Galatianu lẹ 6:1-18
6 Mẹmẹsunnu lẹ emi, eyin mẹde tlẹ ṣì afọ ze whẹpo do wá yọ́n ẹn, mì mẹhe pegan to gbigbọ-liho lẹ ni tẹnpọn nado gọ̀ omẹ mọnkọtọn do otẹn etọn mẹ to gbigbọ walọmimiọn tọn mẹ.+ Ṣigba, mì payi mìde go,+ na mìlọsu nikaa yin whiwhlepọn ga.+
2 Mì nọ to alọgọna ode awetọ to nuhe to agbàn pẹ̀n mì lẹ mẹ+ bo gbọnmọ dali hẹn osẹ́n Klisti tọn di.+
3 Na eyin mẹde lẹndọ emi yin nude to whenue ewọ ma yin nude,+ ede klọ wẹ e te.
4 Ṣigba, mì gbọ mẹdopodopo ni nọ dindona nuyiwa edetiti tọn lẹ,+ podọ to whenẹnu, ewọ na tindo whẹwhinwhẹ́n nado jaya gando edetiti kẹdẹ go, bọ e ma yin nado nọ yí ede jlẹdo mẹdevo go gba.+
5 Na mẹdopodopo wẹ na hẹn agbàn*+ edetiti tọn.
6 Humọ, mì gbọ mẹdepope he yè to ohó lọ plọn* ni nọ tindo mahẹ to nudagbe lẹpo mẹ hẹ mẹhe nọ namẹ nuplọnmẹ* mọnkọtọn.+
7 Yè klọ mì blo: Jiwheyẹwhe ma yin mẹhe yè na vlẹ. Na nudepope he mẹde to dido, enẹ wẹ e na gbẹ̀n ga;+
8 na mẹhe to dido sọgbe hẹ agbasalan etọn na gbẹ̀n gbigble sọn agbasalan etọn mẹ, ṣigba mẹhe to dido sọgbe hẹ gbigbọ na gbẹ̀n ogbẹ̀ madopodo sọn gbigbọ lọ dè.+
9 Enẹwutu, mì dike mí gbọjọ to nuhe yin dagbe wiwà mẹ blo, na mí na gbẹ̀n to ojlẹ sisọ mẹ eyin agbọ́ ma pé mí.*+
10 To whelọnu lo, dile mí na tindo dotẹnmẹ hundote* etọn do, mì gbọ mí ni nọ wà nuhe yin dagbe hlan mẹlẹpo, ṣigba na taun tọn, hlan mẹhe gando mí go to yise mẹ lẹ.
11 Mì pọ́n wekun daho he yẹn yí do kanwehlan mì po alọ ṣie titi po lẹ.
12 Mẹhe jlo na do yede hia di mẹdagbe to agbasalan mẹ* lẹpo wẹ mẹhe to tintẹnpọn nado hẹn mì gboadà lẹ, yé sọ nọ wàmọ kiki na yé nikaa yin homẹkẹndo na yatin* Klisti tọn wutu.
13 Na mẹhe gboadà lẹ lọsu ma tlẹ to Osẹ́n lọ yìn,+ ṣigba yé jlo dọ mìwlẹ ni yin adàgbona na yewlẹ nido tindo whẹwhinwhẹ́n nado doawagun gando mìwlẹ go.
14 Ṣigba, yẹn ma jlo na doawagun gbede, adavo to yatin* Oklunọ mítọn Jesu Klisti tọn mẹ,+ mẹhe gblamẹ aihọn lọ ko yin hùhù* te to pọndohlan ṣie mẹ podọ yẹn to pọndohlan aihọn tọn mẹ.
15 Na adàgbigbo ma yin nude, mọdopolọ adàmagbo ma yin nude,+ ṣigba nudida yọyọ de wẹ yin nujọnu.+
16 Na mẹhe to zọnlin jijlọ zìn sọgbe hẹ nunọwhinnusẹ́n walọyizan dagbe tọn lẹpo ni tindo jijọho po lẹblanu po, mọwẹ, yèdọ to Islaeli Jiwheyẹwhe tọn ji.+
17 Bẹsọn din, mì dike mẹdepope dotukla mi ba blo, na yẹn ko to hiadomẹgo lẹ he yin afanumẹ Jesu tọn hẹn to agbasa ṣie go.+
18 Mẹmẹsunnu lẹ emi, na nukundagbe majẹhẹ Oklunọ mítọn Jesu Klisti tọn ni tin hẹ gbigbọ he mì nọ dohia. Niṣẹ.*
Nudọnamẹ Odò Tọn
^ Kavi “azọngban.”
^ Kavi “he yè yí onù do to ohó lọ plọn.”
^ Kavi “nuplọnmẹ nùmẹ tọn.”
^ Kavi “eyin mí ma jogbe.”
^ To paa mẹ, “ojlẹ dide.”
^ Kavi “Mẹhe jlo na do awusọhia dagbe hia to gbonu.”
^ Kavi “yin hùhù do pòtin ji.”
^ Kavi “Amẹn” to Glẹkigbe mẹ.
