Ezekiẹli 29:1-21
29 To azán 12tọ osun aotọ he yin owhe aotọ tọn mẹ, ohó Jehovah tọn wá dè e dọmọ:
2 “Visunnu gbẹtọ tọn, lẹ́ pànta Falo ahọlu Egipti tọn bo dọ dọdai sọta ewọ podọ sọta Egipti pete.+
3 Dọ ohó ehelẹ na ẹn: ‘Nuhe Oklunọ Nupojipetọ Jehovah dọ die:
“Yẹn na diọnukunsọ we, hiẹ Falo ahọlu Egipti tọn,+He yin nudazi hùmẹ tọn he mlọnai to osinwhín Nile* tọn lẹ mẹ,+He ko dọ dọ, ‘Ṣie wẹ Tọ̀sisa Nile tọn.
Yẹn wẹ basi i na dee.’+
4 Ṣigba, yẹn na yí omlẹn lẹ do aglàn towe mẹ bo na hẹn whèvi he to Nile towe mẹ lẹ nado tẹdo ofló towe lẹ go.
Yẹn na dọ̀n we tọ́n sọn Nile towe mẹ to pọmẹ hẹ whèvi Nile tọn lẹpo he tẹdo ofló towe lẹ go.
5 Yẹn na jo we do danfafa ji, yèdọ hiẹ po whèvi he to Nile towe mẹ lẹpo po.
Hiẹ na jai jẹ danji, a ma nasọ yin bibẹpli kavi yin ṣinṣinyan pli dopọ gba.+
Yẹn na yí we do basi núdùdù na gbekanlin aigba ji tọn lẹ po ohẹ̀ agahomẹ tọn lẹ po.+
6 To whenẹnu, mẹhe to Egipti lẹpo na yọnẹn dọ yẹn wẹ Jehovah,Na núyọ* de poun go wẹ owhé Islaeli tọn ko ganjẹ.+
7 Whenue yé na hẹn alọ towe go, yé na gídí we,Hiẹ nasọ hẹn yé nado gbleawu to abọ́ ta.
Whenue yé na dẹ́ do ji we, hiẹ na gbà hányán,Afọ* yetọn lẹ nasọ sisọ na hiẹ tọn wutu.”+
8 “‘Enẹwutu, nuhe Oklunọ Nupojipetọ Jehovah dọ die: “Yẹn na hẹn ohí de wá ji we,+ yẹn nasọ sán gbẹtọ po kanlin po sẹ̀ sọn hiẹ mẹ.
9 Aigba Egipti tọn nasọ gbọgbé bo jẹvọ́;+ yé nasọ yọnẹn dọ yẹn wẹ Jehovah, na hiẹ* ko dọ dọ, ‘Ṣie wẹ Tọ̀sisa Nile tọn; yẹn wẹ basi i.’+
10 Enẹwutu, yẹn na diọnukunsọ hiẹ po Nile towe po, yẹn nasọ hẹn aigba Egipti tọn jẹvọ́ bo na hẹn ẹn zun ofi húhú de,+ yèdọ aigba gbọgbé de, sọn Migdoli+ yì Siene+ kakajẹ dogbó Etiopia tọn kọ̀n.
11 Gbẹtọ kavi kanlin depope ma na zinzọnlin gbọn e ji,+ mẹde ma nasọ nọ e ji na owhe 40.
12 Yẹn na hẹn aigba Egipti tọn zun aigba he gbọgbé hugan to aigba lẹ mẹ, podọ tòdaho etọn lẹ zun tòdaho he gbọgbé hugan to tòdaho lẹ mẹ na owhe 40;+ yẹn na vúnvún Egiptinu lẹ pé gbọn akọta lẹ mẹ bo nasọ gbà yé pé gbọn aigba lẹ ji.”+
13 “‘Na nuhe Oklunọ Nupojipetọ Jehovah dọ die: “To owhe 40 godo, yẹn na vọ́ Egiptinu lẹ bẹpli sọn akọta he mẹ yè ko vúnvún yé pé gbọn lẹ;+
14 yẹn na hẹn Egiptinu he yin kanlinmọ lẹ gọwá aigba Patlosi tọn ji,+ yèdọ wá otò yetọn mẹ, yé nasọ lẹzun ahọluduta he ma sọtẹ́n de.
15 Egipti na yìdo hú ahọluduta he pò lẹ, e ma nasọ dugán do akọta he pò lẹ ji ba,+ yẹn na hẹn yé whè sọmọ bọ yé ma na penugo nado nọ duto akọta devo lẹ ji ba.+
16 E ma nasọ yin asisa jidide tọn de na owhé Islaeli tọn gbede ba,+ ṣigba ehe na nọ flinnu yé poun dọ onú wẹ yé ṣiwà to whenue yé lẹhlan Egiptinu lẹ na alọgọ. Yé nasọ yọnẹn dọ yẹn wẹ Oklunọ Nupojipetọ Jehovah.”’”
17 Todin, to owhe 27tọ mẹ, to azán tintan osun tintan tọn mẹ, ohó Jehovah tọn wá dè e dọmọ:
18 “Visunnu gbẹtọ tọn, Ahọlu Nẹbukadnẹzali*+ Babilọni tọn funawhàn sọta Tile sinsinyẹn.+ Ota lẹpo wẹ yin whiwhlẹ́, podọ abọ́ lẹpo go wẹ apà jẹ. Ṣigba, ewọ po awhànpa etọn po ma mọ azọ́nkuẹ depope yí na nuhe e wà sọta Tile.
19 “Enẹwutu, nuhe Oklunọ Nupojipetọ Jehovah dọ die, ‘Yẹn na yí aigba Egipti tọn na Ahọlu Nẹbukadnẹzali* Babilọni tọn,+ e nasọ bẹ adọkunnu etọn lẹ po ogblànnu susu po yì sọn e mẹ; ehe nasọ lẹzun azọ́nkuẹ de na awhànpa etọn.’
20 “‘Taidi ahọsumẹ de na nuyiwa etọn sọta Tile, yẹn na na ẹn aigba Egipti tọn, na yẹn wẹ yé yilizọn na,’+ wẹ Oklunọ Nupojipetọ Jehovah dọ.
21 “To gbenẹgbe, yẹn na hẹn azò de tọ́n na owhé Islaeli tọn*+ bo na hùn dotẹnmẹ dote na we nado dọho to ṣẹnṣẹn yetọn; yé nasọ yọnẹn dọ yẹn wẹ Jehovah.”
Nudọnamẹ Odò Tọn
^ Tofi podọ to odò, “Nile” to alọdlẹndo tọ̀sisa lọ po osinwhín etọn lẹ po.
^ To paa mẹ, “ofán.”
^ To paa mẹ, “Alinkàn.”
^ To paa mẹ, “ewọ.”
^ To paa mẹ, “Nẹbukadlẹzali,” wunmẹ yinkọ lọ tọn devo.
^ To paa mẹ, “Nẹbukadlẹzali,” wunmẹ yinkọ lọ tọn devo.
^ Kavi “yẹn na na huhlọn owhé Islaeli tọn.”
