Ezekiẹli 42:1-20
42 To whenẹnu, e plan mi wá awánu gbonu tọn he pànta agewaji lọ mẹ.+ E sọ hẹn mi wá fie abò núdùdù tọn lọ lẹ te to apá na ofi flala lọ,+ yèdọ to agewaji ohọ̀ he bọdego lọ tọn.+
2 Tedidi etọn to họntonu agewaji tọn lọ kọ̀n yin awagbà* 100, e sọ gblo na awagbà 50.
3 E tin to awánu homẹ tọn he gblo na awagbà 20+ po ofi titlẹ́ awánu gbonu tọn lọ tọn po ṣẹnṣẹn. Agbà gaa etọn lẹ pannukọn yede bo yin petlezìn atọ̀nnọ.
4 To abò núdùdù tọn lọ lẹ nukọn wẹ aligbọntẹn+ de te he gblo na awagbà 10 bosọ dite na awagbà 100.* Họntonu yetọn lẹ tin to agewaji.
5 Abò núdùdù tọn he to aga na ohọ̀ lọ lẹ whè hú dehe to odò po dehe to ṣẹnṣẹn lẹ po, na agbà gaa lọ lẹ yí otẹn hugan wutu.
6 Na yé yin petlezìn atọ̀nnọ bo ma tindo dòtin lẹ taidi dòtin awánu lọ tọn lẹ wutu. Enẹwutu wẹ otẹn yetọn yin yíyí to aga hú ohọ̀ he to odò po dehe to ṣẹnṣẹn lẹ po tọn.
7 Adó zannu tọn he ma dẹn do abò núdùdù tọn lọ lẹ pànta awánu gbonu tọn he pannukọn abò núdùdù tọn he pò lẹ dite na awagbà 50.
8 Abò núdùdù tọn lẹ he ma dẹn do awánu gbonu tọn lọ dite na awagbà 50, ṣigba dehe pannukọn fiwiwe lọ lẹ yin awagbà 100.
9 Abò núdùdù tọn lọ lẹ tindo họntonu de to whèzẹtẹn-waji, eyin yè tọ́n sọn awánu gbonu tọn lọ mẹ.
10 Abò núdùdù tọn lẹ sọ tin to adó zannu tọn awánu lọ tọn lẹ homẹ* to whèzẹtẹn-waji, yèdọ sẹpọ ofi flala lọ po ohọ̀ lọ po.+
11 Aligbọntẹn de tin to nukọnna yé taidi dehe to nukọnna abò núdùdù tọn he to agewaji lẹ.+ Yé tindo tedidi dopolọ, gbigblo dopolọ, họntonu dopolọ po awusọhia dopolọ po. Họntonu yetọn lẹ
12 sọ taidi họntonu abò núdùdù tọn he to hùwaji lẹ tọn. Họntonu de tin to ali lọ nù, yèdọ to nukọn tlolo na adó zannu tọn he to whèzẹtẹn-waji lọ, fie yè sọgan gbọn biọ e mẹ.+
13 Whenẹnu wẹ e dọna mi dọmọ: “Abò núdùdù tọn agewaji tọn lọ lẹ po abò núdùdù tọn hùwaji tọn he to apá na ofi flala+ lọ lẹ po wẹ yin abò núdùdù tọn wiwe lẹ, fie yẹwhenọ he nọ dọnsẹpọ Jehovah lẹ nọ dù avọ́nunina he wé hugan lẹ te.+ Finẹ wẹ yé nọ bẹ avọ́nunina he wé hugan lẹ, avọ́nunina jinukun-lili tọn, avọ́nunina ylando tọn po avọ́nunina whẹhuhu tọn po do, na nọtẹn wiwe de wẹ wutu.+
14 To whenue yẹwhenọ lẹ na biọ e mẹ, yé ma dona tọ́n sọn ofi wiwe lọ yì awánu gbonu tọn lọ eyin yé ma de awù he yé yí do wadevizọn lẹ whẹ́,+ na onú wiwe wẹ yé yin. Yé na do awù devo lẹ nado sọgan dọnsẹpọ fie dotẹnmẹ yin nina gbẹtọ lẹ nado wá.”
15 To whenue e ko dotana lẹdo he to homẹ na tẹmpli lọ* jijlẹ godo, e plan mi tọ́njẹgbonu gbọn họngbo he pannukọn whèzẹtẹn lọ nù,+ e sọ jlẹ lẹdo lọ blebu.
16 E yí ofánpò nujijlẹ tọn* do jlẹ whèzẹtẹn-waji lọ. Sọgbe hẹ ofánpò nujijlẹ tọn lọ, e sọ dite na ofánpò 500 sọn awà de ji jẹ devo ji.
17 E jlẹ agewaji lọ, podọ sọgbe hẹ ofánpò nujijlẹ tọn lọ, e dite na ofánpò 500.
18 E jlẹ hùwaji lọ, podọ sọgbe hẹ ofánpò nujijlẹ tọn lọ, e dite na ofánpò 500.
19 E sọ lilẹ́ bo yì whèyihọ-waji. E sọ yí ofánpò nujijlẹ tọn lọ do jlẹ ẹ bo mọ ofánpò 500.
20 E jlẹ ẹ to adà ẹnẹ lẹ ji. E tindo adó de lẹdo pé+ he dite na ofánpò 500 bo gblo na ofánpò 500,+ nado do vogbingbọn hia to nuhe yin wiwe po onú paa lẹ po ṣẹnṣẹn.+
Nudọnamẹ Odò Tọn
^ Sọgbe hẹ Septante Glẹki tọn, “dite na awagbà 100.” Kandai Heblugbe tọn hia dole: “Aliho awagbà dopo tọn.” Pọ́n Nud. B14.
^ To paa mẹ, “sin gbigblo ji.”
^ To paa mẹ, “abò lọ.”
