Kolosinu lẹ 3:1-25
3 Ṣigba, eyin mì ko yin zizedaga hẹ Klisti,+ mì zindonukọn nado to nuhe to aga lẹ dín, fihe Klisti sinai do adusilọ Jiwheyẹwhe tọn mẹ te.+
2 Mì nọ ze ayiha mìtọn do nuhe to aga lẹ+ ji to whepoponu, e ma yin do nuhe to aigba ji lẹ+ ji gba.
3 Na mìwlẹ ko kú, bọ ogbẹ̀ mìtọn ko yin whiwhla dopọ hẹ Klisti to kọndopọ mẹ hẹ Jiwheyẹwhe.
4 To whenuena Klisti, ogbẹ̀ mítọn,+ na yin hinhẹn sọawuhia, whenẹnu wẹ mìlọsu lẹ na yin hinhẹn sọawuhia hẹ ẹ to gigo mẹ.+
5 Enẹwutu, mì hù awutugonu mìtọn+ he to aigba ji lẹ, enẹ wẹ fẹnnuwiwa zanhẹmẹ tọn,* mawé, ojlo zogbe zanhẹmẹ tọn,+ ojlo ylankan po nukunkẹn po, he yin boṣiọ-sinsẹ̀n.
6 Onú enẹlẹ wutu wẹ homẹgble Jiwheyẹwhe tọn ja.
7 Mọ wẹ mìlọsu ko nọ yinuwa* do dai to aliho gbẹninọ tọn mìtọn hoho tọn mẹ.*+
8 Ṣigba todin, mì dona gbẹ́ onú ehe lẹpo dai mlẹnmlẹn: homẹgble, adi, ylanwiwa+ gọna mẹzunzun+ podọ mì de ohó gbigble+ lẹ sẹ̀ sọn onù mìtọn mẹ.
9 Mì ma nọ dolalo na ode awetọ blo.+ Mì de gbẹtọ-yinyin* hoho lọ+ po nuyiwa etọn lẹ po sẹ̀ sọn ogo,
10 bo yí gbẹtọ-yinyin yọyọ lọ dogo,+ ehe to yinyin hinhẹn jẹ yọyọ gbọn oyọnẹn he pegan dali sọgbe hẹ apajlẹ Mẹlọ he dá ẹ tọn,+
11 fie Glẹkinu kavi Ju ma tin te, adàgbigbo kavi adàmagbo, jonọ, Skitianu,* afanumẹ kavi mẹhe to edekannu de ma tin te; ṣigba Klisti wẹ nulẹpo bosọ tin to popo mẹ.+
12 Enẹwutu, taidi mẹdide Jiwheyẹwhe tọn lẹ,+ yèdọ mẹwiwe po mẹyiwanna lẹ po, mì yí owanyi sisosiso awuvẹmẹ tọn,+ homẹdagbe, whiwhẹ,*+ walọmimiọn+ po homẹfa+ po dogo.
13 Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii+ eyin mẹde tlẹ tindo whẹwhinwhẹ́n nado wọ́ po mẹdevo po.+ Kẹdẹdile Jehovah* jona mì sọn ojlo mẹ wá do, mọ wẹ mì dona nọ wà do ga.+
14 Ṣigba, hú popolẹpo, mì yí owanyi dogo,+ na enẹ wẹ gẹdẹ he nọ kọ̀n gbẹtọ lẹ dopọ to aliho pipé de mẹ.+
15 Humọ, mì dike jijọho Klisti tọn ni nọ deanana mì to ahun mìtọn mẹ,*+ na jijọho enẹ mẹ wẹ mì yin oylọ-basina do to agbasa dopo mẹ. Mì nisọ nọ dopẹ́.
16 Mì gbọ ohó Klisti tọn ni nọ nọ̀ mì mẹ to gigọ́ mẹ to nuyọnẹn lẹpo mẹ. Mì nọ to ode awetọ mìtọn plọn bo nọ to tulina* ode awetọ zọnmii gbọn salmu lẹ,+ pipà lẹ nina hlan Jiwheyẹwhe gọna ohàn gbigbọmẹ tọn lẹ jiji po pinpẹn-nutọn-yinyọnẹn* po dali bo nọ to hànji to ahun mìtọn mẹ hlan Jehovah.*+
17 Nudepope he mì to wiwà to ohó mẹ kavi to walọ mẹ, mì nọ wà nulẹpo to oyín Oklunọ Jesu tọn mẹ bo nọ dopẹna Jiwheyẹwhe Otọ́ lọ gbọn ewọ gblamẹ.+
18 Mì asi lẹ emi, mì nọ yin mẹmẹglọ na asu mìtọn,+ dile e jẹ do to Oklunọ mẹ.
19 Mì asu lẹ emi, mì nọ yiwanna asi mìtọn+ bo ma nọ gblehomẹ sinsinyẹn* do yé go blo.+
20 Mì ovi lẹ emi, mì nọ setonuna mẹjitọ mìtọn lẹ to nulẹpo mẹ,+ na ehe wẹ nọ hẹn homẹ Oklunọ tọn hùn.
21 Mì otọ́ lẹ emi, mì ma nọ hẹn homẹgble* ovi mìtọn lẹ blo,+ na yé nikaa gbọjọ.
22 Mì afanumẹ lẹ emi, mì nọ setonu to nulẹpo mẹ na mẹhe yin ogán mìtọn* lẹ,+ e ma yin to whenue yé to mimọ mì kẹdẹ gba, nado hẹn homẹhun gbẹtọ lẹ,* ṣigba po ahundoponọ-yinyin po, to budisi Jehovah* mẹ.
23 Nudepope he mì to wiwà, mì nọ wà ẹ po alindọn* lẹpo po taidi na Jehovah,*+ e ma yin na gbẹtọ lẹ,
24 na mì yọnẹn dọ Jehovah* dè wẹ mì na mọ ogú lọ yí sọn taidi ale.+ Mì nọ wazọ́n di afanumẹ na Ogán lọ, yèdọ Klisti.
25 Na nugbo tọn, mẹhe nọ waylan na mọ ale oylan he e wà lọ tọn yí,+ podọ mẹnukuntahihopọn de ma tin.+
Nudọnamẹ Odò Tọn
^ Kavi “zinzọnlin.”
^ Kavi “to whenue mì to gbẹnọ to aliho enẹ mẹ dai.”
^ To paa mẹ, “gbẹtọ.”
^ “Skitianu” dlẹnalọdo mẹhe ma hùn nukun lẹ.
^ Kavi “mẹdezewhè.”
^ Kavi “ni nọ deanana ahun mìtọn.”
^ Kavi “tudohomẹna.”
^ Kavi “ojọmiọn.”
^ Kavi “fiẹ.”
^ Kavi “nọ doadihomẹna.”
^ To paa mẹ, “ogán mìtọn to agbasa-liho.”
^ To paa mẹ, “e ma yin po nuyiwa mẹnukunta-zọ́n tọn lẹ po, taidi nukundagbe gbẹtọ tọn dintọ lẹ.”
