Lomunu lẹ 11:1-36
11 To whelọnu lo, yẹn kanse dọ, Jiwheyẹwhe ma gbẹ́ omẹ etọn lẹ dai, kavi e wàmọ wẹ?+ Gbede pọ́n! Na Islaelivi de wẹ yẹnlọsu yin ga, sọn kúnkan* Ablaham tọn mẹ, podọ sọn hẹnnu Bẹnjamini tọn mẹ.
2 Jiwheyẹwhe ma gbẹ́ omẹ etọn he ewọ na ayidonugo jẹnukọn lẹ dai gba.+ Be mìwlẹ ma yọ́n nuhe adà Owe-wiwe tọn lọ dọ gando Elija go, to whenue e basi ovẹvivẹ hlan Jiwheyẹwhe sọta Islaeli wẹ ya?
3 “Jehovah,* yé ko hù yẹwhegán towe lẹ, yé ko họ́ agbà towe lẹ liai, bọ e wá pò yẹn ṣo, podọ todin yé sọ to okú* ṣie dín.”+
4 Ṣogan, etẹwẹ Jiwheyẹwhe dọna ẹn? “Yẹn ko pò sunnu 7 000 dai na dee, yèdọ sunnu lọ lẹ he ma ko jẹklo na Baali.”+
5 Enẹwutu, to aliho ehe mẹ, pipotọ de ko yin jijodo to ojlẹ ehe mẹ ga+ bo yin dide gbọn nukundagbe majẹhẹ gblamẹ.
6 Todin, eyin ehe yin gbọn nukundagbe majẹhẹ dali,+ be e masọ yin gbọn azọ́n lẹ gblamẹ ba;+ eyin e ma yinmọ, be nukundagbe majẹhẹ masọ yin nukundagbe majẹhẹ ba.
7 To whelọnu lo, etẹwẹ mí na dọ? Islaeli ma mọ nulọ he e to dindin vẹkuvẹku yí, ṣigba mẹhe yin dide lẹ mọ ẹn yí.+ Podọ wuntuntun mẹhe pò lẹ tọn ko depò,+
8 kẹdẹdile e yin kinkandai do dọmọ: “Jiwheyẹwhe ko na yé gbigbọ amlọn yìkànmẹ tọn de,+ e ko na yé nukun lẹ he ma sọgan mọnú bo ko na yé otó lẹ he ma sọgan sènu, kakajẹ azán ehe gbè.”+
9 Humọ, Davidi dọmọ: “Gbọ tafo yetọn ni lẹzun omọ̀ de, fẹ́ṣà de, zannu ahlida tọn de po ahọsumẹ de po na yé.
10 Gbọ nukun yetọn lẹ ni dózin sọmọ bọ yé ma sọgan mọnú, podọ hẹn yé nado nọ dẹ́ nẹgbé yetọn lẹ do odò to whepoponu.”+
11 Enẹwutu, yẹn kanse dọ, Yé ma dahli bo jai mlẹnmlẹn, kavi yé wàmọ wẹ? Gbede pọ́n! Ṣigba, na afọ he yé ṣì ze wutu, whlẹngán wá na omẹ akọta lẹ tọn, nado fọ́n awuwhàn yetọn dote.+
12 Todin, eyin afọ he yé ṣì ze dekọtọn do dona susugege mẹ na aihọn lọ, bọ didepo yetọn dekọtọn do dona susugege mẹ na omẹ akọta lẹ tọn,+ lehe sọha yetọn to gigọ́ mẹ na dekọtọn do dona susugege mẹ do sọ!
13 Todin, yẹn to hodọna mì omẹ akọta lẹ tọn. Mimọdọ yẹn yin apọsteli de na akọta lẹ,+ yẹn pọ́n lizọnyizọn ṣie hlan taidi onú gigonọ de+
14 nado yọnẹn eyin yẹn sọgan gbọn aliho de mẹ fọ́n awuwhàn omẹ* ṣie titi lẹ tọn dote bo whlẹn delẹ to yé mẹ gán.
15 Na eyin gbigbẹ́ yé dai+ dekọtọn do whẹgbigbọ mẹ na aihọn, etẹ mẹ wẹ alọkikẹyi yé na dekọtọn do adavo sọn okú mẹ wá ogbẹ̀ mẹ?
16 Humọ, eyin adà linfin yinyan lọ tọn he yin yíyí taidi sinsẹ́n tintan lẹ yin wiwe, be linfin yinyan lọ blebu lọsu yin wiwe ga; podọ eyin adọ̀ lọ yin wiwe, be alà lẹ lọsu yinmọ ga.
17 Ṣigba, eyin delẹ to alà lẹ mẹ yin finfẹ́n sẹ̀ bọ dile etlẹ yindọ hiẹ yin olivie nukanmẹ tọn de, hiẹ yin tùntùn do ṣẹnṣẹn yetọn bo lẹzun mimátọ de to adọ̀ dojó olivie tọn mẹ,
18 a doawagun do alà he yin finfẹ́n sẹ̀ lẹ ji blo. Ṣigba, eyin hiẹ to awagundo do yé ji,+ flindọ e ma yin hiẹ wẹ hẹn adọ̀ lọ dote gba, ṣigba adọ̀ lọ wẹ hẹn we dote.
