lọ na Daniẹli.+
16 Enẹwutu, Daniẹli biọ họmẹ yì ahọlu dè bo biọ to e si nado na ẹn whenu, na e nido dọ tadena lọ na ahọlu.
17 Enẹgodo, Daniẹli yì owhé etọn gbè bo dọ whẹho lọ na gbẹdohẹmẹtọ etọn lẹ, yèdọ Hanania, Miṣaẹli po Azalia po.
18 E sọ biọ to yé si nado biọ lẹblanu Jiwheyẹwhe olọn tọn to odẹ̀ mẹ gando aṣli ehe go, na Daniẹli po gbẹdohẹmẹtọ etọn lẹ po ma nado yin vivasudo hẹ nuyọnẹntọ Babilọni tọn he pò lẹ.
19 Aṣli lọ sọ yin didehia Daniẹli to numimọ de mẹ to zánmẹ.+ Enẹwutu, Daniẹli pà Jiwheyẹwhe olọn tọn.
20 Daniẹli dọmọ:
“Na oyín Jiwheyẹwhe tọn ni yin pipà kakadoi,*Na ewọ kẹdẹ tọn wẹ nuyọnẹn po huhlọn po.+
21 Ewọ nọ diọ ojlẹ lẹ po osaa lẹ po,+Ewọ nọ de ahọlu lẹ sẹ̀ bo nọ do ahọlu lẹ ai,+Ewọ wẹ nọ na nuyọnẹn nuyọnẹntọ lẹ bosọ nọ na oyọnẹn mẹhe tindo wuntuntun lẹ.+
22 Ewọ nọ de onú sisosiso lẹ po nuhe whlá lẹ po hia,+E yọ́n nuhe tin to zinvlu mẹ lẹ,+Podọ ewọ dè wẹ hinhọ́n tin te.+
23 Jiwheyẹwhe tọgbo ṣie lẹ tọn E, hiẹ wẹ yẹn to pẹdona bosọ to pipà,Na hiẹ ko na mi nuyọnẹn po huhlọn po.
Hiẹ ko sọ hẹn nuhe míwlẹ biọ we zun yinyọnẹn na mi;Hiẹ ko hẹn ahunmẹdunamẹnu ahọlu tọn zun yinyọnẹn na mí.”+
24 Enẹgodo, Daniẹli yì Aliọki, yèdọ mẹhe ahọlu ko de nado và nuyọnẹntọ Babilọni tọn lẹ sudo+ lọ dè bo dọna ẹn dọmọ: “A và nuyọnẹntọ Babilọni tọn depope sudo blo. Plan mi yì ahọlu nukọn, yẹn nasọ dọ tadena lọ na ahọlu.”
25 Aliọki sọ yawu plan Daniẹli biọ họmẹ yì ahọlu nukọn bo dọna ẹn dọmọ: “Yẹn ko mọ dawe de sọn kanlinmọ Juda tọn lẹ mẹ+ he sọgan hẹn tadena lọ zun yinyọnẹn na ahọlu.”
26 Ahọlu dọna Daniẹli he nọ yin Bẹlteṣazali+ dọmọ: “Be hiẹ sọgan hẹn odlọ he n’kú lọ po tadena etọn po zun yinyọnẹn na mi nugbonugbo ya?”+
27 Daniẹli gblọnna ahọlu dọmọ: “Depope to nuyọnẹntọ, afinyọnnọ, yẹwhenọ nujlẹtọ kavi sunwhlẹvu-pọntọ lẹ mẹ ma penugo nado dọ aṣli he biọ ahọlu te lọ na ẹn.+
28 Ṣigba, Jiwheyẹwhe de tin to olọn mẹ, Mẹhe nọ de aṣli lẹ hia,+ podọ e ko hẹn nuhe na jọ to azán godo tọn lẹ mẹ zun yinyọnẹn na hiẹ Ahọlu Nẹbukadnẹzali. Odlọ towe die, podọ numimọ he wá tamẹ na we dile hiẹ to aimimlọn to adọzan towe ji lẹ die:
29 “Ahọlu E, dile hiẹ to adọzan towe ji, ayiha towe lẹhlan nuhe na jọ to sọgodo lẹ, Mẹhe nọ de aṣli lẹ hia ko sọ hẹn nuhe na jọ zun yinyọnẹn na we.
