Eksọdusi 24:1-18
24 Whenẹnu wẹ Jiwheyẹwhe dọna Mose dọmọ: “Hẹji yì Jehovah dè, yèdọ hiẹ, Aalọn, Nadabi, Abihu+ po 70 sọn mẹho Islaeli tọn lẹ mẹ po bo nọla do dẹ́ do odò hlan mi.
2 Mose kẹdẹ wẹ dona dọnsẹpọ Jehovah; ṣigba omẹ diẹ lẹ ma dona dọnsẹpọ, podọ Islaelivi lẹ ma dona hẹji yì hẹ ẹ.”+
3 Mose sọ wá bo dọ nuhe Jehovah dọ lẹpo po nudide whẹdida tọn etọn lẹpo+ po na mẹlọ lẹ, yemẹpo sọ yigbe to kọndopọ mẹ dọmọ: “Ohó he Jehovah ko dọ lẹpo wẹ míwlẹ wleawufo nado wà.”+
4 Mose sọ wlan ohó Jehovah tọn lẹpo+ dai. E sọ fọ́n to afọnnu fuu bo tùn agbà de po dòtin 12 he nọtena hẹnnu 12 Islaeli tọn lẹ po do osó lọ kọ̀n.
5 Enẹgodo, e do jọja sunnu delẹ hlan sọn Islaelivi lẹ mẹ, yé sọ basi avọ́nunina mimẹ̀ bosọ yí oyìnsú lẹ do basi avọ́sinsan jijọho tọn+ lẹ hlan Jehovah.
6 Mose sọ kọ̀n odaa ohùn lọ tọn do agbán lẹ mẹ bosọ mimí odaa he pò do agbà lọ ji.
7 Enẹgodo, e ze owe alẹnu tọn lọ bo hia ẹ daga na akọta lọ.+ Yé sọ dọmọ: “Nuhe Jehovah ko dọ lẹpo wẹ míwlẹ wleawufo nado wà bo nasọ nọ setonuna.”+
8 Enẹwutu, Mose yí ohùn lọ bo mimí i do mẹlọ lẹ go+ bosọ dọmọ: “Ehe wẹ ohùn alẹnu he Jehovah ko basi hẹ mì tọn to kọndopọ mẹ hẹ ohó ehe lẹpo.”+
9 Mose, Aalọn, Nadabi, Abihu po mẹho 70 sọn mẹho Islaeli tọn lẹ mẹ po sọ hẹji yì,
10 yé sọ mọ Jiwheyẹwhe Islaeli tọn lọ.+ To afọ etọn lẹ glọ wẹ nuhe taidi zannu titẹ́ safili tọn lẹ tin te, yé sọ wé taidi olọn lọsu na ede.+
11 Ewọ ma gbleawuna sunnu nukundeji Islaeli tọn lọ lẹ,+ yé sọ mọ Jiwheyẹwhe nugbo lọ to numimọ mẹ bo dù bosọ nù.
12 Todin, Jehovah dọna Mose dọmọ: “Hẹji wá dè e to osó lọ ji bo gbọṣi finẹ. Yẹn na na we wekan-zannu lẹ po osẹ́n lọ po gọna gbedide he yẹn na wlan na oplọn yetọn.”+
13 Enẹwutu, Mose po devizọnwatọ etọn Jọṣua+ po fọ́n bọ Mose sọ hẹji yì osó Jiwheyẹwhe nugbo lọ tọn ji aga.+
14 Ṣigba, e dọna mẹho lọ lẹ dọmọ: “Mì nọtepọn mí tofi kakajẹ whenue mí na lẹkọwa mì dè.+ Aalọn po Huuli+ po tin to mì dè. Mẹdepope he tindo whẹho de sọgan yì mọ yé.”+
15 Mose sọ hẹji yì osó he ji aslọ to ṣinṣinyọn lọ.+
16 Gigo Jehovah tọn+ sọ gbọṣi Osó Sinai tọn ji,+ bọ aslọ sọ ṣinyọ́n e ji na azán ṣidopo. To azán ṣinawetọ gbè, e ylọ Mose sọn aslọ lọ ṣẹnṣẹn.
17 Na Islaelivi he to nupọn lẹ, gigo Jehovah tọn sọawuhia taidi miyọ́n nuvasudotọ de to aga osó lọ tọn.
18 Enẹgodo, Mose biọ aslọ lọ mẹ bo hẹji yì osó lọ ji aga.+ Mose sọ nọ osó lọ ji na okle 40 ozán 40.+
