Howhinwhẹn lẹ 13:1-25
13 Visunnu nuyọnẹntọ nọ kẹalọyi mẹplọnlọ otọ́ etọn tọn,+Ṣigba, mẹṣankotọ ma nọ dotoaina nugbẹnamẹ.*+
2 Sinsẹ́n he ohó* mẹde tọn detọ́n wẹ na zọ́n bọ e na duale nudagbe tọn,+Ṣigba, danuwiwa mẹ wẹ mẹklọtọ lẹ nọ tindo ojlo vẹkuvẹku te.
3 Ewọ he nọ họ́ onù etọn* to hihọ́-basina ogbẹ̀* ede tọn.+
Ṣigba, ewọ he ma nọ bọnùdo na dọ̀n.+
4 Adidọnọ nọ jlonu, ṣogan e* ma tindo nude,+Ṣigba, mẹhe* nọ dovivẹnu na yin pekọhẹnwana* to gigọ́ mẹ.+
5 Dodonọ nọ gbẹwanna lalo,+Ṣigba, nuyiwa mẹylankan tọn lẹ nọ hẹn winyan po flumẹjijẹ po wá.
6 Dodowiwa nọ basi hihọ́na homẹvọnọ,+Ṣigba, kanyinylan nọ zìn ylandonọ dai.
7 Mẹde tin he nọ yinuwa di adọkunnọ, ṣogan e ma do nude;+Mẹdevo tin he nọ yinuwa di wamọnọ, ṣogan e tindo adọkunnu susu.
8 Adọkunnu lẹ wẹ nọ fli ogbẹ̀* adọkunnọ tọn gọ̀,+Ṣigba, nude ma tlẹ nọ dobuna wamọnọ.*+
9 Hinhọ́n dodonọ tọn nọ họnwun gblegede,*+Ṣigba, miyọ́ngbán mẹylankan tọn na yin ṣíṣí.+
10 Avùn mẹ wẹ sakla nọ dekọtọn do,+Ṣigba, nuyọnẹn tin to mẹhe nọ dín ayinamẹ* lẹ dè.+
11 Adọkun he yin tintindo po awuyiya po* na wá depò,+Ṣigba, adọkun he mẹde bẹpli vudevude* na sudeji.
12 Nukundido* he yè sẹ̀ donukọn nọ hẹn ahun jẹazọ̀n,+Ṣigba, ojlo he yin pekọhẹnwana nọ taidi atin ogbẹ̀ tọn de.+
13 Mẹdepope he nọ vlẹ anademẹ* kò na jiya etọn,+Ṣigba, mẹhe nọ setonuna gbedide na mọ ahọsumẹ yí.+
14 Asisa ogbẹ̀ tọn de wẹ nuplọnmẹ* nuyọnẹntọ tọn yin+Nado gọkọ namẹ sọn omọ̀ okú tọn lẹ kọ̀n.
15 Mẹhe tindo zinzin nujọnu tọn nọ mọ nukundagbe,Ṣigba, aliho mẹklọtọ tọn nọ gọ́ na tukla.
16 Zinzintọ nọ yinuwa po oyọnẹn po,+Ṣigba, nulunọ nọ de nulú edetiti tọn gbà.+
17 Wẹnsagun ylankan nọ tlọ biọ tukla mẹ,+Ṣigba, dẹ́mẹnu nugbonọ nọ hẹnazọ̀ngbọ.+
18 Mẹdepope he gbẹkọ mẹplọnlọ go nọ wá jẹhẹ́n bo nọ duwinyan,Ṣigba, mẹhe nọ kẹalọyi wọhẹ na yin gigopana.+
19 Whenue ojlo mẹde* tọn yin pekọhẹnwana, homẹ etọn nọ hùn,+Ṣigba, nulunọ ma nọ jlo na lẹ́ sọn oylan kọ̀n.+
20 Mẹhe nọ zinzọnlin hẹ nuyọnẹntọ na yọnnuin,+Ṣigba, mẹhe nọ dogbẹ́ hẹ nulunọ ma na tindo kọdetọn dagbe.+
21 Nugbajẹmẹji wẹ nọ dómọna ylandonọ lẹ,+Ṣigba, kọdetọn dagbe wẹ yin ale dodonọ tọn.+
22 Mẹdagbe nọ jo ogú do na ovivi etọn lẹ,Ṣigba, adọkun ylandonọ tọn na yin hihla dai na dodonọ.+
23 Ogle wamọnọ tọn he yin pipọ̀ nọ de núdùdù susu tọ́n,Ṣigba, e* sọgan yin piplọ́ sọyi gbọn mawadodo dali.
24 Mẹdepope he gọ̀ obá* etọn dogodo gbẹwanna visunnu etọn,+Ṣigba, mẹhe yiwanna ẹn nọ yí sọwhiwhe do* domẹplọnlọ e go.+
25 Dodonọ nọ dùnú bo nọ gọ́ho,*+Ṣigba, adọ̀go mẹylankan tọn nọ nọ̀ ovọ́.+
Nudọnamẹ Odò Tọn
^ Kavi “wọhẹ.”
^ To paa mẹ, “onù.”
^ Kavi “họ́ nuhe dọ e te.”
^ Kavi “alindọn.”
^ Kavi “alindọn etọn.”
^ Kavi “alindọn he.”
^ To paa mẹ, “na yin hinhẹn dojó.”
^ Kavi “alindọn.”
^ To paa mẹ, “wamọnọ ma nọ sè nugbẹnamẹ.”
^ To paa mẹ, “nọ jaya.”
^ Kavi “nọ dewé dopọ.”
^ To paa mẹ, “yí alọ do bẹpli.”
^ Kavi “Adọkun he wá sọn ovọ́ mẹ.”
^ Kavi “Todido.”
^ Kavi “ohó lọ.”
^ Kavi “osẹ́n.”
^ Kavi “alindọn de.”
^ Kavi “ewọ.”
^ Kavi “mẹplọnlọ; yasanamẹ.”
^ Kavi vlavo, “nọ yawu.”
^ Kavi “nọ gọ́ho na alindọn etọn.”
