Ezekiẹli 19:1-14
-
Avihàn na ahọvi Islaeli tọn lẹ (1-14)
19 “Hiẹ na ji avihàn* de gando ahọvi Islaeli tọn lẹ go,
2 bo dọmọ,‘Etẹwẹ onọ̀ towe yin? Kinnikinni asi de to kinnikinni lẹ ṣẹnṣẹn.
E mlọn kinnikinni winyanwinyan huhlọnnọ lẹ ṣẹnṣẹn bo penukundo ovi etọn lẹ go.
3 E penukundo dopo to ovi etọn lẹ mẹ go bọ e lẹzun kinnikinni winyanwinyan huhlọnnọ de.+
E sọ plọn nado nọ tlẹ́n nuhe e wle lẹ,E tlẹ nọ tlẹ́n gbẹtọvi lẹ dù.
4 Akọta lẹ sè linlin etọn bo wle e to odò yetọn mẹ,Yé sọ yí omlẹn lẹ do hẹn ẹn wá aigba Egipti tọn ji.+
5 E nọte bo wá doayi e go to godo mẹ dọ todido kọlilẹ wá whé tọn depope ma tin na ẹn.
Enẹwutu, e yí ovi etọn devo bo do e hlan taidi kinnikinni winyanwinyan huhlọnnọ de.
6 E sọ nọ dánpe gbọn kinnikinni lẹ ṣẹnṣẹn bo lẹzun kinnikinni winyanwinyan huhlọnnọ de.
E sọ plọn nado nọ tlẹ́n nuhe e wle lẹ bo tlẹ nọ tlẹ́n gbẹtọvi lẹ dù.+
7 E yangbé gbọn atọ̀họ̀ gángán he mẹ yé nọ nọ̀ lẹ gblamẹ bosọ và tòdaho yetọn lẹ sudo,Sọmọ bọ gbigbó etọn gbàpe gbọn aigba he jẹvọ́ lọ ji.+
8 Akọta he wá sọn agbegbe he lẹdo e lẹ mẹ lẹ diọnukunsọ ẹ bo yìn odọ̀ yetọn ṣinyọ́n e ji,Ewọ sọ yin wiwle to odò yetọn mẹ.
9 Yé yí omlẹn lẹ do ze e do ajà de mẹ, yé sọ hẹn ẹn wá ahọlu Babilọni tọn dè.
Yé sọ glọn ẹn do finẹ bọ ogbè etọn ma nasọ yin sisè to osó Islaeli tọn lẹ ji ba.
10 Onọ̀ towe taidi vẹntin de+ to ohùn towe mẹ,* he yin dido do tọ̀tó.
E sẹ́n bo zẹ̀alà susu na e mọ osin susu wutu.
11 E zẹ̀alà* titli lẹ he sọgan yin yiyizan na ogánpò gandutọ lẹ tọn.
E whẹ́n bo ṣinyọnyẹ atin he pò lẹ jiE sọ tọ́nta na tedidi etọn wutu, podọ na amà susu etọn lẹ wutu.
12 Ṣigba, ewọ yin hinhọ̀n sẹ̀ po adi po+ bo yin zizedlan kọmẹ,Jẹhọn whèzẹtẹn tọn de sọ hú sinsẹ́n etọn lẹ.
Alà titli etọn lẹ yin finfẹ́n bo hú+ bọ miyọ́n sọ fiọ yé.+
13 Todin, e yin dido do danfafa ji,Do aigba húhú, yèdọ akú tọn de ji.+
14 Miyọ́n lọ dlẹnkan sọn alà* etọn lẹ ji bo fiọ nùfẹ́ etọn lẹ po sinsẹ́n etọn lẹ po,Alà titli depope masọ pò nado yin yiyizan na ogánpò gandudu tọn.+
“‘Avihàn de wẹ ehe bo nasọ yin yiyizan taidi avihàn de.’”
Nudọnamẹ Odò Tọn
^ Kavi “ohàn aluẹmẹninọ tọn.”
^ Kavi vlavo, “taidi vẹntin de to vẹngle towe mẹ.”
^ Kavi “wleawuna opò.”
^ Kavi “opò.”
