Eksọdusi 35:1-35
35 Enẹgodo, Mose bẹ Islaelivi lẹpo pli bo dọna yé dọmọ: “Nuhe Jehovah ko degbe etọn nado wà lẹ die:+
2 Azán ṣidopo wẹ mì na nọ wazọ́n na, ṣigba azán ṣinawetọ na yin onú wiwe de na mì, yèdọ gbọjẹzan gbọjẹ mlẹnmlẹn tọn de hlan Jehovah.+ Mẹdepope he wazọ́n to azán enẹ gbè dona yin hùhù.+
3 Mì ma dona flọ miyọ́n to fihe mì nọ nọ̀ lẹ depope to Gbọjẹzangbe.”
4 Mose sọ dọna Islaelivi lẹpo dọmọ: “Nuhe Jehovah ko degbe etọn die,
5 ‘Mì ṣinyan nunina lẹ pli to mìdelẹ ṣẹnṣẹn na Jehovah.+ Mì gbọ mẹdepope he tindo ojlo+ ni hẹn onú ehelẹ wá taidi nunina de na Jehovah: sika, fataka, gànvẹẹ,
6 sekan juju, sekan sopẹ́-sinmẹnọ, sekan vẹẹ ṣẹ́ṣẹ́, alavọ dagbedagbe, gbọgbọẹ-fún,+
7 agbò-yú vẹẹ, kanlin-yú,* owhlẹ akasia tọn,
8 amì na miyọ́ngbán lẹ, balsami* na amì mẹdide tọn po nuyọnwan owán gblingblinnọ po,+
9 zannu onizi tọn lẹ, gọna zannu devo he na yin tito do efọdi*+ po apò akọ́nnu tọn*+ lọ po go lẹ.
10 “‘Mì gbọ mẹhe yin azọ́nyọnẹntọ*+ to mì mẹ lẹ ni wá bo basi nuhe Jehovah ko degbe etọn lẹpo,
11 enẹ wẹ, gòhọtúntún lọ po gòhọ etọn lẹ po gọna avọ̀ he na yin ṣinṣinyọn do e ji, oplánú etọn lẹ po owhlẹ ote tọn etọn lẹ po, opò etọn lẹ, dòtin etọn lẹ po oslò dodonu tọn etọn lẹ po;
12 Apotin+ lọ po opò+ etọn lẹ po, nùsu+ lọ po avọ̀+ he nọ yin dido do họntonu gòhọ lọ tọn po;
13 tafo+ lọ po opò etọn lẹ po gọna nuyizan etọn lẹpo po akla sọhia tọn+ lọ po;
14 miyọ́ngbán-tin+ po nuyizan etọn lẹ po gọna miyọ́ngbán lẹ po amì po nado na hinhọ́n;+
15 agbà nuyọnwan tọn+ po opò etọn lẹ po; amì mẹdide tọn po nuyọnwan owán gblingblinnọ po;+ avọ̀* he nọ yin dido do họntonu gòhọtúntún lọ tọn;
16 agbà avọ́nunina mimẹ̀ tọn+ po agbájẹ́ gànvẹẹ tọn etọn po, opò etọn lẹ po nuyizan etọn lẹpo po; basia lọ po nuhe ji e na yin zizedo po;+
17 avọ̀ he na yin dido lẹdo awánu lọ,+ dòtin etọn lẹ po oslò dodonu tọn etọn lẹ po; avọ̀* he nọ yin dido do họngbo awánu lọ tọn nù;
18 opò tlọ́ntlọ́n gòhọtúntún lọ tọn po opò tlọ́ntlọ́n awánu lọ tọn lẹ po gọna okàn yetọn lẹ;+
19 awù linlọ̀n dagbedagbe+ lẹ na sinsẹ̀nzọnwiwa to fiwiwe lọ, awù wiwe lẹ na Aalọn+ yẹwhenọ lọ podọ awù visunnu etọn lẹ tọn he yé na nọ yizan nado sẹ̀n taidi yẹwhenọ lẹ.’”
20 Whenẹnu wẹ Islaelivi lẹpo tọ́nyi sọn Mose nukọn.
21 Enẹgodo, mẹhe ahun yetọn sisẹ́ yé lẹpo po mẹhe gbigbọ yetọn whàn yé lẹpo+ po wá bo hẹn nunina yetọn lẹ wá na Jehovah nado yin yiyizan to gòhọ opli tọn lọ mẹ podọ na sinsẹ̀nzọn he nọ yin wiwà to gòhọ lọ mẹ lẹpo podọ na awù wiwe lọ lẹ.
