Eksọdusi 31:1-18
31 Jehovah sọ dọhona Mose yinukọn dogọ dọmọ:
2 “Pọ́n, yẹn ko de* Bezalẹli+ visunnu Uli, he yin visunnu Huuli tọn, sọn hẹnnu Juda tọn mẹ.+
3 Yẹn na na ẹn gbigbọ Jiwheyẹwhe tọn, nuyọnẹn, nukunnumọjẹnumẹ po oyọnẹn po na alọnuzọ́nwiwa wunmẹ lẹpo,
4 podọ na anazọ́nwiwa, nado nọ yí sika, fataka po gànvẹẹ po zan,
5 nado nọ pà zannu lẹ bo nọ to yé+ podọ nado nọ basi nuyizan owhlẹ tọn wunmẹ lẹpo.+
6 Humọ, yẹn ko de Oholiabi+ visunnu Ahisamaki tọn, sọn hẹnnu Dani tọn mẹ nado gọalọna ẹn, yẹn nasọ yí nuyọnẹn do ahun mẹhe yin azọ́nyọnẹntọ* lẹpo tọn mẹ, na yé nido basi nuhe yẹn ko degbe etọn na we lẹpo:+
7 gòhọ opli tọn lọ,+ apotin Kunnudenu tọn+ po nùsu+ he to e ji po, nuyizan gòhọ lọ tọn lẹpo,
8 tafo+ lọ po nuyizan etọn lẹ po, miyọ́ngbán-tin sika akú tọn lọ po nuyizan etọn lẹpo po,+ agbà nuyọnwan tọn lọ,+
9 agbà avọ́nunina mimẹ̀ tọn lọ+ po nuyizan etọn lẹpo po, basia lọ po nuhe ji e na yin zizedo po,+
10 awù linlọ̀n dagbedagbe lẹ, awù wiwe lẹ na Aalọn yẹwhenọ lọ, awù visunnu etọn lẹ tọn he yé na nọ yizan nado sẹ̀n taidi yẹwhenọ lẹ,+
11 amì mẹdide tọn lọ po nuyọnwan owán gblingblinnọ po na fiwiwe lọ.+ Yé na basi nuhe yẹn ko degbe etọn na we lẹpo.”
12 Jehovah sọ zindonukọn nado dọna Mose dọmọ:
13 “Dọhona Islaelivi lẹ bo dọna yé dọ, ‘Na taun tọn, mìwlẹ na nọ yìn gbọjẹzan ṣie lẹ,+ na ohia de wẹ e yin to yẹn po mìwlẹ po ṣẹnṣẹn sọn whẹndo de ji jẹ devo ji, na mì nido yọnẹn dọ yẹn, Jehovah wẹ to mì klandowiwe.
14 Mì dona nọ yìn Gbọjẹzan lọ, na onú wiwe de wẹ e yin na mì.+ Mẹdepope he hẹn ẹn flu dona yin hùhù. Eyin mẹde wazọ́n depope to azán enẹ gbè, mẹlọ* dona yin sinsánsẹ* sọn omẹ etọn lẹ ṣẹnṣẹn.+
15 Azán ṣidopo wẹ mì na nọ wazọ́n na, ṣigba azán ṣinawetọ na yin gbọjẹzan gbọjẹ mlẹnmlẹn tọn de.+ Onú wiwe de wẹ e yin hlan Jehovah. Mẹdepope he wazọ́n to Gbọjẹzangbe dona yin hùhù.
16 Islaelivi lẹ dona nọ yìn Gbọjẹzan lọ; yé dona nọ yìn Gbọjẹzan lọ sọn whẹndo de ji jẹ whẹndo de ji. Alẹnu dẹn-to-aimẹ de wẹ ehe yin.
17 Ohia he na dẹn-to-aimẹ de wẹ e yin to yẹn po omẹ Islaeli tọn lẹ po ṣẹnṣẹn,+ na to azán ṣidopo gblamẹ wẹ Jehovah dá olọn po aigba po podọ to azán ṣinawetọ gbè e doalọtena azọ́nwiwa bosọ gbọjẹ.’”+
18 Tlolo he e dotana hodidọ hẹ Mose to Osó Sinai tọn ji, e ze wekan-zannu awe he ji Kunnudenu lọ te lẹ na ẹn,+ yèdọ wekan-zannu he ji alọvi Jiwheyẹwhe tọn+ kannu do lẹ.
Nudọnamẹ Odò Tọn
^ To paa mẹ, “ko yí oyín do ylọ.”
^ To paa mẹ, “yin nuyọnẹntọ to ahun mẹ.”
^ Kavi “alindọn lọ.”
^ Kavi “hùhù.”
