Ezekiẹli 31:1-18
-
Aijijẹ Egipti, kedali he dite lọ tọn (1-18)
31 To azán tintan osun atọ̀ntọ he yin owhe 11tọ tọn mẹ, ohó Jehovah tọn sọ vọ́ wá dè e dọmọ:
2 “Visunnu gbẹtọ tọn, dọna Falo ahọlu Egipti tọn po omẹ etọn lẹ po dọ,+‘Mẹnu wẹ hiẹ taidi to kiklo mẹ?
3 Hiẹ taidi Asilianu de, yèdọ kedali Lẹbanọni tọnHe tindo alà whanpẹnọ lẹ, podọ taidi atin de he dite bo vùn bosọ nọ na yẹtẹn;He sọ dite biọ aslọ lẹ mẹ.
4 Osin lẹ hẹn ẹn whẹ́n, asisa osin tọn he siso lẹ sọ hẹn ẹn whẹ́n yiaga taun.
Bọ osinwhín lẹ sọ lẹdo e pé to fie e yin dido do;Osinwhín etọn lẹ nọ na osin atin danji tọn lẹpo.
5 Enẹ wẹ zọ́n bọ e do whẹ́n yiaga hú atin danji tọn he pò lẹpo.
Alà daho etọn lẹ sọ sù taun podọ alà flinflin etọn lẹ dite taunNa osin susugege he to osinwhín etọn lẹ mẹ wutu.
6 Ohẹ̀ agahomẹ tọn lẹpo wẹ nọ do adọ́ yetọn lẹ do alà etọn lẹ mẹ,Gbekanlin danji tọn lẹpo sọ nọ jivi to alà etọn lẹ glọ,Podọ akọta daho lẹpo wẹ nọ nọ̀ oyẹ̀ etọn glọ.
7 E sọ klo bo yọnwhanpẹ taun bọ alà etọn lẹ vùnNa e yìn adọ̀ etọn lẹ yìdo biọ osin he sù taun lẹ mẹ wutu.
8 Atin kedali tọn devo depope to jipa Jiwheyẹwhe tọn+ mẹ ma sọgan yin yiyijlẹdo e go.
Depope to atin junipeli tọn lẹ mẹ ma tindo alà taidi i,Podọ alà atin plane tọn depope ma sọgan yin yiyijlẹdo alà etọn lẹ go.
Atin devo depope to jipa Jiwheyẹwhe tọn mẹ ma sọgan whlẹnagbà hẹ ẹ to whanpẹ mẹ.
9 Yẹn hẹn ẹn yọnwhanpẹ bọ amà etọn lẹ vùn taun,Podọ atin he pò lẹpo to Edẹni, yèdọ to jipa Jiwheyẹwhe nugbo lọ tọn mẹ, sọ nọ whànwu i.’
10 “Enẹwutu, nuhe Oklunọ Nupojipetọ Jehovah dọ die: ‘Na e* dite taun bo biọ aslọ lẹ mẹ bosọ lẹzun saklanọ na tedidi etọn wutu,
11 yẹn na jo e hlan gandutọ huhlọnnọ akọta lẹ tọn.+ Na nugbo tọn, ewọ na diọnukunsọ ẹ, yẹn nasọ gbẹ́ ẹ dai na kanyinylan etọn wutu.
12 Podọ jonọ lẹ he yin danuwatọ hugan to akọta lẹ mẹ na sán ẹn liai, yé nasọ jo e do osó lẹ ji, amà etọn lẹ nasọ ja do agbàdo lẹpo mẹ, podọ alà etọn lẹ na wẹ́n jẹ osinwhín aigba lọ tọn lẹ mẹ.+ Mẹhe to aigba lọ ji lẹpo nasọ tọ́n sọn oyẹ̀ etọn glọ bo na jo e do.
13 Ohẹ̀ agahomẹ tọn lẹpo na nọ nọ̀ atin he wẹ́n lọ ji, podọ gbekanlin danji tọn lẹpo na nọ nọ̀ alà etọn lẹ ji.+
14 Ehe na yinmọ na atin depope he sẹpọ osin nikaa whẹ́n bo dite sọmọ kavi dite biọ aslọ lẹ mẹ, podọ na atin he yè húsinna ganji depope nikaa dite plá yé. Na yemẹpo wẹ na yin jijo hlan okú, to odò glọ, to pọmẹ hẹ visunnu gbẹtọvi tọn he jei odò* mẹ lẹ.’
15 “Nuhe Oklunọ Nupojipetọ Jehovah dọ die: ‘To gbeegbe e na yì Yọdò* mẹ, yẹn na hẹn gbẹtọ lẹ biọ aluẹmẹ. To whenẹnu, yẹn na ṣinyọnnudo osin he siso taun lẹ bo na glọnalina asisa etọn lẹ sọmọ bọ tọ̀sisa lẹ ma na sà ba. Na enẹwutu, yẹn na hẹn Lẹbanọni dózin podọ atin danji tọn lẹpo nasọ fiọ.
16 To whenue akọta lẹ na sè nudidọ aijijẹ etọn tọn, yẹn na hẹn yé nado sisọ to whenue yẹn na hẹn ẹn jẹte yì Yọdò* mẹ to pọmẹ hẹ mẹhe jei odò* mẹ lẹ, atin Edẹni tọn lẹpo,+ yèdọ atin dagbe hugan Lẹbanọni tọn lẹ, enẹ wẹ dehe yè húsinna ganji lẹpo nasọ yin hinhẹn jẹgangan to odò glọ.
17 Yé ko jẹte yì Yọdò* mẹ hẹ ẹ, yèdọ yì mẹhe yin hùhù gbọn ohí dali lẹ dè,+ to pọmẹ hẹ godonọnamẹtọ* etọn lẹ he nọ nọ̀ oyẹ̀ etọn glọ to akọta lẹ mẹ.’+
18 “‘Detẹ to atin Edẹni tọn lẹ mẹ wẹ tin taidi hiẹ to gigo po kiklo po mẹ?+ Ṣigba, na nugbo tọn, hiẹ na yin hinhẹnwa odò, yèdọ yì odò glọ po atin Edẹni tọn lẹ po. Hiẹ na mlọnai to adàmagbonọ lẹ ṣẹnṣẹn, yèdọ hẹ mẹhe yin hùhù gbọn ohí dali lẹ. Ehe na jọ do Falo po omẹ etọn lẹpo po go,’ wẹ Oklunọ Nupojipetọ Jehovah dọ.”