22 Sunnu lẹ po yọnnu lẹ po to wiwá bọ dopodopo yetọn sọ to aṣọ́donu he nọ nọ̀ avọ̀ go lẹ, tómẹnu lẹ, alọkẹ lẹ po aṣọ́donu devo lẹ po gọna núzinzan sika tọn wunmẹ lẹpo hẹnwa sọn ojlo mẹ wá. Yemẹpo wẹ na avọ́nunina* sika tọn lẹ Jehovah.+
23 Mẹlẹpo he tindo sekan juju, sekan sopẹ́-sinmẹnọ, sekan vẹẹ ṣẹ́ṣẹ́, alavọ dagbedagbe, gbọgbọẹ-fún, agbò-yú vẹẹ po kanlin-yú lẹ po sọ hẹn yé wá.
24 Mẹhe na nunina fataka po gànvẹẹ po tọn lẹpo hẹn nunina wá na Jehovah, bọ mẹhe tindo owhlẹ akasia tọn na adà azọ́n lọ tọn depope sọ hẹn ẹn wá.
25 Yọnnu azọ́nyọnẹntọ lẹpo+ yí alọ yetọn do gbẹ̀n sekan bosọ hẹn nuhe yé ko basi lẹ wá: sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ dagbedagbe po.
26 Yọnnu azọ́nyọnẹntọ he ahun yetọn whàn yé lẹpo sọ yí gbọgbọẹ-fún lọ lẹ do gbẹ̀n sekan.
27 Ahọvi lẹ sọ hẹn zannu onizi tọn po zannu devo he na yin tito do efọdi po apò akọ́nnu tọn lọ po go+ lẹ po wá,
28 gọna balsami,* amì miyọ́ngbán tọn, amì mẹdide tọn+ po nuyọnwan owán gblingblinnọ po.+
29 Sunnu po yọnnu po he ahun yetọn whàn yé lẹpo hẹn nude wá na azọ́n he Jehovah ko degbe etọn na yé nado wà gbọn Mose dali; Islaelivi lẹ sọ hẹn onú ehelẹ wá taidi nunina sọn ojlo mẹ wá na Jehovah.+
30 Mose sọ dọna Islaelivi lẹ dọmọ: “Mì pọ́n, Jehovah ko de Bezalẹli visunnu Uli, he yin visunnu Huuli tọn, sọn hẹnnu Juda tọn mẹ.+
31 Ewọ ko na ẹn gbigbọ Jiwheyẹwhe tọn, nuyọnẹn, nukunnumọjẹnumẹ po oyọnẹn po na alọnuzọ́nwiwa wunmẹ lẹpo
32 podọ na anazọ́nwiwa, nado nọ yí sika, fataka po gànvẹẹ po zan,
33 nado nọ pà zannu lẹ bo nọ to yé podọ nado nọ basi nuyizan owhlẹ tọn wunmẹ lẹpo.
34 E ko sọ yí do ahun ewọ po Oholiabi visunnu Ahisamaki tọn po mẹ nado plọnazọ́n mẹdevo lẹ, yèdọ Oholiabi+ he sọn hẹnnu Dani tọn mẹ.
35 Ewọ ko hẹn yé pegan*+ nado wà alọnuzọ́n wunmẹ lẹpo, yèdọ azọ́n avọ̀lọ̀ntọ po avọ̀-kótọ tọn po gbọn sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ dagbedagbe po yiyizan dali. Omẹ ehelẹ wẹ na wazọ́n wunmẹ lẹpo bosọ wleawuna anazọ́n wunmẹ lẹpo.
Nudọnamẹ Odò Tọn
^ Enẹ wẹ, ayú kanlin he nọ nọ̀ hùmẹ de tọn.
^ Enẹ wẹ, apò he nọ yin kikó he Yẹwhenọ Daho nọ zedo akọ́nnu.
^ To paa mẹ, “yin nuyọnẹntọ to ahun mẹ.”
^ Kavi “họmẹgbòvọ̀.”
^ Kavi “họmẹgbòvọ̀.”
^ Kavi “avọ́nunina he yè mimí.”
^ To paa mẹ, “hẹn yé gọ́ na nuyọnẹn to ahun mẹ.”
