Eksọdusi 32:1-35
32 To ojlẹ enẹ mẹ, mẹlọ lẹ mọdọ Mose to dindẹn nado jẹte sọn osó lọ ji.+ Enẹwutu, yé bẹ yede pli lẹdo Aalọn bo dọna ẹn dọmọ: “Fọ́n, basi yẹwhe de na mí he na deanana mí,+ na mí ma yọ́n nuhe na ko jọ do Mose ehe go, yèdọ dawe lọ he plan mí tọ́n sọn aigba Egipti tọn ji.”
2 Whenẹnu wẹ Aalọn dọna yé dọmọ: “Mì de tómẹnu sika tọn+ asi mìtọn lẹ tọn, visunnu mìtọn lẹ tọn gọna viyọnnu mìtọn lẹ tọn bo bẹ yé wá na mi.”
3 Enẹwutu, mẹlọ lẹpo sọ jẹ tómẹnu sika tọn yetọn lẹ desọn otó yetọn lẹ mẹ ji bosọ hẹn yé wá na Aalọn.
4 Ewọ sọ yí sika lọ lẹ sọn yé si bo yí azọ́nwanu de do tùn boṣiọ oyìnvu tọn* de.+ Yé sọ jẹ didọ ji dọmọ: “Islaeli E, Jiwheyẹwhe towe he plan we tọ́n sọn aigba Egipti tọn ji lọ die.”+
5 To whenue Aalọn mọ ehe, e basi agbà de do nukọn etọn. Enẹgodo, Aalọn dọ po ogbè lélé po dọmọ: “Hùnwhẹ de na tin to osọ hlan Jehovah.”
6 Enẹwutu, yé yawu fọ́n to afọnnu fuu to wunkẹngbe bo jẹ avọ́nunina mimẹ̀ lẹ po avọ́sinsan jijọho tọn lẹ po basi ji. Enẹgodo, mẹlọ lẹ sinai nado dù bo nù. Yé sọ fọ́n nado daihun.+
7 Jehovah sọ dọna Mose dọmọ: “Jẹte yì, na omẹ towe lẹ he a plan tọ́n sọn aigba Egipti tọn ji ko hẹn yede gblezọn.+
8 Yé ko yawu zẹ̀ sọn aliho he yẹn ko degbe etọn na yé nado gbọn lọ ji.+ Yé ko basi boṣiọ oyìnvu tọn* de bo to didẹ́ do odò na ẹn bosọ to avọ́san hlan ẹn bo to didọmọ, ‘Islaeli E, Jiwheyẹwhe towe he plan we tọ́n sọn aigba Egipti tọn ji lọ die.’”
9 Jehovah sọ zindonukọn nado dọna Mose dọmọ: “Yẹn ko mọdọ tasinyẹntọ* wẹ omẹ ehelẹ.+
10 Enẹwutu, gbọ yẹn ni sukúndona yé to adi sinsinyẹn ṣie mẹ bo dike ma yí we do basi akọta daho de do otẹn yetọn mẹ.”+
11 To whenẹnu wẹ Mose vẹ̀ Jehovah Jiwheyẹwhe etọn*+ bo dọmọ: “Jehovah E, naegbọn hiẹ nado hẹn adi sinsinyẹn towe wá omẹ towe lẹ ji to whenue hiẹ ko yí huhlọn daho towe po alọ hlọnhlọnnọ towe po do plan yé tọ́n sọn aigba Egipti tọn ji godo?+
12 Naegbọn Egiptinu lẹ nado dọ, ‘Linlẹn ylankan de wutu wẹ e do de yé tọ́n. Na e jlo nado hù yé to osó lẹ ji bo sukúndona yé sọn aigba nukunmẹ wutu wẹ’?+ Lẹkọ sọn adi sinsinyẹn towe mẹ bo diọlinlẹn* gando nudide towe nado hẹn nugbajẹmẹji wá omẹ towe lẹ ji go.
13 Flin devizọnwatọ towe Ablaham, Isaki po Islaeli po, he hiẹ yí dewe do whlé na bo dọmọ: ‘Yẹn na hẹn kúnkan* mìtọn sudeji taidi sunwhlẹvu olọn tọn lẹ,+ podọ aigba ehe lẹpo he yẹn ko dohia mì wẹ yẹn na na kúnkan* mìtọn, na yé nido yí i taidi nutindo tẹgbẹ tọn de.’”+
14 Enẹwutu, Jehovah diọlinlẹn* gando nugbajẹmẹji he e ko dọ dọ e na hẹnwa omẹ etọn lẹ ji go.+
15 Enẹgodo, Mose lẹkọ bo jẹte sọn osó lọ ji po wekan-zannu Kunnudenu+ tọn awe he tin to alọ etọn mẹ+ lẹ po. Adà wekan-zannu lọ lẹ tọn awe lẹ ji wẹ yè kannu do; nukinkan lẹ to yé ji to nukọn po godo po.
16 Alọnuzọ́n Jiwheyẹwhe tọn wẹ wekan-zannu lọ lẹ yin podọ nukinkan lọ lẹ yin nukinkan Jiwheyẹwhe tọn he yin kinkan do wekan-zannu lọ lẹ ji.+
17 To whenue Jọṣua jẹ awhágbe mẹlọ lẹ tọn sè ji, e dọna Mose dọmọ: “Zingidi awhànfunfun tọn de to osla lọ mẹ.”
18 Ṣigba, Mose dọmọ:
“E ma yin hàngbe awhàngbigba* de tọn gba,E masọ yin avigbè awhànṣiṣi tọn de gba;Hàngbe wunmẹ devo sè wẹ yẹn te.”
