Jakọbu 2:1-26
2 Mẹmẹsunnu ṣie lẹ emi, be nugbo wẹ dọ mìwlẹ to yise Oklunọ mítọn gigonọ lọ, Jesu Klisti tọn kọndopọ po mẹnukuntahopọn po ya?+
2 Na, eyin sunnu de wá opli mìtọn bo tindo alọkẹ sika tọn lẹ to alọ bosọ do avọ̀ whanpẹnọ, ṣigba bọ wamọnọ de he do avọ̀ he kudiho sọ wá ga,
3 be mìwlẹ nọ do nukundagbe hia mẹhe do avọ̀ whanpẹnọ lọ bo nọ dọmọ, “Hiẹ sinai tofi to otẹn dagbe de mẹ,” ṣigba bo nọ dọna wamọnọ lọ dọ, “Hiẹ gbọṣi ote” kavi, “Sinai to dọ́n to tokloafọligbe ṣie glọ” wẹ?+
4 Eyin mọ wẹ, be e ma yin hagbẹ ṣinyan wẹ mì te to mìde ṣẹnṣẹn,+ podọ be mì ma ko lẹzun whẹdatọ he to owhẹ̀ ylankan dá lẹ ya?+
5 Mì dotoai, mẹmẹsunnu mẹyiwanna ṣie lẹ emi. Be Jiwheyẹwhe ma ko de mẹhe yin wamọnọ to pọndohlan aihọn tọn mẹ lẹ nado yin adọkunnọ to yise mẹ+ podọ gudutọ Ahọluduta lọ tọn lẹ, ehe e dopagbe etọn na mẹhe yiwanna ẹn lẹ ya?+
6 Ṣigba, mìwlẹ ko dowinyan wamọnọ lọ. Be e ma yin adọkunnọ lẹ wẹ nọ gbidikọna mì+ bo nọ dọ̀n mì yì owhẹ̀ nukọn ya?
7 Be e ma yin yewlẹ wẹ nọ zánnu do oyín dagbe he yè yí do ylọ mì lọ go ya?
8 Todin, eyin mì to tonusena osẹ́n ahọlu tọn lọ dile adà Owe-wiwe tọn lọ dọ do dọmọ, “Hiẹ dona yiwanna kọmẹnu towe di dewe,”+ mì wà dagbe taun.
9 Ṣigba eyin mì zindonukọn nado to mẹnukuntahopọn,+ ylando wà wẹ mì te, podọ mì ko yin whẹgbledo* gbọn osẹ́n dali taidi sẹ́nhẹngbatọ lẹ.+
10 Na eyin mẹdepope nọ setonuna Osẹ́n lọ lẹpo ṣigba bo ṣì afọ ze to onú dopo mẹ, ewọ ko hùwhẹ to popolẹpo mẹ.+
11 Na mẹlọ he dọ dọ, “Hiẹ ma dona deayọ,”+ sọ dọ ga dọ, “Hiẹ ma dona hùhlọ̀n.”+ Todin, eyin hiẹ ma deayọ ṣigba bo ka hùhlọ̀n, hiẹ ko gbàsẹ́n.
12 Mì zindonukọn nado nọ dọho podọ nado nọ yinuwa domọ dile mẹhe na yin whẹdana gbọn osẹ́n mẹhe to yedekannu lẹ tọn* dali lẹ nọ wà do.+
13 Na mẹhe ma nọ do lẹblanu hia na mọ whẹdida etọn yí matin lẹblanu.+ Lẹblanu nọ duto whẹdida ji.
14 Ale tẹwẹ tin to e mẹ, mẹmẹsunnu ṣie lẹ emi, eyin mẹde dọ dọ emi tindo yise ṣigba bo ma tindo azọ́n lẹ?+ Yise enẹ ma sọgan whlẹn ẹn gán, kavi e sọgan wàmọ wẹ?+
15 Eyin mẹmẹsunnu kavi mẹmẹyọnnu depope ma tindo avọ̀* po núdùdù azán lọ gbè tọn po,
16 ṣogan bọ dopo to mì mẹ dọna ẹn dọ, “Yì to jijọho mẹ; agbasa towe ni hùnmiyọ́n na a ni dùnú gọ́ho,” ṣigba bọ mì ma na ẹn nuhe agbasa etọn tindo nuhudo etọn lẹ, ale tẹwẹ tin to e mẹ?+
17 Mọdopolọ ga, matin azọ́n lẹ, yise kẹdẹ na ede yin oṣiọ.+
18 Etomọṣo, mẹde na dọmọ: “Hiẹ tindo yise, bọ yẹn tindo azọ́n lẹ. Do yise towe hia mi matin azọ́n lẹ, yẹn nasọ do yise ṣie hia we gbọn azọ́n ṣie lẹ dali.”
19 Hiẹ yise dọ Jiwheyẹwhe dopo wẹ tin, kavi e ma yin mọ wẹ? Hiẹ wà dagbe taun. Ṣogan, aovi lẹ yise ga bosọ sisọ.+
20 Ṣigba, hiẹ omẹ vọnu E, be hiẹ jlo na yọnẹn dọ ovọ́ wẹ yise he ma tindo azọ́n lẹ yin ya?
21 Be e ma yin gbọn azọ́n lẹ dali wẹ Ablaham otọ́ mítọn yin lilá di dodonọ to whenuena e ko yí Isaki visunnu etọn do sanvọ́ to agbà lọ ji godo ya?+
22 Hiẹ mọdọ yise etọn yinuwa to pọmẹ hẹ azọ́n etọn lẹ bọ yise etọn yin hinhẹn zun pipé gbọn azọ́n etọn lẹ dali,+
23 podọ adà Owe-wiwe tọn lọ yin hinhẹndi he dọmọ: “Ablaham do yise hia to Jehovah* mẹ, bọ e yin hihia hlan ẹn di dodowiwa,”+ podọ e wá yin yiylọdọ họntọn Jehovah* tọn.+
24 Mì mọdọ gbọn azọ́n lẹ dali wẹ mẹde na yin lilá di dodonọ, e ma yin gbọn yise kẹdẹ dali gba.
25 To aliho dopolọ mẹ, be e ma yin gbọn azọ́n lẹ dali wẹ Lahabi galọtọ lọ lọsu yin lilá di dodonọ to whenuena e ko yí wẹnsagun lẹ bo do gbigbọ johẹmẹ tọn hia yé bosọ do yé hlan gbonu gbọn aliho devo ji godo ya?+
26 Na nugbo tọn, dile agbasa matin gbigbọ* yin oṣiọ do,+ mọkẹdẹ wẹ yise matin azọ́n lẹ yin oṣiọ do ga.+
Nudọnamẹ Odò Tọn
^ Kavi “wiwọhẹ.”
^ To paa mẹ, “osẹ́n mẹdekannujẹ tọn.”
^ To paa mẹ, “to omẹ́.”
^ Kavi “gbọfufu.”
