Heblu lẹ 11:1-40
11 Yise wẹ yin nukundido dejidego nuhe mí to todo lẹ tọn,+ yèdọ kunnudenu he họnwun* onú tangan he ma yin mimọ lẹ tọn.
2 Na gbọn yise gblamẹ wẹ kunnu yin dide gando omẹ hohowhenu tọn* lẹ go.
3 Gbọn yise dali, mí doayi e go dọ gbọn ohó Jiwheyẹwhe tọn dali wẹ titonu* lẹ yin awuwlena, bọ nuhe ko yin mimọ ko wá tintin mẹ sọn nuhe ma sọgan yin mimọ lẹ mẹ.
4 Gbọn yise dali, Abẹli basi avọ́sinsan de hlan Jiwheyẹwhe he họakuẹ hú Kaini tọn,+ podọ gbọn yise enẹ gblamẹ wẹ kunnu yin dide gando ewọ go dọ e yin dodonọ, na Jiwheyẹwhe kẹalọyi* nunina etọn lẹ,+ podọ dile ewọ tlẹ ko kú, e gbẹ́ to hodọ+ gbọn yise etọn gblamẹ.
5 Gbọn yise dali, Enọku+ yin tẹndiọna ma nado mọ okú, podọ e ma yin mimọ to fidepope na Jiwheyẹwhe ko diọtẹnna ẹn wutu;+ ṣigba whẹpo e do yin tẹndiọna, ewọ mọ kunnudenu yí dọ e ko hẹn homẹ Jiwheyẹwhe tọn hùn ganji.
6 Humọ, matin yise, e ma yọnbasi nado hẹn homẹ Jiwheyẹwhe tọn hùn ganji, na mẹhe to dindọnsẹpọ ẹ dona yise dọ ewọ tin podọ ewọ wẹ ahọsumẹtọ mẹhe to dindin in vẹkuvẹku lẹ tọn.+
7 Gbọn yise dali, to whenuena Noa+ mọ avase Jiwheyẹwhe tọn yí gando nuhe e ma ko mọ lẹ go,+ e do budisi Jiwheyẹwhe hia bo gbá aki+ de na whlẹngán whédo etọn tọn; podọ gbọn yise ehe dali, e gblewhẹdo aihọn lọ,+ e sọ dugu dodowiwa he yise nọ hẹnwa tọn.
8 Gbọn yise dali, to whenue Ablaham+ yin yiylọ, e setonu bo tọ́njẹgbonu yì fide he e na mọyi taidi ogú de; e sọ tọ́nyi, dile etlẹ yindọ e ma yọ́n fihe e jei.+
9 Gbọn yise dali, e nọ aigba he yin opagbe etọn do na ẹn lọ ji taidi jonọ,+ bo nọ gòhọ lẹ mẹ+ po Isaki po gọna Jakọbu, yèdọ mẹhe dugu opagbe dopolọ tọn lẹ hẹ ẹ.+
10 Na ewọ to nukundo tòdaho lọ he tindo dodonu nujọnu tọn lẹ, yèdọ tòdaho he Jiwheyẹwhe wẹ yin yẹdenanutọ* po didotọ etọn po.+
11 Gbọn yise dali ga, Sala mọ huhlọn yí nado mọhò,* dile etlẹ yindọ ewọ ko zẹ̀ owhe vijiji tọn go,+ na ewọ pọ́n Mẹhe dopagbe lọ hlan di nugbonọ* wutu.
12 Na ehe wutu, gbọn dawe dopo, he taidi mẹhe ko kú dote dali,+ ovi he sọha yetọn sù taidi sunwhlẹvu olọn tọn lẹ yin jiji,+ podọ yé ma do sọha taidi tọkẹ́n huto tọn lẹ.+
13 Omẹ ehe lẹpo yin nugbonọ kakajẹ okú, dile etlẹ yindọ yé ma mọ hẹndi opagbe lọ lẹ tọn;+ ṣigba yé mọ yé hlan olá+ bo kẹalọyi yé bosọ lá to gbangba dọ jonọ lẹ po gbéjinọtọ ojlẹ gli tọn lẹ po wẹ yé yin to aigba lọ ji.