19 Tlolo he Mose sẹpọ osla lọ bo mọ oyìnvu+ lọ po wedudu lọ po, adi do e sinsinyẹn bọ e bẹ wekan-zannu lọ lẹ dlan sọn alọ etọn lẹ mẹ bo gbà yé hányán do osó lọ kọ̀n.+
20 E sọ ze oyìnvu he yé ko basi lọ bo yí miyọ́n do mẹ̀ ẹn bosọ hẹn ẹn zun afín;+ enẹgodo e vúnvún in pé do osin nukunmẹ bosọ hẹn Islaelivi lẹ nado nù in.+
21 Mose sọ dọna Aalọn dọmọ: “Nawẹ omẹ ehelẹ wagbọn do klọ we bọ hiẹ do hẹn oylan daho ehe wá yé ji?”
22 Aalọn sọ gblọn dọmọ: “Oklunọ ṣie, a gblehomẹ blo. Hiẹ lọsu yọnẹn ganji dọ ayilinlẹn ylankan wẹ mẹlọ lẹ tindo.+
23 Enẹwutu, yé dọna mi dọ, ‘Basi yẹwhe de na mí he na deanana mí, na mí ma yọ́n nuhe na ko jọ do Mose ehe go, yèdọ dawe lọ he plan mí tọ́n sọn aigba Egipti tọn ji.’+
24 Whenẹnu wẹ yẹn dọna yé dọ, ‘Mẹdepope he tindo sika de ni de e bo hẹnwa.’ Enẹgodo, yẹn bẹ sika lọ lẹ do miyọ́n mẹ bọ oyìnvu de sọ yin didetọn.”
25 Mose sọ mọdọ mẹlọ lẹ ko jẹgló, na Aalọn ko dike bọ yé jẹgló bo ko lẹzun aṣagbọ́nu to nukundiọsọmẹtọ yetọn lẹ nukọn.
26 Mose sọ ṣite to họntonu osla lọ tọn bo dọmọ: “Mẹnu lẹ wẹ to adà Jehovah tọn mẹ? Mì gbọ yé ni wá dè e!”+ Levinu lẹpo sọ bẹ yede pli lẹdo e.
27 E sọ dọna yé dọmọ: “Nuhe Jehovah Jiwheyẹwhe Islaeli tọn ko dọ die, ‘Dopodopo mìtọn dona blá ohí etọn dogo bo jugbọn osla lọ pete mẹ sọn họntonu de jẹ họntonu de bosọ hù nọvisunnu etọn, kọmẹnu etọn po họntọn vivẹ́ etọn po.’”+
28 Levinu lẹ sọ wà nuhe Mose dọna yé. Enẹwutu, nudi sunnu 3 000 wẹ yin hùhù to gbenẹgbe.
29 Mose sọ dọmọ: “Mì klan mìde dovo* to egbé na Jehovah, na dopodopo mìtọn ko yinuwa sọta visunnu etọn titi po nọvisunnu etọn titi po;+ ewọ nasọ dona mì to egbé.”+
30 To wunkẹngbe tlolo, Mose dọna mẹlọ lẹ dọmọ: “Mì ko wà ylando sinsinyẹn, podọ todin yẹn na hẹji yì Jehovah dè nado pọ́n eyin yẹn sọgan basi ovẹsè na ylando mìtọn.”+
31 Mose sọ lẹkọyi Jehovah dè bo dọmọ: “Ylando daho wẹ omẹ ehelẹ ko wà! Yé basi yẹwhe sika tọn de na yede!+
32 Ṣigba todin, eyin hiẹ jlo, jo ylando yetọn na yé;+ eyin e ma yinmọ, jaale bo súnsún yinkọ ṣie sẹ̀ sọn owe towe he hiẹ ko kàn mẹ.”+
33 Ṣigba, Jehovah dọna Mose dọmọ: “Oyín mẹhe waylando do mi lẹ tọn wẹ yẹn na súnsún sẹ̀ sọn owe ṣie mẹ.
34 Yì todin bo plan mẹlọ lẹ yì fihe yẹn ko dọho etọn na we. Pọ́n! Angẹli ṣie na jẹnukọnna we,+ podọ to azán he gbè yẹn na hẹn yé nado dogbè, yẹn na sayana yé na ylando yetọn wutu.”
35 Jehovah sọ jẹ azọ̀nylankan yí do hò mẹlọ lẹ ji na yé ko basi oyìnvu lọ wutu, yèdọ ehe Aalọn basi lọ.
Nudọnamẹ Odò Tọn
^ Kavi “boṣiọ kinkọ̀n.”
^ Kavi “boṣiọ kinkọ̀n.”
^ To paa mẹ, “okọ̀ sinsinyẹnnọ.”
^ Kavi “hẹn nukunmẹ Jehovah Jiwheyẹwhe etọn tọn bọ̀.”
^ Kavi “bo gbọ e ni vẹna we.”
^ To paa mẹ, “okún.”
^ To paa mẹ, “okún.”
^ Kavi “e vẹna Jehovah.”
^ Kavi “nuyiwa huhlọnnọ.”
^ To paa mẹ, “Mì hẹn alọ mìtọn gọ́.”
