Lomunu lẹ 2:1-29
2 Enẹwutu, a ma tindo whẹjijọ, hiẹ dawe E, mahopọnna mẹdepope he hiẹ yin,+ eyin hiẹ nọ dawhẹnamẹ; na whenue a to whẹdana mẹdevo, a to whẹgbledo dewe, na hiẹ he to whẹda to nudopolọ lẹ wà.+
2 Todin, mí yọnẹn dọ whẹdida Jiwheyẹwhe tọn tin to kọndopọ mẹ hẹ nugbo bosọ jẹagọdo mẹhe nọ wà onú mọnkọtọn lẹ.
3 Ṣigba, hiẹ dawe E, to whenue a to whẹdana mẹhe nọ wà onú mọnkọtọn lẹ ṣogan bọ hiẹ lọsu to yé wà, be a lẹndọ a na họ̀ngán sọn whẹdida Jiwheyẹwhe tọn mẹ ya?
4 Kavi be hiẹ nọ gbẹkọ homẹdagbe,+ linsinsinyẹn*+ po homẹfa+ susugege etọn po go, na hiẹ ma yọnẹn dọ Jiwheyẹwhe to tintẹnpọn nado hẹn we jẹ lẹnvọjọ kọ̀n to homẹdagbe etọn mẹ wutu wẹ?+
5 Ṣigba, sọgbe hẹ tasinsinyẹn towe po ahun he ma tindo lẹnvọjọ towe po, hiẹ to homẹgble bẹpli na dewe hlan azán homẹgble tọn po awusọhia whẹdida dodo Jiwheyẹwhe tọn tọn po gbè.+
6 Ewọ nasọ suahọ mẹdopodopo sọgbe hẹ azọ́n etọn lẹ:+
7 ogbẹ̀ madopodo na mẹhe to gigo, gbégbò po magble+ po dín gbọn akọndonanu to azọ́n he yin dagbe lẹ mẹ dali;
8 amọ́ na mẹhe tindo gbigbọ wiwọ́ tọn bo nọ vẹtolina nugbo ṣigba bo nọ setonuna mawadodo lẹ, adi po homẹgble po na wá yé ji.+
9 Nukunbibia po ayimajai po na wá mẹhe nọ wà azọ́n ylankan lẹpo ji,* yèdọ Ju lẹ ji whẹ́ podọ Glẹkinu lẹ ji ga;
10 ṣigba gigo, gbégbò po jijọho po na mẹhe nọ wà azọ́n he yin dagbe lẹpo, na Ju lẹ whẹ́+ podọ na Glẹkinu lẹ ga.+
11 Na mẹnukuntahihopọn depope ma tin to Jiwheyẹwhe dè.+
12 Na mẹhe ma to osẹ́n glọ bo waylando lẹpo na dọ̀n dile etlẹ yindọ yé ma to osẹ́n glọ;+ ṣigba mẹhe waylando to osẹ́n glọ lẹpo na yin whẹdana gbọn osẹ́n dali.+
13 Na e ma yin mẹhe nọ dotoaina osẹ́n wẹ yin dodonọ to Jiwheyẹwhe nukọn gba, ṣigba mẹhe nọ yìn osẹ́n wẹ na yin lilá di dodonọ.+
14 Na to whenue omẹ akọta lẹ tọn he ma tindo osẹ́n+ nọ wà nuhe yin osẹ́n tọn lẹ gbọn jọwamọ dali, omẹ ehelẹ, dile etlẹ yindọ yé ma tindo osẹ́n yin osẹ́n de na yede.
15 Yelọsu titi wẹ nọ dohia dọ nuhe osẹ́n bẹhẹn lẹ ko yin kinkan do ahun yetọn lẹ mẹ, to whenue ayihadawhẹnamẹnu yetọn to kunnudena yé, bọ yé to yinyin whẹsadokọna kavi tlẹ yin whẹsuna gbọn linlẹn yetọn titi dali.*
16 Ehe na jọ to azán lọ gbè to whenuena Jiwheyẹwhe na gbọn Klisti Jesu gblamẹ dawhẹna onú whiwhla gbẹtọvi lẹ tọn,+ sọgbe hẹ wẹndagbe he yẹn lá.
