Filipinu lẹ 4:1-23
4 Enẹwutu, mì mẹmẹsunnu he yẹn yiwanna bosọ tindo ojlo vẹkuvẹku na lẹ emi, yèdọ mì mẹhe yin ayajẹ po jẹgbakun ṣie po,+ mì nọtegli+ to aliho ehe mẹ to Oklunọ mẹ, mì mẹyiwanna ṣie lẹ.
2 Yẹn dotuhomẹna Euodia podọ yẹn dotuhomẹna Sintiki nado tindo linlẹn dopolọ to Oklunọ mẹ.+
3 Mọwẹ, yẹn sọ biọ to hiẹ si, taidi azọ́nwatọ* hatọ nugbo de, nado nọ to alọgọna yọnnu ehelẹ he ko dovivẹnu* to kọndopọ mẹ hẹ mi na wẹndagbe lọ tọn wutu, to pọmẹ hẹ Klementi gọna azọ́nwatọ hatọ ṣie he pò lẹ, mẹhe oyín yetọn tin to owe ogbẹ̀ tọn lọ mẹ.+
4 Mì nọ jaya to Oklunọ mẹ to whepoponu. Yẹn na vọ́ dọ whladopo dogọ, Mì nọ jaya!+
5 Mì gbọ lẹnpọn dagbenọ-yinyin*+ mìtọn ni yin yinyọnẹn na gbẹtọ lẹpo. Oklunọ to yakẹ.
6 Mì yin magbọjẹnọ na nudepope blo,+ ṣigba to nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe;+
7 jijọho+ Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn+ po nugopipe apọ̀nmẹ tọn* mìtọn po gbọn Klisti Jesu gblamẹ.
8 To popolẹpo mẹ, mẹmẹsunnu lẹ emi, nudepope he yin nugbo, nudepope he jẹna yẹyi, nudepope he yin dodo, nudepope he yin wiwe, nudepope he jẹna owanyi, nudepope he yè nọ dọho etọn dagbe, nudepope he yin jijọ dagbe, podọ nudepope he jẹna pipà, mì nọ to onú ehelẹ lẹnpọn* zọnmii.+
9 Nuhe mì ko plọn bo kẹalọyi bosọ sè bo mọ sọn dè e lẹ, mì nọ basi ehelẹ,+ Jiwheyẹwhe jijọho tọn nasọ nọhẹ mì.
10 Yẹn nọ jaya tlala to Oklunọ mẹ dọ todin, onú ṣie ko sọ vọ́ jẹ ahunmẹduna mì ji to godo mẹ.+ Dile etlẹ yindọ onú ṣie ko nọ duahunmẹna mì dai, mì ma tindo dotẹnmẹ hundote lọ nado do e hia.
11 Yẹn ma to ehe dọ na yẹn tin to nuhudo mẹ wutu, na yẹn ko plọn nado tindo pekọ mahopọnna ninọmẹ depope he mẹ n’tin te.+
12 Yẹn yọ́n lehe yẹn sọgan nọgbẹ̀ po onú vude+ po do podọ lehe yẹn sọgan nọgbẹ̀ po onú susugege po do. To nulẹpo mẹ podọ to ninọmẹ lẹpo mẹ, yẹn ko plọn aṣli lehe yẹn sọgan dù gọ́ho do tọn podọ lehe yẹn sọgan nọ huvẹ do tọn, lehe yẹn sọgan tindo susugege do tọn podọ lehe yẹn sọgan nọ ohẹ́n mẹ do tọn.
13 To nulẹpo mẹ, yẹn tindo huhlọn lọ gbọn mẹlọ he nọ na mi huhlọn+ dali.
14 Etomọṣo, mìwlẹ wà dagbe nado tindo mahẹ to nukunbibia ṣie mẹ hẹ mi.
15 Na taun tọn, mì Filipinu lẹ yọnẹn ga dọ to whenue mì kẹalọyi wẹndagbe lọ to tintan whenu godo, bọ yẹn tọ́n sọn Makedonia, agun depope ma tindo mahẹ po yẹn po to whẹho ninamẹ po mimọyi tọn po mẹ, adavo mìwlẹ kẹdẹ;+
16 na etlẹ yin to Tẹsalonika, mìwlẹ do onú hlan mi na nuhudo ṣie, e ma yin whladopo poun, ṣigba whla awe.
17 E ma yindọ yẹn to nunina de dín wẹ gba, ṣigba sinsẹ́n he nọ hẹn ale susu wá na mì lọ dín wẹ yẹn te.
18 Ṣigba, nuhe hudo mi lẹpo wẹ yẹn tindo, etlẹ yin humọ. Nude ma whè do mi, todin he yẹn ko mọ nuhe mì dohlan gbọn Epafloditu+ ji lẹ yí, yèdọ owán gblingblin de,+ avọ́sinsan he yin alọkẹyi de, he nọ hẹn homẹhun Jiwheyẹwhe.
19 Taidi kọdetọn de, Jiwheyẹwhe ṣie na na mì nuhe mì tindo nuhudo etọn lẹpo to gigọ́ mẹ+ sọgbe hẹ adọkun gigonọ etọn gbọn Klisti Jesu gblamẹ.
20 Todin, gigo ni tin hlan Jiwheyẹwhe podọ Otọ́ mítọn kakadoi podọ doidoi. Niṣẹ.*
21 Mì yí nudọdomẹ ṣie lẹ na omẹ wiwe lẹpo he to kọndopọ mẹ hẹ Klisti Jesu. Mẹmẹsunnu he tin po yẹn po lẹ yí nudọdomẹ yetọn hlan mì.
22 Omẹ wiwe lẹpo, ṣigba titengbe mẹhe to whédo Sesali tọn+ mẹ lẹ yí nudọdomẹ yetọn hlan mì.
23 Na nukundagbe majẹhẹ Oklunọ Jesu Klisti tọn ni tin hẹ gbigbọ he mì nọ dohia.
Nudọnamẹ Odò Tọn
^ To paa mẹ, “zẹgẹ-hẹntọ.”
^ Kavi “ko jẹtukla taun.”
^ To paa mẹ, “awujonanu, adàdidiọ.”
^ Kavi “ayiha; linlẹn.”
^ Kavi “to ayihamẹlẹnpọn do onú ehelẹ ji.”
^ Kavi “Amẹn” to Glẹkigbe mẹ.
