Ezekiẹli 30:1-26
30 Ohó Jehovah tọn sọ vọ́ wá dè e dọmọ:
2 “Visunnu gbẹtọ tọn, dọ dọdai bo dọ, ‘Nuhe Oklunọ Nupojipetọ Jehovah dọ die:
“Do hùkluhú, bo dọ, ‘Ojé, azán lọ ja!’
3 Na azán lọ ko sẹpọ, mọwẹ, azán Jehovah tọn ko sẹpọ.+
E na yin azán aslọ lẹ tọn de,+ yèdọ ojlẹ dide akọta lẹ tọn.+
4 Ohí de na wá sọta Egipti, obu nasọ jẹ Etiopia ji to whenue mẹhe yin hùhù lẹ na jai to Egipti;Bọ adọkunnu etọn lẹ na yin bibẹ yì bọ dodonu etọn lẹ nasọ yin gbigbà hányán.+
5 Etiopia,+ Puti,+ Ludi po gbẹtọgun flusọ́ lọ lẹpo* po,Gọna Kubi to pọmẹ hẹ visunnu he to aigba alẹnu tọn lọ ji lẹ,*
Yemẹpo wẹ na jai gbọn ohí lọ dali.”’
6 “Nuhe Jehovah dọ die:
‘Godonọnamẹtọ Egipti tọn lẹ lọsu na jai,Sakla etọn nasọ wá odò.’+
“‘Sọn Migdoli+ yì Siene,+ yé na jai gbọn ohí dali to aigba lọ ji,’ wẹ Oklunọ Nupojipetọ Jehovah dọ.
7 ‘Yé na yin hinhẹn zun aigba he gbọgbé hugan lẹ, tòdaho yetọn lẹ nasọ lẹzun tòdaho he jẹvọ́ hugan lẹ.+
8 Yé nasọ yọnẹn dọ yẹn wẹ Jehovah to whenue yẹn na flọ miyọ́n de to Egipti mẹ bọ otò he nọ kọngbedopọ hẹ ẹ lẹpo nasọ gbà hányán.
9 To azán enẹ gbè, yẹn na do wẹnsagun lẹ hlan gbọn tọjihun mẹ nado hẹn Etiopia he dejido ede go sisọ; obu nasọ jẹ yé ji to azán he ja Egipti ji lọ gbè, na e ma na gọ̀n.’
10 “Nuhe Oklunọ Nupojipetọ Jehovah dọ die: ‘Yẹn na hẹn opodo de wá omẹ Egipti tọn lẹ ji gbọn alọ Ahọlu Nẹbukadnẹzali* Babilọni tọn gblamẹ.+
11 Ewọ po awhànfuntọ etọn lẹ po, yèdọ mẹhe yin danuwatọ hugan to akọta lẹ mẹ,+ na yin hinhẹnwa nado và aigba lọ sudo. Yé na sún ohí yetọn lẹ sọta Egipti bọ oṣiọ mẹhe yin hùhù lẹ tọn nasọ gọ́ aigba lọ ji.+
12 Yẹn na hẹn osinwhín Nile+ tọn lẹ zun aigba húhú, yẹn nasọ sà aigba lọ na sunnu kanylantọ lẹ. Yẹn na hẹn aigba lọ jẹvọ́ bo và nuhe tin to e ji lẹpo sudo gbọn alọ jonọ lẹ tọn mẹ.+ Yẹn, Jehovah lọsu, wẹ ko dọ ẹ.’
13 “Nuhe Oklunọ Nupojipetọ Jehovah dọ die: ‘Yẹn nasọ và boṣiọ hiọawu* lọ lẹ sudo bo na hẹn opodo wá na yẹwhe Nofi* tọn lẹ.+ Ahọvi de ma nasọ tin to aigba Egipti tọn ji ba, podọ yẹn na hẹn obu wá aigba Egipti tọn ji.+
14 Yẹn na hẹn Patlosi+ gbọgbé bo na flọ miyọ́n de to Zoani mẹ bo nasọ hẹn whẹdida ṣẹ do No* ji.+
15 Yẹn na kọ̀n adi ṣie jẹgbonu do Sini ji, yèdọ figángán Egipti tọn bo na và mẹhe nọ nọ̀ No lẹ sudo.
16 To whenue yẹn na flọ miyọ́n de to Egipti mẹ; ahun Sini tọn na gbàdo, No nasọ gbà hányán, podọ Nofi* na pehẹ mẹgbeyinyan to kléwhète!
