Heblu lẹ 1:1-14
1 Sọn ojlẹ dindẹn die gbọn wẹ Jiwheyẹwhe ko dọhona tọgbo mítọn lẹ to ninọmẹ susu mẹ podọ to aliho susu mẹ gbọn yẹwhegán lẹ gblamẹ.+
2 Todin, e ko dọhona mí to azán opodo tọn ehelẹ mẹ gbọn Visunnu de gblamẹ,+ mẹhe ewọ ko de taidi gudutọ nulẹpo tọn,+ podọ mẹhe gblamẹ ewọ gbọn do basi titonu* lẹ.+
3 Ewọ wẹ nọ do gigo Jiwheyẹwhe tọn hia+ bosọ yin apajlẹ pipé etọn,+ podọ ewọ wẹ nọ hẹn nulẹpo dogbẹ̀ gbọn ohó huhlọnnọ etọn dali. Podọ to whenue e ko lẹ̀ mí wé sọn ylando mítọn lẹ mẹ godo,+ e sinai do adusilọ Gigonọ Daho lọ tọn mẹ to aga.+
4 Enẹwutu, ewọ ko wá pọnte hú angẹli lẹ,+ yèdọ jẹ obá lọ mẹ bọ ewọ ko dugu oyín de tọn he yọ́n tlala hugan yewlẹ tọn.+
5 Di apajlẹ, detẹ to angẹli lẹ mẹ wẹ Jiwheyẹwhe ko dọna pọ́n dọmọ: “Hiẹ wẹ visunnu ṣie; yẹn ko lẹzun otọ́ towe to egbé”?+ Kavi bosọ dọna dọmọ: “Yẹn na lẹzun otọ́ etọn bọ ewọ na lẹzun visunnu ṣie”?+
6 Ṣigba, to whenuena ewọ vọ́ hẹn Plọnji etọn+ wá aigba fininọ lọ ji, e dọmọ: “Podọ gbọ angẹli Jiwheyẹwhe tọn lẹpo ni litaina ẹn.”*
7 Humọ, ewọ dọ gando angẹli lẹ go dọmọ: “E yí angẹli etọn lẹ do basi nudida gbigbọnọ lẹ, podọ lizọnyizọnwatọ* etọn lẹ+ do basi miyọ́n he to jiji de.”+
8 Ṣigba, e dọ gando Visunnu lọ go dọmọ: “Jiwheyẹwhe wẹ ofìn towe+ kakadoi podọ doidoi, podọ ogánpò Ahọluduta towe tọn wẹ ogánpò dodowiwa* tọn.
9 Hiẹ yiwanna dodowiwa, podọ hiẹ gbẹwanna sẹ́nhẹngba. Enẹ wẹ zọ́n bọ Jiwheyẹwhe, yèdọ Jiwheyẹwhe towe do yiamisisadode we+ po amì aglinjijẹ tọn po hú hatọ towe lẹ.”+
10 Podọ: “To bẹjẹeji, Oklunọ E, hiẹ ko do dodonu aigba lọ tọn lẹ ai, podọ olọn yin azọ́n alọ towe tọn.
11 Yé na dọ̀n, ṣigba hiẹ na gbọṣi aimẹ; podọ yemẹpo wẹ na dohó taidi awù de,
12 hiẹ nasọ bọ̀ yé kẹdẹdi awù daho de, yèdọ taidi awù de, yé nasọ yin didiọ. Ṣigba, hiẹ na yin dopolọ bọ owhe towe ma na vọ̀ gbede.”+
13 Ṣigba, detẹ to angẹli lẹ mẹ wẹ ewọ ko dọna pọ́n dọmọ: “Sinai to adusilọ ṣie mẹ, kaka yẹn nado yí kẹntọ towe lẹ do basi tokloafọligbe afọ towe lẹ tọn”?+
14 Be e ma yin gbigbọ wẹ yemẹpo na sinsẹ̀nzọn wiwe,*+ bo yin didohlan nado yilizọn na mẹhe na wá dugu whlẹngán tọn lẹ ya?
Nudọnamẹ Odò Tọn
^ Kavi “dẹ́ do odò na ẹn.”
^ Kavi “devizọnwatọ gbangba tọn.”
^ Kavi “whẹdida dodo.”
^ Kavi “na sinsẹ̀nzọn gbangba tọn.”
