Eksọdusi 9:1-35
9 Enẹwutu, Jehovah dọna Mose dọmọ: “Yì Falo dè bo dọna ẹn dọ, ‘Nuhe Jehovah Jiwheyẹwhe Heblu lẹ tọn dọ die: “Tún omẹ ṣie lẹ dote, na yé nido yì sẹ̀n mi.+
2 Ṣigba, eyin hiẹ gbẹ́ nado tún yé dote bo ma jo yé do nado yì,
3 pọ́n! Jehovah na yinuwa+ sọta kanlin-yìnyìn towe lẹ to danji. Azọ̀nylankan nuvasudo tọn+ de nasọ wá osọ́ towe lẹ, kẹtẹkẹtẹ towe lẹ, kanklosọ́ towe lẹ, kanlinpa towe lẹ po lẹngbọpa towe lẹ po ji.
4 Podọ e họnwun dọ Jehovah na hẹn vogbingbọn de tin to kanlin-yìnyìn Islaelivi lẹ tọn lẹ po kanlin-yìnyìn Egiptinu lẹ tọn lẹ po ṣẹnṣẹn, nudepope he yin Islaelivi lẹ tọn ma na kú.”’”+
5 Humọ, Jehovah ko de ojlẹ de dọmọ: “Jehovah na wà ehe to aigba lọ ji to osọ.”
6 Jehovah sọ wàmọ to azán he bọdego lọ gbè, bọ kanlin-yìnyìn Egiptinu lẹ tọn wunmẹ lẹpo jẹ kúkú ji,+ ṣigba dopo tata to kanlin-yìnyìn Islaelivi lẹ tọn mẹ ma kú.
7 To whenue Falo dindona, pọ́n! depope to kanlin-yìnyìn Islaelivi lẹ tọn lẹ mẹ ma kú. Etomọṣo, Falo gbẹ́ pò to ahun etọn hẹn sinyẹn, bo masọ tún mẹlọ lẹ dote.+
8 Enẹgodo, Jehovah dọna Mose po Aalọn po dọmọ: “Mì ba afín sọn adò de mẹ gọ́ alọ mìtọn awe lẹ, podọ Mose ni dlan ẹn do jẹhọn mẹ to Falo nukọn.
9 E nasọ lẹzun afínfín gbọn aigba Egipti tọn pete ji, e nasọ lẹzun nutitẹ̀ fifiẹ to gbẹtọ lẹ po kanlin lẹ po go to aigba Egipti tọn lẹpo ji.”
10 Enẹwutu, yé ba afín sọn adò de mẹ bo nọte to Falo nukọn, Mose sọ fú i hlan jẹhọn mẹ, e sọ lẹzun nutitẹ̀ fifiẹ, bo nọ to osin tọ́n to gbẹtọ lẹ po kanlin lẹ po go.
11 Yẹwhenọ nujlẹtọ lẹ masọ penugo nado nọte to Mose nukọn ba, na nutitẹ̀ he ko tọ́n do yewlẹ po Egiptinu lẹpo po go wutu.+
12 Ṣigba, Jehovah dike ahun Falo tọn ni sinyẹn, e masọ dotoaina yé, kẹdẹdile Jehovah ko dọna Mose do.+
13 Jehovah sọ dọna Mose dọmọ: “Fọ́n to afọnnu fuu bo yì Falo nukọn bo dọna ẹn dọ, ‘Nuhe Jehovah Jiwheyẹwhe Heblu lẹ tọn dọ die: “Tún omẹ ṣie lẹ dote, na yé nido yì sẹ̀n mi.
14 Todin, yẹn na yí azọ̀nylankan lẹ do hò hiẹ, devizọnwatọ towe lẹ po omẹ towe lẹ po, na hiẹ nido yọnẹn dọ yẹn nkọ de ma tin to aigba lọ pete ji.+
15 Na kakajẹ din, yẹn dona ko dlẹnalọ ṣie nado yí azọ̀nylankan nuvasudo tọn de do hò hiẹ po omẹ towe lẹ po, bọ mìwlẹ na ko yin vivasudo* sọn aigba lọ ji.
16 Ṣigba, na ehe wutu wẹ yẹn ko hẹn we dogbẹ̀: nado sọgan do huhlọn ṣie hia we podọ na oyín ṣie nido yin lilá to aigba lẹpo ji.+
17 Be hiẹ gbẹ́ pò to nuyiwa hẹ omẹ ṣie lẹ po sakla po gbọn gbigbẹ́ nado tún yé dote dali wẹ?
18 Todin, yẹn na ja kẹ́njikun sinsinyẹn de do aigba lọ ji to osọ to ojlẹ ehe mẹ, ehe nkọ ma ko ja pọ́n to Egipti sọn azán he gbè e ko yin didoai kakajẹ din.