30 Na yẹn tọn, e ma yindọ n’yọnnuin hú mẹdevo depope wẹ zọ́n bọ aṣli ehe do yin didehia mi gba; kakatimọ na tadena lọ nido yin hinhẹn zun yinyọnẹn na ahọlu, na hiẹ nido yọ́n linlẹn he to ahun towe mẹ lẹ wutu wẹ.+
31 “Ahọlu E, dile hiẹ to nupọn, a mọ boṣiọ blibata de. Boṣiọ enẹ, he yin daho-gbó bo to sisẹ́ taun, tin to ote to nukọn towe, awusọhia etọn sọ dobu.
32 Ota boṣiọ lọ tọn yin sika dagbedagbe,+ akọ́nnu etọn po awà etọn lẹ po yin fataka+ bọ hòtò etọn po asapada etọn lẹ po yin gànvẹẹ,+
33 azangandan etọn lẹ yin gànyuu,+ podọ apadewhe afọ etọn lẹ tọn yin gànyuu bọ apadewhe yin okò.*+
34 Hiẹ sọ to nupọn kakajẹ whenue zannu de yin sinsánsẹ, e ma yin gbọn alọ lẹ dali, e sọ hò afọ boṣiọ lọ tọn lẹ he yin gànyuu po okò po tọn bo gídí yé.+
35 Whenẹnu wẹ yè gídí gànyuu lọ, okò lọ, gànvẹẹ lọ, fataka lọ po sika lọ po bọ popolẹpo taidi ofló likun-flétẹn alunlun mẹ tọn, jẹhọn sọ fú yé dlan sọmọ bọ yè ma tlẹ mọ ohia yetọn. Ṣigba, zannu he hò boṣiọ lọ lẹzun osó daho de bosọ gọ́ aigba pete ji.
36 “Odlọ lọ niyẹn, todin mí na dọ tadena etọn na ahọlu.
37 Ahọlu E—hiẹ wẹ ahọlu ahọlu lẹ tọn he Jiwheyẹwhe olọn tọn ko na ahọluduta,+ hlọnhlọn, huhlọn po gigo po,
38 podọ alọ mẹhe tọn mẹ ewọ ko bẹ gbẹtọ lẹ do mahopọnna fidepope he yé nọ nọ̀, gọna gbekanlin danji tọn lẹ po ohẹ̀ agahomẹ tọn lẹ po, mẹhe ewọ ko sọ yí do basi ogán do yemẹpo ji+—hiẹ lọsu wẹ yin ota sika tọn lọ.+
39 “Ṣigba, ahọluduta devo na fọ́n bọdo gowe+ bo na yìdo hú we; enẹgodo ahọluduta devo nasọ fọ́n, yèdọ atọ̀ntọ de he na yin gànvẹẹ tọn bo na dugán do aigba pete ji.+
40 “Na nuhe dù ahọluduta ẹnẹtọ, e na dohuhlọn taidi gànyuu.+ Na kẹdẹdile gànyuu nọ gídí nulẹpo bo nọ lì yé pọ́dọ́pọ́dọ́ do, mọwẹ, kẹdẹdile gànyuu nọ gbànú hányán do, e na gídí ahọluduta ehe lẹpo bo na gbà yé hányán.+
41 “Podọ kẹdẹdile hiẹ mọ bọ apadewhe afọ po afọvi lọ lẹ po tọn yin okò zẹ́ndotọ de tọn bọ apadewhe yin gànyuu do, ahọluduta lọ na yin mimá, ṣigba sinsinyẹn etọn na taidi gànyuu tọn jẹ obá de mẹ, kẹdẹdile hiẹ mọ bọ gànyuu flusọ́ hẹ okò bibọ do.
