Jọṣua 18:1-28
18 Whenẹnu wẹ pipli Islaelivi lẹ tọn pete pli do Ṣilo,+ bo tùn gòhọ opli tọn lọ ai do finẹ,+ na yé ko yí aigba lọ todin wutu.+
2 Ṣigba, hẹnnu ṣinawe gbẹ́ pò to Islaelivi lẹ mẹ he ogú yetọn ma ko yin mimá na yé.
3 Enẹwutu, Jọṣua dọna Islaelivi lẹ dọmọ: “Nawẹ e na dẹnsọ bọ mìwlẹ na to awuwhle nado yì bo yí aigba lọ he Jehovah Jiwheyẹwhe tọgbo mìtọn lẹ tọn ko na mì?+
4 Mì de sunnu atọ̀n sọn hẹnnu dopodopo mẹ, na yẹn nido do yé hlan; yewlẹ na yì bo dán gbọn aigba lọ pete ji bosọ jlẹ ẹ sọgbe hẹ ogú yetọn. Enẹgodo, yé na lẹkọwa dè e.
5 Yé dona má ẹn do ṣinawe to yede ṣẹnṣẹn.+ Juda na gbọṣi aigba etọn ji to hùwaji,+ bọ whédo Josẹfu tọn na gbọṣi aigba yetọn ji to agewaji.+
6 Na mìwlẹ tọn, mì jlẹ aigba lọ bo má ẹn do ṣinawe bosọ hẹn yé wá dè e tofi, bọ yẹn na de ovò+ na mì tofi to Jehovah Jiwheyẹwhe mítọn nukọn.
7 Ṣigba, Levinu lẹ ma tindo mimá de to ṣẹnṣẹn mìtọn,+ na yẹwhenọduta Jehovah tọn wẹ ogú yetọn;+ podọ Gad, Leubẹni po mado-awe hẹnnu Manasse tọn po+ ko mọ ogú yetọn he Mose devizọnwatọ Jehovah tọn na yé lọ yí to whèzẹtẹn-waji Jọdani tọn.”
8 Sunnu lọ lẹ wleawu nado yì bọ Jọṣua degbena mẹhe jei aigba lọ jlẹ gbé lẹ dọmọ: “Mì yì bo dán gbọn aigba lọ ji bo jlẹ ẹ bosọ lẹkọwa dè e, podọ yẹn na de ovò na mì tofi to Jehovah nukọn to Ṣilo.”+
9 To whenẹnu, sunnu lọ lẹ yì bo dán gbọn aigba lọ ji bosọ jlẹ ẹ bo yí tòdaho lọ lẹ do má ẹn do ṣinawe, yé sọ basi kandai etọn do owe de ji. Enẹgodo, yé wá Jọṣua dè to osla lọ mẹ to Ṣilo.
10 Jọṣua sọ de ovò na yé to Ṣilo to Jehovah nukọn.+ Finẹ wẹ Jọṣua má aigba lọ na Islaelivi lẹ te, sọgbe hẹ mimá yetọn lẹ.+
11 Aigba he yin mimá gbọn ovò dide dali na hẹnnu Bẹnjamini tọn sọgbe hẹ whẹndo yetọn lẹ tin to omẹ Juda tọn lẹ tọn+ po omẹ Josẹfu tọn lẹ tọn+ po ṣẹnṣẹn.
12 To agewaji, dogbó yetọn bẹsọn Jọdani, dogbó lọ sọ hẹji yì dòdòmẹ Jẹliko+ tọn to agewaji bo hẹji yì osó lọ ji to whèyihọ-waji bosọ dlẹnkan yì danfafa Bẹti-aveni+ tọn ji.
13 Dogbó lọ sọ tọ́n sọn finẹ yì Luzi, to dòdòmẹ Luzi tọn to hùwaji, enẹ wẹ Bẹtẹli;+ dogbó lọ jẹte yì Atalọti-adali+ to osó he tin to hùwaji na Dòwaji Bẹti-holọni+ tọn ji.
14 Podọ dogbó adà whèyihọ-waji tọn lọ tọn yin dide bo lilẹ́ pànta hùwaji sọn osó he pannukọn Bẹti-holọni kọ̀n yì hùwaji; e nọte do Kiliati-baali, enẹ wẹ Kiliati-jealimi,+ yèdọ tòdaho Juda tọn de. Ehe wẹ adà whèyihọ-waji tọn.
15 Adà hùwaji tọn lọ bẹsọn vivọnu Kiliati-jealimi tọn, bọ dogbó lọ dlẹnkan yì whèyihọ-waji; e sọ dlí yì asisa osin Neftoa tọn+ kọ̀n.
16 Dogbó lọ jẹte yì vivọnu osó he pannukọn Agbàdo Visunnu Hinọmi tọn+ lọ tọn kọ̀n, ehe tin to Agbàdo Lefaimi+ tọn mẹ to agewaji, podọ e jẹte yì Agbàdo Hinọmi tọn mẹ, yì dòdòmẹ Jẹbusinu+ lẹ tọn to hùwaji bosọ jẹte yì Ẹn-logẹli.+
17 Podọ dogbó lọ yin dide yì agewaji bo dlẹnkan yì Ẹn-ṣemẹṣi bosọ dlí yì Geliloti he pannukọn agawaji Adumimi tọn,+ e sọ jẹte yì zannu+ Bohani+ visunnu Leubẹni tọn kọ̀n.
18 E sọ gbọnmọ yì dòdòmẹ agewaji tọn he pannukọn Alaba bo jẹte yì Alaba.
19 Dogbó lọ sọ gbọnmọ yì dòdòmẹ Bẹti-hogla+ tọn he to agewaji, podọ dogbó lọ nọte do zẹklan Ohù Ojẹ̀ tọn*+ he to agewaji lọ kọ̀n to Jọdani tó to hùwaji. Ehe wẹ dogbó hùwaji tọn.
20 Podọ Jọdani wẹ yin dogbó etọn to adà whèzẹtẹn-waji tọn. Ehelẹ wẹ dogbó ogú kúnkan Bẹnjamini tọn lẹ tọn lẹdo pé sọgbe hẹ whẹndo yetọn lẹ.
21 Podọ tòdaho hẹnnu Bẹnjamini tọn sọgbe hẹ whẹndo yetọn lẹ wẹ: Jẹliko, Bẹti-hogla, Ẹmẹki-kezizi,
22 Bẹti-alaba,+ Zemalaimi, Bẹtẹli,+
23 Avimi, Pala, Ofla,
24 Kefali-amọni, Ofni po Geba+ po—tòdaho 12 po gbétatò yetọn lẹ po.
25 Gibeọni,+ Lama, Beẹlọti,
26 Mizpẹ, Kefila, Moza,
27 Lekẹmi, Ilipeẹli, Talalahi,
28 Zẹla,+ Ha-elẹfi po Jẹbusi po, enẹ wẹ Jelusalẹm,+ gọna Gibea+ po Kiliati po—tòdaho 14 po gbétatò yetọn lẹ po.
Ogú kúnkan Bẹnjamini tọn lẹ tọn sọgbe hẹ whẹndo yetọn lẹ niyẹn.
Nudọnamẹ Odò Tọn
^ Enẹ wẹ, Ohù Kúkú.