14 Na mẹhe dọho to aliho mọnkọtọn mẹ lẹ hẹn ẹn họnwun dọ yé to fide he na yin yetọn titi dín vẹkuvẹku.
15 Ṣogan, eyin nugbo wẹ dọ yé nọ to fihe yé tọ́n sọn lọ flin mapote,+ yé na ko tindo dotẹnmẹ hundote nado lẹkọyi.
16 Ṣigba todin, yé to vivẹnudo na fihe yọ́n hugan de, enẹ wẹ dehe to kọndopọ mẹ hẹ olọn. Enẹwutu, winyan ma hù Jiwheyẹwhe gando yé go, nado yin yiylọdọ Jiwheyẹwhe yetọn,+ na e ko wleawu tòdaho de tọn dai na yé.+
17 Gbọn yise dali, to whenue Ablaham yin tintẹnpọn,+ e ko dibla yí Isaki do sanvọ́—dawe lọ he ko mọ opagbe lọ lẹ yí po ayajẹ po tẹnpọn nado yí visunnu dopo akàn etọn do sanvọ́+—
18 dile etlẹ yindọ e ko yin didọna ẹn dọmọ: “Mẹhe na yin yiylọdọ kúnkan* towe na wá gbọn Isaki gblamẹ.”+
19 Ṣigba, e mọdọ Jiwheyẹwhe tlẹ penugo nado fọ́n ẹn sọn oṣiọ lẹ mẹ, podọ e sọ gọ̀ ẹ mọyi sọn finẹ to yẹhiadonu-liho.+
20 Gbọn yise dali ga, Isaki dona Jakọbu+ po Esau+ po gando nuhe ja lẹ go.
21 Gbọn yise dali, to whenue Jakọbu jlo na kú,+ e dona visunnu Josẹfu tọn lẹ+ dopodopo bo dẹ́ do opò etọn ji nado sẹ̀n Jiwheyẹwhe.+
22 Gbọn yise dali, to whenue Josẹfu sẹpọ vivọnu gbẹzan etọn tọn, e donù tintọ́njẹgbonu* ovi Islaeli tọn lẹ tọn sọn Egipti go, ewọ sọ na anademẹ* lẹ gando ohú etọn lẹ go.*+
23 Gbọn yise dali, Mose yin zizewhla na osun atọ̀n gbọn mẹjitọ etọn lẹ dali to jiji etọn godo,+ na yé mọdọ ovi pẹvi lọ yọnwhanpẹ wutu+ bọ yé ma dibuna gbedide ahọlu tọn.+
24 Gbọn yise dali, to whenue Mose whẹ́n,+ e gbẹ́ nado yin yiylọdọ visunnu viyọnnu Falo tọn tọn,+
25 bo de nado yin yasana po omẹ Jiwheyẹwhe tọn lẹ po kakati nado dugbẹ ylando tọn na ojlẹ gli de,
26 na e pọ́n vlẹko Klisti tọn hlan taidi adọkun he klohu adọkun Egipti tọn lẹ, na ewọ pọ́n ale ahọsumẹ lọ tọn hlan tlintlin wutu.
