Eksọdusi 4:1-31
4 Ṣigba, Mose gblọn dọmọ: “Eyin yé ma ka yí ohó ṣie sè bo masọ dotoaina ogbè ṣie lo,+ bo dọ dọ, ‘Jehovah ma sọawuhia we.’”
2 Enẹwutu, Jehovah dọna ẹn dọmọ: “Etẹwẹ yin enẹ he to alọ towe mẹ?” E gblọn dọmọ: “Opò de wẹ.”
3 E sọ dọmọ: “Ze e dlan kọmẹ.” E sọ ze e dlan kọmẹ, bọ e lẹzun odàn de;+ Mose sọ họ̀n sọn e kọ̀n.
4 Whenẹnu wẹ Jehovah dọna Mose dọmọ: “Dlẹnalọ towe bo hẹn osi etọn go.” E sọ dlẹnalọ bo hẹn e go, e sọ lẹzun opò de to alọ etọn mẹ.
5 Enẹgodo, Jiwheyẹwhe dọmọ: “Gbọnmọ dali, yé na yise dọ Jehovah Jiwheyẹwhe tọgbo yetọn lẹ tọn, yèdọ Jiwheyẹwhe Ablaham tọn, Jiwheyẹwhe Isaki tọn po Jiwheyẹwhe Jakọbu tọn+ po ko sọawuhia we.”+
6 Jehovah sọ dọna ẹn whladopo dogọ dọmọ: “Jaale, ze alọ towe do yínyẹ́n aga tọn tewu towe tọn mẹ.” E sọ ze alọ etọn do yínyẹ́n tewu etọn tọn mẹ. Whenue e de e tọ́n, doayi e go, e ko bẹ pòzọ̀n do alọ go bọ alọ etọn sọ wé di osin-agó!+
7 Whenẹnu wẹ e dọmọ: “Gọ̀ alọ towe do yínyẹ́n aga tọn tewu towe tọn mẹ.” E sọ gọ̀ alọ etọn do tewu etọn mẹ. Whenue e de alọ etọn tọ́n sọn tewu lọ mẹ, e ko gọ̀ jẹ otẹn etọn mẹ bo taidi pipotọ agbasa etọn tọn!
8 E sọ dọmọ: “Eyin yé ma tlẹ yí ohó towe sè kavi na ayidonugo ohia tintan, e họnwun dọ yé na kẹalọyi ohia he bọdego.+
9 Etomọṣo, eyin yé ma tlẹ kẹalọyi ohia awe ehelẹ bo gbẹ́ nado dotoaina ogbè towe, hiẹ na ba osin vude sọn Tọ̀sisa Nile tọn mẹ bo nasọ kọ̀n ẹn do aigba húhú ji, osin he hiẹ ba sọn Nile mẹ lọ nasọ lẹzun ohùn to aigba húhú ji.”+
10 Mose sọ dọna Jehovah dọmọ: “Yẹn vẹ̀ we, Jehovah, yẹn ma ko didẹ́ gbede, yèdọ sọn ojlẹ he wayi lẹ mẹ kavi sọn whenue hiẹ ko dọho hẹ devizọnwatọ towe, na yẹn yin dẹ́kúnọ* bo masọ didẹ́.”+
11 Jehovah dọna ẹn dọmọ: “Mẹnu wẹ basi onù na gbẹtọ kavi mẹnu wẹ nọ hẹn mẹde zun unbọpẹnnọ, tókunọ, mẹhe nọ mọnú ganji kavi nukuntọ́nnọ? Be e ma yin yẹn Jehovah wẹ?
12 Enẹwutu, yì todin, yẹn na tin hẹ we dile hiẹ na to hodọ* bo nasọ plọn we nuhe hiẹ na dọ.”+
13 Ṣigba, e dọmọ: “Yẹn vẹ̀ we Jehovah, jaale do mẹdevo depope he hiẹ jlo hlan.”
14 Jehovah sọ gblehomẹ sinsinyẹn do Mose go bo dọmọ: “Etẹwẹ dogbọn nọvisunnu towe Aalọn+ Levinu lọ dali? Yẹn yọnẹn dọ e didẹ́ ganji. Podọ ewọ ko to aliji nado wá dè we. Whenue e na mọ we, homẹ etọn na hùn.+
15 Enẹwutu, hiẹ dona dogbè na ẹn bosọ dọ nuhe ewọ na dọ lẹ na ẹn,+ yẹn nasọ tin hẹ we podọ hẹ ewọ ga dile hiẹ na to hodọ,+ yẹn nasọ plọn mì nuhe mì na wà.