19 Enẹwutu, degbe dọ kanlin-yìnyìn towe lẹ po nuhe yin towe to danji lẹpo po ni yin pinplan yì họsa. Gbẹtọ kavi kanlin depope he gbọṣi danji bo ma yin hinhẹn yì họsa na kú to whenuena kẹ́njikun lọ na ja do yé ji.”’”
20 Devizọnwatọ Falo tọn he dibusi ohó Jehovah tọn lẹ yawu yì plan devizọnwatọ yetọn titi lẹ po kanlin-yìnyìn yetọn lẹ po yì họsa,
21 ṣigba mẹhe ma setonuna ohó Jehovah tọn lẹ jo devizọnwatọ po kanlin-yìnyìn yetọn lẹ po do danji.
22 Jehovah sọ dọna Mose dọmọ: “Dlẹnalọ towe hlan olọn, na kẹ́njikun nido ja do aigba Egipti tọn pete ji,+ yèdọ do gbẹtọ, kanlin po ogbé danji tọn he to aigba Egipti tọn ji lẹ po pete ji.”+
23 Enẹwutu, Mose dlẹn opò etọn hlan olọn, Jehovah sọ do hẹviosò, kẹ́njikun po miyọ́n* po hlan aigba ji, Jehovah sọ hẹn kẹ́njikun ja do aigba Egipti tọn ji.
24 Kẹ́njikun sọ ja bọ miyọ́n sọ to gbigbòdlán gbọn kẹ́njikun lọ mẹ. E sinyẹn tlala; podọ kẹ́njikun mọnkọtọn ma ko ja pọ́n to aigba Egipti tọn ji sọn whenue gbọ́n e ko lẹzun akọta de.+
25 Kẹ́njikun lọ sọ hù nuhe to danji lẹpo to aigba Egipti tọn pete ji, bẹsọn gbẹtọ ji jẹ kanlin ji, e sọ hù ogbé lẹpo sudo bosọ gídí atin danji tọn lẹpo.+
26 Aigba Goṣẹni tọn, fie Islaelivi lẹ tin te kẹdẹ ji wẹ kẹ́njikun lọ ma ja te.+
27 Enẹwutu, Falo dowẹn hlan Mose po Aalọn po bo dọna yé dọmọ: “Yẹn ko waylando todin. Jehovah wẹ dodonọ, podọ yẹn po omẹ ṣie lẹ po ko waylan.
28 Mì vẹ̀ Jehovah na hẹviosò po kẹ́njikun lọ po ni doalọte. Yẹn nasọ tún mì dote, bọ mì ma nasọ gbọṣi file ba.”
29 Mose sọ dọna ẹn dọmọ: “Tlolo he yẹn na tọ́n sọn tòdaho lọ mẹ, yẹn na dlẹnalọ ṣie lẹ hlan Jehovah. Hẹviosò lọ nasọ doalọte bọ kẹ́njikun lọ nasọ kẹ̀n, na hiẹ nido yọnẹn dọ Jehovah tọn wẹ aigba.+
30 Ṣigba, na nuhe dù hiẹ po devizọnwatọ towe lẹ po, yẹn yọnẹn dọ mahopọnna enẹ, mìwlẹ ma na dibusi Jehovah Jiwheyẹwhe.”
31 Todin, sekan-tin* po balekun po ko yin huhusudo, na balekun ko biapa bọ sekan ko gbàsẹ́.
32 Ṣigba, sinsẹ́n likun* tọn lẹ ma yin huhusudo, na sinsẹ́n yetọn gbọwhenu* wutu.
33 Mose sọ tọ́n sọn tòdaho lọ mẹ sọn Falo nukọn bo dlẹnalọ etọn lẹ hlan Jehovah, hẹviosò po kẹ́njikun lọ po sọ doalọte bọ jikun lọ kẹ̀n.+
34 To whenue Falo mọdọ jikun lọ, kẹ́njikun lọ po hẹviosò lọ po ko doalọte, e sọ waylando whladopo dogọ bo hẹn ahun etọn sinyẹn,+ yèdọ ewọ po devizọnwatọ etọn lẹ po.
35 Falo sọ to ahun etọn hẹn sinyẹn deji bo ma tún Islaelivi lẹ dote, kẹdẹdile Jehovah ko dọ gbọn Mose gblamẹ do.+
Nudọnamẹ Odò Tọn
^ Kavi “sinsánsẹ.”
^ Vlavo ehe to alọdlẹndo abì sinsinyẹn.
^ Atin de he nọ yin dido sọn hohowhenu. Ehe okàn etọn nọ yin yiyizan nado lọ̀n avọ̀.
^ To Heblugbe mẹ, likun wunmẹ awe wẹ yin nùdego tofi, dopo to yé mẹ yìdo hugan awetọ bo nọ yin dido to Egipti hohowhenu tọn.
^ Kavi “na yé ma yawu sẹ́n.”
