Jọṣua 9:1-27
9 Whenue ahọlu he nọ nọ̀ whèyihọ-waji Jọdani tọn+ lẹpo sè nuhe jọ, yèdọ ahọlu lọ lẹ he tin to lẹdo osó tọn mẹ, to Ṣefela, gbọn Ohù Daho* lọ pete tó,+ podọ to Lẹbanọni nukọn—enẹ wẹ Hetinu lẹ, Amolinu lẹ, Kenaninu lẹ, Pelizinu lẹ, Hivinu lẹ po Jẹbusinu lẹ po+—
2 yé kọngbedopọ bo bẹ yedelẹ pli nado funawhàn hẹ Jọṣua po Islaeli po.+
3 Mẹhe nọ nọ̀ Gibeọni+ lẹ lọsu sè nuhe Jọṣua ko wà na Jẹliko+ po Ai+ po.
4 Enẹwutu, yé yinuwa po zinzin po bo doagban do apò he ko dohó lẹ mẹ bosọ bẹ yé do kẹtẹkẹtẹ yetọn lẹ ji, gọna ayúgò ovẹn tọn he ko dohó bo là he yè ko vọ́ tọ̀ lẹ;
5 yé sọ do afọpa he ko ṣùn bo yin vivọ́ tọ̀ lẹ po avọ̀ he ko dohó lẹ po. Akla he tin to agbàn mẹ na yé lẹpo wẹ ko hú bo gbà do flinflin.
6 Enẹgodo, yé yì Jọṣua dè to osla lọ mẹ to Gilgali+ bo dọna ewọ po sunnu Islaeli tọn lẹ po dọmọ: “Fidindẹn wẹ mí wá sọn. Enẹwutu, mì jaale bo basi alẹnu de hẹ mí.”
7 Ṣigba, sunnu Islaeli tọn lẹ dọna Hivinu+ lọ lẹ dọmọ: “Vlavo lẹdo mítọn mẹ fi wẹ mìwlẹ nọ nọ̀. Enẹwutu, naegbọn mí nado basi alẹnu de hẹ mì?”+
8 Yé sọ gblọnna Jọṣua dọmọ: “Devizọnwatọ* towe wẹ míwlẹ.”
Jọṣua sọ dọna yé dọmọ: “Mẹnu wẹ mìwlẹ yin, podọ fie wẹ mì wá sọn?”
9 Whenẹnu, yé dọna ẹn dọmọ: “Fidindẹn taun+ de wẹ devizọnwatọ towe lẹ wá sọn na oyín Jehovah Jiwheyẹwhe towe tọn wutu, na mí ko sè dogbọn yindidi etọn po nuhe e ko wà to Egipti lẹpo po dali+
10 gọna nulẹpo he e wà na ahọlu Amolinu lẹ tọn awe he tin to awà awetọ* Jọdani tọn ji lọ lẹ, yèdọ Ahọlu Sihọni+ Hẹṣbọni tọn po Ahọlu Ogi+ Baṣani tọn po, he to Aṣtalọti.
11 Enẹ wẹ zọ́n bọ mẹho mítọn lẹ po mẹhe nọ nọ̀ aigba mítọn ji lẹpo po do dọna mí dọ, ‘Mì doagban bo zingbejizọnlin bosọ yì pé yé. Mì dọna yé dọmọ: “Míwlẹ na yin devizọnwatọ mìtọn;+ enẹwutu mì jaale bo basi alẹnu de hẹ mí.”’+
12 Akla mítọn ehelẹ he mí hẹn gbẹ́ to miyọ́nawu to azán he gbè mí doagban sọn owhé mítọn lẹ gbè nado wá mì dè fi. Todin, mì sọgan mọdọ yé ko hú bo gbà do flinflin.+
13 Podọ yọyọ wẹ ayúgò ovẹn tọn mítọn ehelẹ te to whenue mí kọ̀n ovẹn do yé mẹ, ṣigba todin, yé ko là.+ Avọ̀ po afọpa mítọn lẹ po ko sọ dohó na gbejizọnlin lọ dẹn tlala wutu.”
