Ezekiẹli 7:1-27
7 Ohó Jehovah tọn sọ vọ́ wá dè e dọmọ:
2 “Visunnu gbẹtọ tọn, nuhe Oklunọ Nupojipetọ Jehovah dọ na aigba Islaeli tọn die: ‘Opodo de! Opodo de ko wá agosu ẹnẹ aigba lọ tọn lẹ ji.
3 Opodo ko wá ji we todin, yẹn nasọ do homẹgble ṣie hia we, podọ yẹn na dawhẹna we sọgbe hẹ aliho towe lẹ bo na hẹn we nado dogbè osùnú he a ko wà lẹpo tọn.
4 Nukun ṣie ma na wàlẹblanuna we; mọjanwẹ yẹn ma na vẹawu we,+ na yẹn na hẹn kọdetọn aliho towe lẹ tọn wá ji we, podọ hiẹ na jiya kọdetọn ylankan osùnú he a ko wà lẹ tọn.+ Hiẹ nasọ yọnẹn dọ yẹn wẹ Jehovah.’+
5 “Nuhe Oklunọ Nupojipetọ Jehovah dọ die: ‘Pọ́n! Nugbajẹmẹji de, yèdọ nugbajẹmẹji vonọtaun de ja.+
6 Opodo de ja; opodo lọ na wá; e na wá* ji we. Pọ́n! E ko ja.
7 Ojlẹ* towe ko sọ̀, yèdọ na mì mẹhe nọ nọ̀ aigba lọ ji lẹ. Ojlẹ lọ ja, azán lọ ko sẹpọ.+ Flumẹjijẹ wẹ na tin to osó lẹ ji kakati ni yin awhágbe ayajẹ tọn.
8 “‘To madẹnmẹ, yẹn na kọ̀n adi ṣie jẹgbonu do ji we,+ yẹn nasọ do homẹgble ṣie hia we to gigọ́ mẹ,+ podọ yẹn na dawhẹna we sọgbe hẹ aliho towe lẹ bo na hẹn we nado dogbè osùnú he a ko wà lẹpo tọn.
9 Nukun ṣie ma na wàlẹblanuna we; mọjanwẹ yẹn ma na vẹawu we.+ Yẹn na hẹn kọdetọn aliho towe lẹ tọn wá ji we, podọ hiẹ na jiya kọdetọn ylankan osùnú he a ko wà lẹ tọn. Hiẹ nasọ yọnẹn dọ yẹn, Jehovah, wẹ to nuli we.+
10 “‘Pọ́n azán lọ! Pọ́n, e ko ja!+ Ojlẹ* towe ko sọ̀; opò lọ ko gbàsẹ́ podọ sakla ko tọ́nkun.
11 Danuwiwa ko whẹ́n bo lẹzun opò ylanwiwa tọn.+ Yelọsu, adọkun yetọn lẹ, agun pipli yetọn po yindidi yetọn po ma na luntọ́n.
12 Ojlẹ lọ na wá podọ azán lọ ja. Mì dike nuhọ̀tọ jaya blo, podọ nusàtọ nọ aluẹmẹ blo, na yè ko gblehomẹ do gbẹtọgun lọ pete go wutu.*+
13 Nusàtọ ma na lẹkọyi nuhe yin sisà lọ kọ̀n, eyin ewọ tlẹ yin whinwhlẹngán, na numimọ lọ gando gbẹtọgun lọ pete go. Mẹdepope ma na lẹkọyi, podọ na nuṣiwa etọn wutu,* mẹdepope ma na yin whinwhlẹngán.
14 “‘Yé ko kún opẹ̀n lọ,+ mẹlẹpo ko wleawufo, ṣigba, mẹdepope ma jei awhàn, na yẹn ko gblehomẹ do gbẹtọgun lọ pete go wutu.+
15 Ohí to gbonu,+ azọ̀nylankan po huvẹ po sọ to họmẹ. Mẹdepope he to danji na kú gbọn ohí lọ dali, podọ huvẹ po azọ̀nylankan po na hù mẹhe to tòdaho lọ mẹ lẹ.+
16 Mẹhe tẹnpọn nado họ̀ngán lẹ na yì osó lẹ ji, podọ taidi apoe agbàdo mẹ tọn lẹ, mẹdopodopo na ví nuṣiwa etọn.+
17 Alọ yetọn lẹpo na kuyẹ̀, osin nasọ yọ̀n kligonu yetọn lẹpo.*+
18 Yé ko ze odẹ́vọ̀ do,+ yé sọ to sijọsijọ ji.* Mẹlẹpo na yin winyando bo nasọ yin ota whlẹ́ na.*+
19 “‘Yé na ze fataka yetọn dlan tòhomẹ-liho lẹ ji, sika yetọn lẹ nasọ lẹzun awuhiọnu de na yé. Fataka kavi sika yetọn lẹ ma na whlẹn yé to azán homẹgble tọn Jehovah tọn gbè.+ Yé* ma na mọ pekọ, podọ ohò ma na gọ́ yé, na enẹ* ko lẹzun zannu ahlida tọn de he hẹn yé nado ṣinuwa.