27 Gbọn yise dali, ewọ tọ́n sọn Egipti,+ ṣigba e ma dibuna homẹgble ahọlu tọn,+ na e gbọṣi tenọgli mẹ taidi dọ e to Mẹlọ he yin mayinukundomọ lọ mọ wẹ nkọ.+
28 Gbọn yise dali, e basi hùnwhẹ Juwayi tọn bo mimí ohùn do dòtin ohọ̀n tọn lẹ go, na mẹvasudotọ lọ nikaa gbleawuna* plọnji yetọn lẹ.+
29 Gbọn yise dali, yé jugbọn Ohù Vẹẹ mẹ taidi gbọn aigba húhú ji nkọ,+ ṣigba to whenue Egiptinu lẹ tẹnpọn nado gbọn finẹ, yé yin sisiọ.+
30 Gbọn yise dali, adó Jẹliko tọn lẹ họ́jai to whenue zọnlin ko yin zinzin lẹdo yé pé na azán ṣinawe godo.+
31 Gbọn yise dali, Lahabi galọtọ lọ ma dọ̀n po mẹhe vẹtoli lẹ po gba, na ewọ yí amẹ́ lẹ to aliho jijọho tọn de mẹ wutu.+
32 Podọ etẹwẹ yẹn nasọ dọ dogọ? Na whenu ma na pé mi eyin yẹn zindonukọn nado dọ Gideoni+ tọn, Balak+ tọn, Samsọni+ tọn, Jẹfta+ tọn, Davidi+ tọn, podọ Samuẹli+ tọn po yẹwhegán devo lẹ tọn po.
33 Gbọn yise dali, yé gbawhàn ahọluduta lẹ tọn,+ wà nuhe yin dodo, mọ opagbe lẹ yí,+ bọnùdo na kinnikinni lẹ,+
34 doalọtena huhlọn miyọ́n tọn,+ họ̀ngán sọn onù ohí tọn nù,+ yin hinhẹn zun huhlọnnọ sọn ninọmẹ madogán tọn mẹ,+ lẹzun hlọnhlọnnọ to awhàn mẹ,+ bo gbà awhànpa he tọ́nawhàn yé lẹ do.+
35 Yọnnu lẹ mọ oṣiọ yetọn lẹ yí gbọn fọnsọnku dali,+ ṣigba mẹdevo lẹ yin yasana na yé ma kẹalọyi tundote gbọn ofligọ wunmẹ de dali wutu, na yé nido sọgan mọ fọnsọnku he yọ́n hugan de yí.
36 Mọwẹ, mẹdevo lẹ mọ whlepọn yetọn yí gbọn vlẹko lẹ po hihò lẹ po dali, podọ humọ, gbọn gẹdẹ lẹ+ po gànpamẹninọ lẹ po dali.+
37 Yé yin zannu dlan do hù,+ yé yin whiwhlepọn, yé yin sinsán* do awe po whlẹzẹ̀nú po, yé yin hùhù gbọn ohí dali,+ yé dánpe to ayú lẹngbọ tọn lẹ mẹ, to ayú gbọgbọẹ tọn lẹ mẹ,+ to whenue yé tin to nuhudo mẹ, to nukunbibia mẹ,+ to yasanamẹ glọ;+
38 podọ aihọn ma jẹna yé. Yé flu gbọn danfafa lẹ ji, osó lẹ ji, oslò lẹ+ po odò aigba tọn lẹ po mẹ.
39 Ṣogan, mahopọnna dọ omẹ ehe lẹpo mọ kunnudenu dagbe de yí na yise yetọn wutu, yé ma mọ hẹndi opagbe lọ tọn,
40 na Jiwheyẹwhe ko mọ nuhe yọ́n hugan de na mí,+ na yé nikaa yin hinhẹn zun pipé matin míwlẹ.
Nudọnamẹ Odò Tọn
^ Kavi “he dutomẹji.”
^ Kavi “tọgbo mítọn.”
^ Kavi “dekunnu gbọn alọkikẹyi.”
^ Kavi “anazọ́nwatọ.”
^ To paa mẹ, “mọhò okún de tọn.”
^ Kavi “omẹ dejidego.”
^ To paa mẹ, “okún.”
^ Hogbe Glẹkigbe tọn he yin yiyizan tofi yin nudopolọ po yinkọ Glẹkigbe tọn he yin yiyizan na owe Eksọdusi tọn po.
^ Kavi “gbedide.”
^ Kavi “gando ṣiọdidi etọn go.”
^ To paa mẹ, “doalọ.”
^ Kavi “tintlẹ́n.”