14 Enẹwutu, sunnu lọ lẹ yí delẹ to agbàn yetọn lẹ mẹ,* bo masọ dindona nudepope sọn Jehovah dè.+
15 Whenẹnu, Jọṣua basi jijọho hẹ yé+ bo basi alẹnu de hẹ yé nado jo yé dogbẹ̀, bọ ahọvi pipli lọ tọn lẹ whlé na yé domọ.+
16 Azán atọ̀n to whenue yé ko basi alẹnu de hẹ yé godo, yé sè dọ yé ma dẹn do yé podọ lẹdo yetọn mẹ finẹ wẹ yé nọ nọ̀.
17 Whenẹnu, Islaelivi lẹ wle ali bo yì tòdaho yetọn lẹ mẹ to azán atọ̀ntọ gbè; tòdaho yetọn lọ lẹ wẹ Gibeọni,+ Kefila, Beẹlọti po Kiliati-jealimi+ po.
18 Ṣigba, Islaelivi lẹ ma tọ́nawhàn yé, na ahọvi pipli lọ tọn lẹ ko yí Jehovah Jiwheyẹwhe Islaeli tọn do whlé na yé wutu.+ Enẹwutu, pipli lọ pete jẹ hùnhlún do ahọvi lọ lẹ go ji.
19 Ahọvi lọ lẹpo sọ dọna pipli lọ pete dọmọ: “Na míwlẹ ko yí Jehovah Jiwheyẹwhe Islaeli tọn do whlé na yé wutu, mí ma sọgan gbleawuna yé.
20 Nuhe mí na wà die: Mí ni jo yé dogbẹ̀, na homẹgble Jiwheyẹwhe tọn nikaa wá mí ji na whiwhle he mí ko whlé na yé lọ tọn wutu.”+
21 Ahọvi lọ lẹ sọ dọna yé dọmọ: “Mì jo yé dogbẹ̀, ṣigba mì gbọ yé ni lẹzun nake-datọ lẹ po osin-dọ̀ntọ lẹ po na pipli lọ pete.” Nuhe ahọvi lọ lẹ dopagbe etọn na yé niyẹn.
22 Todin, Jọṣua ylọ yé bo dọna yé dọmọ: “Naegbọn mìwlẹ do klọ mí dọ, ‘Fie dẹn do mì taun wẹ mí wá sọn,’ to whenuena e yindọ apá mítọn fi janwẹ mì nọ nọ̀?+
23 Bẹsọn din, mẹhodẹ̀do wẹ mìwlẹ,+ podọ afanumẹ wẹ mìwlẹ na yin tẹgbẹ, yèdọ nake-datọ po osin-dọ̀ntọ lẹ po na ohọ̀ Jiwheyẹwhe ṣie tọn.”
24 Yé gblọnna Jọṣua dọmọ: “Devizọnwatọ towe lẹ ko yin didọna hezeheze dọ Jehovah Jiwheyẹwhe mìtọn ko degbena Mose devizọnwatọ etọn nado na mì aigba lọ lẹpo podọ nado hù mẹhe nọ nọ̀ e ji lẹpo sudo sọn nukọn mìtọn.+ Enẹwutu wẹ mí do dibu tlala na ogbẹ̀* mítọn, na mìwlẹ tọn wutu,+ podọ enẹ wẹ zọ́n bọ mí do wà ehe.+
25 Todin, míwlẹ tin to alọ towe mẹ. Wà na mí kẹdẹdile e yọ́n bo sọgbe to nukun towe mẹ do.”
26 Ewọ sọ wà na yé domọ; e whlẹn yé sọn alọ Islaelivi lẹ tọn mẹ bọ yé ma hù yé.
27 Ṣigba, to azán enẹ gbè, Jọṣua hẹn yé zun nake-datọ lẹ po osin-dọ̀ntọ lẹ po na pipli lọ+ podọ na agbà Jehovah tọn to fidepope he Jiwheyẹwhe de,+ yèdọ kakajẹ egbehe.+
Nudọnamẹ Odò Tọn
^ Enẹ wẹ, Ohù Meditelane tọn.
^ Kavi “Afanumẹ.”
^ Enẹ wẹ, whèzẹtẹn-waji.
^ Kavi “gbeje delẹ to agbàn yetọn lẹ mẹ pọ́n.”
^ Kavi “alindọn.”
