Lomunu lẹ 13:1-14
13 Mì gbọ mẹlẹpo* ni yin mẹmẹglọ na aṣẹpipa daho lẹ,+ na aṣẹpipa depope ma tin bọ e ma yin sọn Jiwheyẹwhe dè;+ aṣẹpipa he tin lẹ, Jiwheyẹwhe wẹ na yé otẹn he tindo dogbó yetọn lẹ.+
2 Enẹwutu, mẹdepope he jẹagọdo aṣẹpipa ko diọnukunsọ tito Jiwheyẹwhe tọn; mẹhe diọnukunsọ ẹ lẹ na hẹn whẹdida wá yede ji.
3 Na gandutọ enẹlẹ nọ yin budisi, e ma yin gbọn mẹhe to walọ dagbe zan lẹ dali gba, ṣigba gbọn mẹhe to nuylankan wà lẹ dali.+ Be hiẹ jlo na vò sọn budidi na aṣẹpipa si ya? Nọ to dagbe wà,+ hiẹ nasọ mọ pipà yí sọn e dè;
4 na lizọnyizọnwatọ Jiwheyẹwhe tọn wẹ e yin na we na dagbe towe. Ṣigba, eyin hiẹ to nuhe yin ylankan wà, nọ dibu, na e ma yin tata wẹ e hẹn ohí lọ gba. Lizọnyizọnwatọ Jiwheyẹwhe tọn wẹ e yin, yèdọ ahọsuyitọ nado do homẹgble hia* mẹhe to nuylankan wà.
5 Enẹwutu, dandan wẹ e yin na mì nado yin mẹmẹglọ, e ma yin na homẹgble enẹ kẹdẹ wutu gba, ṣigba na ayihadawhẹnamẹnu mìtọn wutu ga.+
6 Enẹwutu wẹ mìwlẹ do to tòkuẹ lẹ na ga; na devizọnwatọ gbangba tọn Jiwheyẹwhe tọn lẹ wẹ yé yin bo nọ to lẹndai ehe hẹndi to whepoponu.
7 Mì nọ na mẹdopodopo nuhe e jẹna: tòkuẹ na mẹhe tòkuẹ jẹna;+ takuẹ na mẹhe takuẹ jẹna; budisi na mẹhe budisi jẹna;+ gbégbò na mẹhe gbégbò jẹna.+
8 Mì duahọ nudepope tọn do mẹde blo, adavo nado yiwanna ode awetọ;+ na mẹdepope he yiwanna hatọ etọn ko hẹn osẹ́n di.+
9 Na todohukanji osẹ́n tọn he dọ, “Hiẹ ma dona deayọ,+ hiẹ ma dona hùhlọ̀n,+ hiẹ ma dona fìnnú,+ hiẹ ma dona donukunkẹn,”+ gọna gbedide devo depope he pò ko yin bibladopọ to hogbe ehe mẹ dọ: “Hiẹ dona yiwanna kọmẹnu towe di dewe.”+
10 Owanyi ma nọ wà nuylankan do kọmẹnu etọn go;+ enẹwutu, owanyi wẹ hẹndi osẹ́n tọn.+
11 Mì sọ nọ wà ehe, na mìwlẹ yọ́n ojlẹ he mẹ mí tin te ehe, dọ ojlẹ lọ ko wá na mì nado fọ́n sọn amlọn mẹ,+ na whlẹngán mítọn ko sẹpọ hugan ojlẹ he mẹ mí lẹzun yisenọ te.
12 Ozán ko sẹyì taun; ai ko dibla họ́n. Enẹwutu, mì gbọ mí ni klọ́n azọ́n he yin zinvlu tọn lẹ dai+ bo gbọ mí ni ze gbaja hinhọ́n tọn lẹ dogo.+
13 Mì gbọ mí ni zinzọnlin jijlọ+ taidi to okle, e ma yin to agọ́-gànyìn,* ahànnu-zẹjlẹgo, fẹnnuwiwa zanhẹmẹ tọn, walọ gblezọn tasinsinyẹn tọn,*+ avùn po awuwhàn po mẹ gba.+
14 Ṣigba, mì ze Oklunọ Jesu Klisti dogo,+ mì sọ nọ basi tito dai na ojlo agbasalan tọn lẹ blo.+