20 Yé nọ doawagun to whanpẹ aṣọ́donu tọn yetọn lẹ mẹ, yé sọ yí yé* do basi yẹdide hiọawu lẹ, yèdọ boṣiọ hiọawu yetọn lẹ.+ Enẹ wẹ zọ́n bọ yẹn na hẹn ẹn lẹzun awuhiọnu de na yé.
21 Yẹn na yí i* na jonọ lẹ taidi ogblànnu de, yẹn nasọ na mẹylankan aigba lọ tọn lẹ taidi nuhe yè hòyí, yé nasọ hẹn ẹn flu.
22 “‘Yẹn na lẹ́ nukunmẹ ṣie sọn yé dè,+ podọ yé na hẹn fiwhiwhlá* ṣie flu bọ jaguda lẹ nasọ biọ e mẹ bo hẹn ẹn flu.+
23 “‘Basi gẹdẹ,*+ na aigba lọ ko gọ́ na whẹdida hùnsọndai tọn+ podọ tòdaho lọ ko gọ́ na danuwiwa.+
24 Yẹn na hẹn akọta he ylan hugan lẹ wá,+ podọ yé na yí owhé yetọn lẹ,+ yẹn nasọ hẹn awagundido omẹ huhlọnnọ lẹ tọn wá opodo, podọ fiwiwe yetọn lẹ na yin hinhẹnflu.+
25 To whenue awufiẹsa na wá yé ji, yé na dín jijọho, ṣigba jijọho depope ma na tin.+
26 Nugbajẹmẹji na wá yé ji debọdo-dego, podọ linlin lẹ na wá debọdo-dego, mẹlọ lẹ nasọ dín nado mọ numimọ sọn yẹwhegán de dè,+ ṣigba osẹ́n* sọn yẹwhenọ de dè podọ ayinamẹ sọn mẹho lẹ dè ma na yọ́n-na-yizan.+
27 Ahọlu na nọ aluẹmẹ,+ ahọvi nasọ hẹn todido bu,* alọ omẹ aigba lọ tọn lẹ tọn nasọ sisọ na obu. Yẹn na yinuwa hẹ yé sọgbe hẹ aliho yetọn lẹ, podọ yẹn na dawhẹna yé dile yé ko nọ dawhẹnamẹ do. Yé nasọ yọnẹn dọ yẹn wẹ Jehovah.’”+
Nudọnamẹ Odò Tọn
^ To paa mẹ, “e na fọ́n do.”
^ Kavi vlavo, “Aṣọ́donu.”
^ Kavi vlavo, “Aṣọ́donu.”
^ Enẹ wẹ, mẹhe to nuhọ̀ po mẹhe to nusà po ma na mọaleyi sọn e mẹ, na vasudo he na wá yé ji wutu.
^ Kavi vlavo, “gbọn nuṣiwa etọn dali.”
^ Enẹ wẹ, adọ́, na obu wutu.
^ Enẹ wẹ, ota yetọn na yin whiwhlẹ́ taidi ohia aluẹmẹninọ tọn.
^ To paa mẹ, “sijọsijọ ko ṣinyọ́n yé ji.”
^ Kavi “Alindọn yetọn.”
^ Enẹ wẹ, fataka po sika yetọn po.
^ Enẹ wẹ, nuyizan sika po fataka po tọn yetọn lẹ.
^ Enẹ wẹ, fataka po sika yetọn po he yin yiyizan nado basi boṣiọ lẹ.
^ Ehe na ko to alọdlẹndo fiwiwe gbaugbau lọ to tẹmpli Jehovah tọn mẹ.
^ Enẹ wẹ, gẹdẹ kanlinmọgbenu tọn.
^ Kavi “anademẹ.”
^ Kavi “nasọ jẹvọ́.”
