Eksọdusi 19:1-25
19 To osun atọ̀ntọ mẹ to tintọ́n sọn Egipti Islaelivi lẹ tọn godo, yé wá jẹ danfafa Sinai tọn ji to azán dopolọ gbè.*
2 Yé wleali sọn Lefidimi+ bo wá danfafa Sinai tọn ji bosọ whèsla do danfafa lọ ji. Islaelivi lẹ sọ whèsla do finẹ to osó lọ nukọn.+
3 Enẹgodo, Mose hẹji yì Jiwheyẹwhe nugbo lọ dè to osó lọ ji,+ Jehovah sọ ylọ ẹ sọn osó lọ ji dọmọ: “Nuhe hiẹ na dọna whédo Jakọbu tọn, yèdọ Islaelivi lẹ die,
4 ‘Mìwlẹ ko yí nukun mìtọn lẹ do mọ nuhe yẹn wà hẹ Egiptinu lẹ,+ yèdọ lehe yẹn ko bẹ mì do awà ṣie lẹ ji taidi akùn do bosọ hẹn mì wá dee dè.+
5 Todin, eyin mìwlẹ na setonuna ogbè ṣie mlẹnmlẹn bosọ yìn alẹnu ṣie, e họnwun dọ mìwlẹ na lẹzun nutindo vonọtaun* de na mi to akọta lẹpo mẹ,+ na ṣie wẹ aigba blebu.+
6 Mìwlẹ na lẹzun ahọluduta yẹwhenọ lẹ tọn de podọ akọta wiwe de na mi.’+ Ohó ehelẹ wẹ hiẹ na dọna Islaelivi lẹ.”
7 Enẹwutu, Mose yì bo ylọ mẹho he tin to mẹlọ lẹ mẹ lẹ pli bo dọ ohó he Jehovah ko degbe etọn na ẹn lẹpo+ na yé.
8 Enẹgodo, gbẹtọ lọ lẹpo sọ yigbe to kọndopọ mẹ dọmọ: “Nuhe Jehovah ko dọ lẹpo wẹ míwlẹ wleawufo nado wà.”+ To afọdopolọji, Mose yì dogbè nuhe mẹlọ lẹ dọ tọn na Jehovah.
9 Jehovah sọ dọna Mose dọmọ: “Pọ́n! Yẹn na wá dè we to aslọ titli de mẹ, na mẹlọ lẹ nido sè whenue yẹn na dọho hẹ we podọ na yé nido nọ yí we sè to whepoponu.” Mose sọ yì dogbè nuhe mẹlọ lẹ dọ tọn na Jehovah.
10 Whenẹnu wẹ Jehovah dọna Mose dọmọ: “Yì mẹlọ lẹ dè bo hẹn yé zun wiwe to egbé po osọ po, podọ yé dona yàn avọ̀ yetọn lẹ.
11 Yé dona sọ wleawudaina azán atọ̀ntọ, na to azán atọ̀ntọ gbè wẹ Jehovah na jẹte wá Osó Sinai tọn ji to nukun mẹlẹpo tọn mẹ.
12 Hiẹ dona na dogbó fie mẹlọ lẹ na nọte do tọn yé lẹdo osó lọ, bo dọna yé dọ, ‘Mì payi ma nado hẹ osó lọ ji kavi doalọ tónu etọn go. Mẹdepope he doalọ osó lọ go na yin hùhù dandan.
13 Mẹdepope ma dona doalọ mẹhe wàmọ go, ṣigba ewọ dona yin zannu dlan do hù kavi yin owhán sọ́ luntọ́n.* Vlavo eyin kanlin kavi gbẹtọ, e ma na nọgbẹ̀.’+ Ṣigba, to nudidọ agbòzò tọn+ godo, yé sọgan hẹ osó lọ ji.”
14 Mose sọ jẹte sọn osó lọ ji wá yé dè bo jẹ mẹlọ lẹ klandowiwe ji, yé sọ yàn avọ̀ yetọn lẹ.+
15 E sọ dọna yé dọmọ: “Mì wleawudaina azán atọ̀ntọ. Mì dapana kọndopọ zanhẹmẹ tọn.”*
16 To azán atọ̀ntọ gbè to afọnnu, hẹviosò dọnú, abì sọ gbòdlán bọ aslọ titli+ de sọawuhia to osó lọ ji podọ opẹ̀n sọ dọnú gángán, mẹhe tin to osla lọ mẹ lẹpo sọ jẹ sisọsisọ ji.+
17 Todin, Mose plan mẹlọ lẹ sọn osla lọ mẹ nado yì pé Jiwheyẹwhe nugbo lọ bọ yé nọte to osó lọ kọ̀n.
18 Azọ̀ sọ gọ́ Osó Sinai tọn pete ji, na Jehovah jẹte wá e ji to miyọ́n+ de mẹ wutu; podọ azọ̀ etọn to agayi di azọ̀ zòhọ de tọn nkọ, osó lọ blebu sọ to whinwhàn sinsinyẹn.+
19 Dile nudidọ opẹ̀n lọ tọn to sinsinyẹn deji, Mose dọho bọ ogbè Jiwheyẹwhe nugbo lọ tọn sọ gblọnna ẹn.
20 Jehovah sọ jẹte wá Osó Sinai tọn ji aga. Enẹgodo, Jehovah ylọ Mose wá osó lọ ji aga bọ Mose hẹji yì.+
21 Jehovah sọ dọna Mose dọmọ: “Jẹte yì bo na avase mẹlọ lẹ dọ yé ni ma tẹnpọn nado dọnsẹpọ nado wá pọ́n Jehovah blo, eyin yé wàmọ susu to yé mẹ na dọ̀n.
22 Podọ dike yẹwhenọ lẹ he nọ saba dọnsẹpọ Jehovah ni hẹn yedelẹ zun wiwe, na Jehovah nikaa linú yé.”*+
23 Whenẹnu wẹ Mose dọna Jehovah dọmọ: “Mẹlọ lẹ ma sọgan penugo nado hẹji wá Osó Sinai tọn ji, na hiẹ ko na mí avase dọ, ‘Na dogbó fie mẹlọ lẹ na nọte do tọn yé lẹdo osó lọ bo klan ẹn do wiwe.’”+
24 Etomọṣo, Jehovah dọna ẹn dọmọ: “Jẹte yì bosọ hẹji wá to enẹgodo, yèdọ hiẹ po Aalọn po, amọ́ hiẹ ma dona dike yẹwhenọ lẹ po mẹlọ lẹ po ni tẹnpọn nado dọnsẹpọ bo hẹji wá Jehovah dè, na ewọ nikaa linú yé.”+
25 Enẹwutu, Mose jẹte yì mẹlọ lẹ dè bo dogbè na yé.
Nudọnamẹ Odò Tọn
^ E họnwun dọ ehe to alọdlẹndo azán dopolọ he gbè yé tọ́n sọn Lefidimi.
^ Kavi “he họakuẹ.”
^ Vlavo yin ogá de do.
^ To paa mẹ, “Mì sẹpọ yọnnu de blo.”
^ To paa mẹ, “gbidi yé sẹ̀.”