17 Todin, eyin hiẹ yin yiylọdọ Ju+ bo nọ ganjẹ osẹ́n go bosọ nọ doawagun to Jiwheyẹwhe mẹ,
18 bọ hiẹ yọ́n ojlo etọn bosọ kẹalọyi nuhe yọ́n hugan lẹ na yè ko plọn* Osẹ́n lọ we wutu,+
19 podọ hiẹ kudeji dọ alihiamẹtọ de wẹ hiẹ na nukuntọ́nnọ lẹ, yèdọ hinhọ́n de na mẹhe to zinvlu mẹ lẹ,
20 nuplọnmẹtọ nulunọ lẹ tọn, mẹplọntọ ovi pẹvi lẹ tọn, he tindo adà tangan oyọnẹn tọn po nugbo lọ tọn po to Osẹ́n lọ mẹ—
21 ṣigba, be hiẹ mẹhe to mẹdevo plọn, ma plọn dewe wẹ?+ Hiẹ he to yẹwhehodọ dọ, “A fìnnú blo,”+ be hiẹ nọ fìnnú wẹ?
22 Hiẹ mẹhe to didọ dọ, “A deayọ blo,”+ be hiẹ nọ deayọ wẹ? Hiẹ mẹhe gbẹwanna boṣiọ lẹ sinsinyẹn, be hiẹ nọ jẹajo to tẹmpli lẹ mẹ wẹ?
23 Hiẹ mẹhe nọ doawagun to osẹ́n mẹ, be gbọn Osẹ́n lọ gbigbà dali hiẹ ma to masin kọ̀n do Jiwheyẹwhe go wẹ?
24 Na “yè to nùzan do oyín Jiwheyẹwhe tọn go to akọta lẹ ṣẹnṣẹn na mìwlẹ tọn wutu,” kẹdẹdile e ko yin kinkandai do.+
25 Na nugbo tọn, adàgbigbo+ tindo ale kiki eyin hiẹ nọ yìn osẹ́n;+ ṣigba eyin hiẹ nọ gbàsẹ́n, adàgbigbo towe ko lẹzun adàmagbo.
26 Enẹwutu, eyin mẹhe ma gboadà+ de nọ payi nubiọtomẹsi dodo Osẹ́n lọ tọn lẹ go, adàmagbo etọn na yin pinpọnhlan taidi adàgbigbo, kavi e ma yin mọ wẹ?+
27 Podọ mẹhe ma gboadà to agbasa-liho na gbọn Osẹ́n lọ yìnyìn dali dawhẹna hiẹ mẹhe nọ gbàsẹ́n mahopọnna kandai osẹ́n tọn he hiẹ tindo po adàgbigbo towe po.
28 Na e ma yin mẹhe yin Ju to gbonu wẹ yin Ju,+ mọjanwẹ adàgbigbo ma yin dehe to gbonu to agbasa go do niyẹn.+
29 Ṣigba mẹhe yin Ju to homẹ wẹ yin Ju,+ adàgbigbo etọn sọ yin ahun mẹ tọn+ gbọn gbigbọ dali bọ e ma yin gbọn kandai osẹ́n tọn de dali gba.+ Jiwheyẹwhe dè wẹ pipà omẹ enẹ tọn nọ wá sọn, e ma yin sọn gbẹtọ lẹ dè.+
Nudọnamẹ Odò Tọn
^ Kavi “awujonanu.”
^ Kavi “na wá alindọn mẹdepope he nọ wazọ́n ylankan lẹ tọn ji.”
^ To paa mẹ, “to linlẹn yetọn titi mẹ.”
^ Kavi “ko yí onù do plọn.”