19 To whenẹnu, hiẹ na dọmọ: “Alà lẹ yin finfẹ́n sẹ̀ na yẹn nido sọgan yin tùntùn do e go.”+
20 Nugbo wẹ! Na yise matindo yetọn wutu wẹ yé yin finfẹ́n sẹ̀,+ ṣigba hiẹ to ote gbọn yise dali.+ A ze dewe daga blo, ṣigba tindo budisi.
21 Na eyin Jiwheyẹwhe ma hlá alà jọwamọ tọn lẹ dote, mọdopolọ e ma na hlá we dote.
22 Enẹwutu, lẹnnupọndo homẹdagbe+ po homẹgble Jiwheyẹwhe tọn po ji. Homẹgble tin na mẹhe jai lẹ,+ ṣigba homẹdagbe Jiwheyẹwhe tọn tin na hiẹ eyin a gbọṣi homẹdagbe etọn mẹ; eyin e ma yinmọ, hiẹ lọsu na yin finfẹ́n sẹ̀ ga.
23 Yelọsu ga, eyin yé ma gbọṣi yise matindo yetọn mẹ, yé na yin tùntùn do e go,+ na Jiwheyẹwhe penugo nado vọ́ tùn yé do e go.
24 Na eyin hiẹ yin sinsán sẹ̀ sọn atin olivie tọn he tin to nukanmẹ to jọwamọ-liho lọ go bo yin tùntùn to aliho he ma yin jọwamọ tọn mẹ do atin olivie tọn he tin to jipa mẹ lọ go, nẹmunẹmu wẹ alà ehelẹ he yin jọwamọ tọn ma na yin vivọ́ tùn do atin olivie tọn yetọn titi go!
25 Mẹmẹsunnu lẹ emi, na yẹn ma jlo dọ mìwlẹ ni tin to wunvi mẹ gando aṣli wiwe ehe go,+ na mì nikaa yin nuyọnẹntọ to nukun mìtọn titi mẹ: Wuntuntun Islaeli tọn ko depò jẹ obá de mẹ kakajẹ whenue sọha omẹ akọta lẹ tọn to gigọ́ mẹ na ko pé,
26 podọ to aliho ehe mẹ Islaeli lẹpo+ na yin whinwhlẹngán. Kẹdẹdile e ko yin kinkandai do dọmọ: “Ziọni wẹ whlẹngántọ lọ na wá sọn+ bo na de walọ jijọ-madi-Jiwheyẹwhe tọn lẹ sẹ̀ sọn ovi Jakọbu tọn lẹ ṣẹnṣẹn.
27 Podọ ehe wẹ alẹnu he yẹn basi hẹ yé,+ to whenue yẹn de ylando yetọn lẹ sẹ̀.”+
28 Na nugbo tọn, na wẹndagbe lọ tọn wutu wẹ yé yin kẹntọ lẹ na mìtọn wutu; ṣigba na mẹdide he Jiwheyẹwhe basi wutu, yé yin mẹyiwanna lẹ na tọgbo yetọn lẹ wutu.+
29 Na nunina lẹ po oylọ-basinamẹ Jiwheyẹwhe tọn po ma yin nuhe na vẹna ẹn gba.
30 Na kẹdẹdile mìwlẹ ko yin tolivẹtọ na Jiwheyẹwhe dai+ ṣigba bọ lẹblanu ko yin didohia mì todin+ na tolivivẹ yetọn wutu do,+
31 mọdopolọ todin, omẹ ehelẹ lọsu ko yin tolivẹtọ bọ lẹblanu dekọtọn sọn e mẹ na mì, na lẹblanu nido sọgan yin didohia yelọsu lẹ ga todin.
32 Na Jiwheyẹwhe ko hẹn yemẹpo to pọmẹ zun mẹmẹglọ tolivivẹ tọn,+ na ewọ nido sọgan do lẹblanu hia yemẹpo.+
33 Lehe dona susugege, nuyọnẹn po oyọnẹn Jiwheyẹwhe tọn po siso do sọ! Lehe whẹdida etọn lẹ yin dinmamọdona bọ aliho etọn lẹ ma yọ́n dinmọ do sọ!
34 Na “mẹnu wẹ ko wá yọ́n ayiha Jehovah* tọn kavi mẹnu wẹ ko lẹzun ayinamẹtọ etọn?”+
35 Kavi, “mẹnu wẹ ko na ẹn nude jẹnukọn, bọ ewọ dona gọjona ẹn?”+
36 Na nulẹpo wẹ wá sọn ewọ dè podọ gbọn ewọ dali podọ na ewọ. Gigo ni tin hlan ewọ kakadoi. Niṣẹ.*
Nudọnamẹ Odò Tọn
^ To paa mẹ, “okún.”
^ Kavi “alindọn.”
^ To paa mẹ, “agbasalan.”
^ Kavi “Amẹn” to Glẹkigbe mẹ.
