Eksọdusi 11:1-10
11 Whenẹnu wẹ Jehovah dọna Mose dọmọ: “Yẹn na hẹn azọ̀nylankan dopo dogọ wá Falo po Egipti po ji. Enẹgodo, e na tún mì dote.+ Eyin e tún mì dote, e na yàn mì sọn fi petepete.+
2 Todin, dọna gbẹtọ lọ lẹ dọ sunnu lẹ po yọnnu lẹpo po ni biọ núzinzan fataka po sika po+ tọn lẹ to kọmẹnu yetọn lẹ si.”
3 Jehovah sọ hẹn gbẹtọ lọ lẹ nado mọ nukundagbe Egiptinu lẹ tọn. Mose lọsu ko nọ yin gbégbòna tlala to aigba Egipti tọn ji podọ to devizọnwatọ Falo tọn lẹ po mẹlọ lẹ po ṣẹnṣẹn.
4 Mose sọ dọmọ: “Nuhe Jehovah dọ die, ‘To zánhomẹ, yẹn na jugbọn gblagbla Egipti tọn mẹ,+
5 bọ plọnji lẹpo to aigba Egipti tọn ji na kú,+ bẹsọn plọnji Falo he to ofìn ji tọn ji jẹ plọnji afanumẹ yọnnu he to nuli to osé kọ̀n tọn ji, gọna plọnji kanlin-yìnyìn lẹpo tọn.+
6 Avigbè daho de nasọ tin to aigba Egipti tọn lẹpo ji, ehe nkọ ma ko wá aimẹ pọ́n bo ma nasọ wá aimẹ gbede.+
7 Ṣigba, avún dopo tata ma na gbó Islaelivi lẹ,* yèdọ gbẹtọ lẹ wẹo kavi kanlin-yìnyìn yetọn lẹ, na mìwlẹ nido yọnẹn dọ Jehovah sọgan hẹn vogbingbọn tin to Egiptinu lẹ po Islaelivi lẹ po ṣẹnṣẹn.’+
8 Matin ayihaawe, devizọnwatọ towe lẹpo nasọ wá dè e bo ṣinyọ́n nukunmẹ ai to nukọn ṣie bo na to didọmọ, ‘Yì, hiẹ po mẹhe to hihodo we lẹpo po.’+ Enẹgodo, yẹn na tọ́nyi.” E sọ tọ́nyi sọn Falo nukọn po homẹgble sinsinyẹn de po.
9 Whenẹnu wẹ Jehovah dọna Mose dọmọ: “Falo ma na dotoaina mì,+ na azọ́njiawu ṣie lẹ nido sudeji to aigba Egipti tọn ji.”+
10 Mose po Aalọn po sọ wà azọ́njiawu ehe lẹpo to Falo nukọn,+ ṣigba Jehovah dike ahun Falo tọn ni sinyẹn, bọ e ma tún Islaelivi lẹ dote sọn aigba etọn ji.+
Nudọnamẹ Odò Tọn
^ To paa mẹ, “ma na gàn odẹ́ etọn do Islaelivi lẹ go.”