42 Podọ dile apadewhe afọvi afọ lọ lẹ tọn yin gànyuu bọ apadewhe yin okò do, mọ wẹ apadewhe ahọluduta lọ tọn na dohuhlọn bọ apadewhe na yin madogánnọ do niyẹn.
43 Kẹdẹdile hiẹ mọ bọ gànyuu flusọ́ hẹ okò bibọ do, yé na flusọ́ hẹ gbẹtọ lẹ;* ṣigba yé ma na tẹ́ dopọ, yèdọ ode do awetọ go, kẹdẹdile gànyuu ma nọ flusọ́ hẹ okò do.
44 “To ojlẹ ahọlu enẹlẹ tọn mẹ wẹ Jiwheyẹwhe olọn tọn na ze ahọluduta de dai+ he ma na yin vivasudo gbede.+ Ahọluduta ehe ma nasọ yin jijodo na akọta devo depope.+ E na gídí ahọluduta ehe lẹpo bo na hẹn yé wá opodo,+ bọ ewọ kẹdẹ wẹ na nọte kakadoi,+
45 kẹdẹdile hiẹ mọ bọ zannu de yin sinsánsẹ sọn osó de go, e ma yin gbọn alọ lẹ dali, bọ e sọ gídí gànyuu lọ, gànvẹẹ lọ, okò lọ, fataka lọ po sika lọ po do.+ Jiwheyẹwhe Ganhunupotọ lọ ko hẹn nuhe na jọ to sọgodo zun yinyọnẹn na ahọlu.+ Nugbo wẹ odlọ lọ podọ tadena etọn sọgan yin jidedego.”
46 To whenẹnu, Ahọlu Nẹbukadnẹzali họ́jai bo ṣinyọ́n nukunmẹ ai to Daniẹli nukọn bosọ gbògbéna ẹn. E sọ degbe dọ nunina po nuyọnwan po ni yin nina ẹn.
47 Ahọlu dọna Daniẹli dọmọ: “Na nugbo tọn, Jiwheyẹwhe towe wẹ Jiwheyẹwhe yẹwhe lẹ tọn, Oklunọ ahọlu lẹ tọn podọ Mẹhe nọ de aṣli lẹ hia, na hiẹ penugo nado de aṣli ehe hia.”+
48 Enẹgodo, ahọlu ze Daniẹli daga bo na ẹn nunina dagbedagbe susu lẹ, e sọ yí i do basi ogán do agbegbe* Babilọni tọn pete ji+ podọ ogán kọmẹ-gán lẹ tọn do nuyọnẹntọ Babilọni tọn lẹpo ji.
49 Podọ sọgbe hẹ obiọ Daniẹli tọn, ahọlu sọ de Ṣadlaki, Mẹṣaki po Abẹdinẹgo po+ nado yin anadenanutọ to agbegbe* Babilọni tọn ji, ṣigba Daniẹli nọ sẹ̀n to họ̀nmẹ.
Nudọnamẹ Odò Tọn
^ To paa mẹ, “gbigbọ etọn.”
^ Enẹ wẹ, pipli de he yin azọ́nyọnẹntọ to dọṣẹdidọ po sunwhlẹvu-pinpọn po mẹ.
^ To paa mẹ, “gbigbọ ṣie jlo.”
^ Da 2:4b jẹ 7:28 yin kinkan to dowhenu do Alamaikigbe mẹ.
^ Kavi vlavo, “ogbóji; afọdaitẹn.”
^ Kavi “aigba-klo.”
^ To paa mẹ, “nọ nọhẹ agbasalan.”
^ Kavi “sọn madopodo jẹ madopodo.”
^ Kavi “okò mimẹ̀.”
^ Kavi “kúnkan gbẹtọvi tọn,” enẹ wẹ, gbẹtọ paa lẹ.
^ Kavi “agbegbe fidugando.”
^ Kavi “agbegbe fidugando.”