17 Dẹpẹ Oni* po Pibesẹti po tọn lẹ na jai gbọn ohí dali, tòdaho lọ lẹ nasọ yin hinhẹn yì kanlinmọgbenu.
18 Zinvlu na do to okle to Tehafnehẹsi to whenue yẹn na wẹ́n opò zẹgẹ Egipti tọn lẹ tọn.+ Sakla etọn na wá opodo,+ aslọ lẹ nasọ ṣinyọ́n ẹn podọ tòdaho etọn lẹ na yin hinhẹn yì kanlinmọgbenu.+
19 Yẹn na hẹn whẹdida ṣẹ do Egipti ji, yé nasọ yọnẹn dọ yẹn wẹ Jehovah.’”
20 To osun tintan owhe 11tọ tọn mẹ, to azán ṣinawetọ osun lọ tọn mẹ, ohó Jehovah tọn wá dè e dọmọ:
21 “Visunnu gbẹtọ tọn, yẹn ko wẹ́n awà na Falo, ahọlu Egipti tọn; awà lọ ma nasọ yin biblá na apà lọ nikaa kú kavi yin biblá po alà po bọ e nado sinyẹn sọmọ nado hẹn ohí.”
22 “Enẹwutu, nuhe Oklunọ Nupojipetọ Jehovah dọ die: ‘Yẹn na diọnukunsọ Falo, ahọlu Egipti tọn,+ yẹn nasọ wẹ́n awà etọn lẹ, yèdọ dehe to gángán po dehe ko wẹ́n lọ po,+ yẹn nasọ hẹn ohí flẹ sọn alọ etọn mẹ.+
23 Whenẹnu, yẹn na vúnvún Egiptinu lẹ pé gbọn akọta lẹ mẹ bo nasọ gbà yé pé gbọn aigba lẹ ji.+
24 Yẹn na hẹn awà* ahọlu Babilọni tọn lẹ lodo+ bo na ze ohí ṣie do alọ etọn mẹ,+ yẹn nasọ wẹ́n awà Falo tọn lẹ, ewọ nasọ yí ogbè lélé do wẹnhun to nukọn etọn* taidi mẹhe to kúdonu.
25 Yẹn na hẹn awà ahọlu Babilọni tọn lẹ lodo, ṣigba awà Falo tọn lẹ na kuyẹ̀; yé nasọ yọnẹn dọ yẹn wẹ Jehovah to whenue yẹn na ze ohí ṣie do alọ ahọlu Babilọni tọn mẹ bọ ewọ nasọ yí i zan sọta aigba Egipti tọn.+
26 Yẹn na vúnvún Egiptinu lẹ pé gbọn akọta lẹ mẹ bo nasọ gbà yé pé gbọn aigba lẹ ji,+ yé nasọ yọnẹn dọ yẹn wẹ Jehovah.’”
Nudọnamẹ Odò Tọn
^ Kavi “mẹhe wá sọn akọta devo mẹ lẹpo.”
^ Vlavo to alọdlẹndo Islaelivi he basi alẹnu hẹ Egipti lẹ.
^ To paa mẹ, “Nẹbukadlẹzali,” wunmẹ yinkọ lọ tọn devo.
^ Kavi “Mẹmfisi.”
^ Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
^ Enẹ wẹ, Tebẹsi.
^ Kavi “Mẹmfisi.”
^ Enẹ wẹ, Heliopolisi.
^ Kavi “na yidogọna huhlọn.”
^ Enẹ wẹ, to ahọlu Babilọni tọn nukọn.