16 Ewọ na dọhona gbẹtọ lọ lẹ do otẹn towe mẹ, bo na yin hoyidọtọ towe, hiẹ nasọ yinuwa taidi Jiwheyẹwhe* na ẹn.+
17 Hiẹ nasọ yí opò he to alọ towe mẹ ehe do basi ohia lẹ.”+
18 Enẹwutu, Mose lẹkọyi Jẹtlo asi-tọ́ etọn+ dè bo dọna ẹn dọmọ: “Jaale, yẹn jlo na lẹkọyi nọvisunnu ṣie he tin to Egipti lẹ dè nado yọnẹn eyin yé gbẹ́ pò togbẹ̀.” Jẹtlo sọ dọna Mose dọmọ: “Yì to jijọho mẹ.”
19 Enẹgodo, Jehovah dọna Mose to Midiani dọmọ: “Lẹkọyi Egipti, na mẹhe to dindin nado hù we* lẹpo ko kú.”+
20 Whenẹnu wẹ Mose plan asi etọn po visunnu etọn lẹ po bo bẹ yé do kẹtẹkẹtẹ de ji, e sọ lẹkọ dedo aigba Egipti tọn ji. Mose sọ hẹn opò Jiwheyẹwhe nugbo lọ tọn to alọ etọn mẹ.
21 Jehovah sọ dọna Mose dọmọ: “To whenue hiẹ na ko lẹkọyi Egipti godo, hẹn ẹn diun dọ hiẹ basi azọ́njiawu he yẹn ko na huhlọn we nado basi lẹpo to Falo nukọn.+ Ṣigba, yẹn na dike ahun etọn ni sinyẹn,+ podọ ewọ ma na tún mẹlọ lẹ dote.+
22 Hiẹ dona dọna Falo dọ, ‘Nuhe Jehovah dọ die: “Visunnu ṣie wẹ Islaeli yin, yèdọ plọnji ṣie.+
23 Yẹn dọna we dọ, Tún visunnu ṣie dote na e nido sọgan yì sẹ̀n mi. Ṣigba, eyin hiẹ gbẹ́ nado tún in dote, yẹn na hù visunnu towe, yèdọ plọnji towe.”’”+
24 To gbọjẹtẹn de to aliho lọ ji, Jehovah*+ pé e bo to dindin nado hù i.+
25 Zipola+ sọ ze osé didá* de bo gboadà na visunnu etọn bosọ yí ayú tintan vijinu visunnu lọ tọn do afọ etọn go bo dọmọ: “Na asisunọ yọyọ ohùn tọn de wẹ hiẹ yin na mi wutu.”
26 Enẹwutu, E jo e do bọ e yì. Whenẹnu wẹ Zipola dọ dọ, “asisunọ yọyọ ohùn tọn,” na adàgbigbo wutu.
27 Jehovah sọ dọna Aalọn dọmọ: “Yì danfafa ji nado yì pé Mose.”+ Enẹwutu, e dedo bo pé e to osó Jiwheyẹwhe nugbo lọ tọn+ ji bosọ donùnùgo na ẹn.
28 Mose sọ dogbè nuhe Jehovah dọ lẹpo tọn na Aalọn, yèdọ mẹhe ko do e hlan,+ gọna ohia he E ko degbena ẹn nado basi lẹpo.+
29 Enẹgodo, Mose po Aalọn po yì bo bẹ mẹho Islaelivi lẹ tọn lẹpo pli.+
30 Aalọn sọ dogbè nuhe Jehovah ko dọna Mose lẹpo tọn na yé, podọ e sọ basi ohia+ lọ lẹpo to nukun mẹlọ lẹ tọn mẹ.
31 Enẹwutu, mẹlọ lẹ yise.+ Whenue yé sè dọ Jehovah ko lẹ́ ayidonugo etọn hlan Islaelivi lẹ+ bo ko sọ mọ yajiji yetọn,+ yé dẹ́ do odò bosọ ṣinyọ́n nukunmẹ ai.
Nudọnamẹ Odò Tọn
^ To paa mẹ, “yẹn pẹ̀n sọn onù.”
^ To paa mẹ, “hẹ onù towe.”
^ Kavi “nasọ yin afọzedaitọ Jiwheyẹwhe tọn.”
^ Kavi “to alindọn towe dín.”
^ Alọnuwe delẹ dọ “angẹli Jehovah tọn.”
^ Kavi “ze ohí he yè yí osé do basi.”
