Lomunu lẹ 3:1-31
3 To whelọnu lo, ale tẹwẹ Ju-yinyin tindo, kavi etẹwẹ yin ale adàgbigbo tọn?
2 E sù taun to aliho lẹpo mẹ. Jẹnukọn whẹ́, yewlẹ wẹ nulila wiwe Jiwheyẹwhe tọn lẹ yin zizedo alọmẹ na.+
3 To whenẹnu, etẹwẹ yin whẹho lọ? Eyin mẹdelẹ ma tindo yise, be yise matindo yetọn na hẹn nugbonọ-yinyin Jiwheyẹwhe tọn zun ovọ́ wẹ?
4 Gbede pọ́n! Ṣigba, mì gbọ Jiwheyẹwhe ni yin mimọ di nugbonọ,+ eyin gbẹtọ lẹpo tlẹ yin mimọ di lalonọ,+ dile e yin kinkandai do dọmọ: “Na hiẹ nido sọgan yin didohia di dodonọ to ohó towe lẹ mẹ bọ owhẹ̀ towe nido sọgan whẹ́n to whenuena yè to whẹdana we.”+
5 Ṣigba, eyin mawadodo mítọn hẹn dodowiwa Jiwheyẹwhe tọn tọ́nta, etẹwẹ mí na dọ? Jiwheyẹwhe ma yin mawadodonọ to whenue e do homẹgble etọn hia, kavi e yin mọ wẹ? (Yẹn to hogbe he gbẹtọvi lẹ jẹakọ hẹ lẹ yizan.)
6 Gbede pọ́n! Eyin Jiwheyẹwhe yin mawadodonọ, nawẹ e na dawhẹna aihọn do?+
7 Ṣigba, eyin lalodo wẹ yẹn tlẹ te bọ nugbo Jiwheyẹwhe tọn ko gbọnmọ dali yin hinhẹn gbayipe dogọ hlan gigo etọn, naegbọn yè sọ to whẹdana mi taidi ylandonọ de?
8 Podọ naegbọn e ma do yin didọ kẹdẹdile mẹdelẹ ko gbọn mẹhẹngble dali sọalọakọ́n dọ mí dọ do dọmọ, “Mì gbọ mí ni wà nuylankan lẹ, na nudagbe lẹ nido sọgan wá”? Owhẹ̀ he yin didá sọta omẹ enẹlẹ yin whẹdida dodo.+
9 Etẹwẹ lo? Be míwlẹ tin to ninọmẹ he pọnte hú de mẹ wẹ? Paali! Na mí ko do e hia hezeheze wayi dọ Ju lẹ podọ Glẹkinu lẹ, yèdọ mẹlẹpo wẹ to ylando glọ;+
10 kẹdẹdile e ko yin kinkandai do dọmọ: “Dodonọ de ma tin, e ma tlẹ yin dopo tata;+
11 mẹdepope ma tin he tindo zinzin; mẹdepope ma tin he nọ dín Jiwheyẹwhe.
12 Gbẹtọ lẹpo wẹ ko lẹhlan apadopo, yemẹpo wẹ ko lẹzun nuvọ́nọ; mẹdepope ma tin he nọ do homẹdagbe hia, yèdọ etlẹ yin mẹdopo tata.”+
13 “Vẹ́go yetọn taidi yọdò he to nùvo; yé ko yí odẹ́ yetọn do klọmẹ.”+ “Adí jàpàtà tọn wẹ to nùflo yetọn lẹ glọ.”+
14 “Podọ dẹ̀hodo po danudidọ po wẹ gọ́ onù yetọn mẹ.”+
15 “Afọ yetọn lẹ nọ yawu nado yì sọ̀n ohùn dai.”+
16 “Dindọn po awubla po tin to aliho yetọn lẹ ji,
17 podọ yé ma ko yọ́n aliho jijọho tọn.”+
18 “Yé ma nọ dibusi Jiwheyẹwhe.”+
19 Todin, mí yọnẹn dọ nuhe Osẹ́n lọ dọ lẹpo wẹ nọ dlẹnalọdo mẹhe to Osẹ́n lọ glọ lẹ, na onù lẹpo nido sọgan yin hinhẹn nabọẹ bọ aihọn lọ pete nido sọgan jẹna yasanamẹ Jiwheyẹwhe tọn.+
20 Enẹwutu, mẹdepope* ma na yin lilá di dodonọ to ewọ nukọn gbọn azọ́n osẹ́n tọn lẹ dali,+ na gbọn osẹ́n gblamẹ wẹ oyọnẹn he pegan gando ylando go nọ wá.+
21 Ṣigba todin, matin osẹ́n, dodowiwa Jiwheyẹwhe tọn ko yin didehia,+ dile Osẹ́n lọ po Yẹwhegán lẹ po ko dekunnu gando e go do,+
22 mọwẹ, dodowiwa Jiwheyẹwhe tọn gbọn yise to Jesu Klisti gblamẹ, na mẹhe tindo yise lẹpo. Na vogbingbọn depope ma tin.+
23 Na mẹlẹpo wẹ ko waylando bo whete do gigo Jiwheyẹwhe tọn go,+
24 podọ e taidi nunina vọnu+ de dọ yé yin lilá di dodonọ gbọn nukundagbe majẹhẹ etọn dali,+ gbọn ofligọ he Klisti Jesu suahọ etọn nado tún mí dote lọ dali.+
25 Jiwheyẹwhe ze e jo taidi avọ́nunina oyẹsu* tọn de+ gbọn yise to ohùn etọn mẹ dali.+ Ehe yinmọ, na e nido do dodowiwa edetiti tọn hia, na Jiwheyẹwhe gbọn linsinsinyẹn* dali to ylando he ko yin wiwà wayi lẹ jonamẹ.
26 Ehe yinmọ, na e nido sọgan do dodowiwa edetiti tọn hia+ to ojlẹ ehe mẹ, na ewọ nido sọgan yin dodonọ, etlẹ yin to whenue mẹhe tindo yise to Jesu mẹ lẹ to yinyin lilá di dodonọ.+
27 To whelọnu lo, fie wẹ awagundido lọ te lo? E ko busẹ sọn aimẹ. Gbọn osẹ́n tẹ dali? Be gbọn azọ́n lẹ dali wẹ?+ Paali, ṣigba gbọn osẹ́n yise tọn dali.
28 Na mí lẹndọ gbọn yise dali wẹ mẹde nọ yin lilá di dodonọ kakati ni yin gbọn azọ́n osẹ́n tọn lẹ dali.+
29 Kavi be Jiwheyẹwhe Ju lẹ kẹdẹ tọn wẹ ewọ yin ya?+ Be ewọ ma yin Jiwheyẹwhe akọta lẹ tọn ga wẹ ya?+ Mọwẹ, ewọ yin akọta lẹ tọn ga.+
30 To whenuena e yindọ Jiwheyẹwhe dopo wẹ tin,+ ewọ na lá mẹhe gboadà lẹ di dodonọ+ gbọn yise dali podọ mẹhe ma gboadà lẹ di dodonọ+ gbọn yise yetọn dali.
31 To whelọnu lo, be míwlẹ de osẹ́n sẹ̀ gbọn yise mítọn dali wẹ ya? Gbede pọ́n! Kakatimọ, osẹ́n wẹ mí hẹn lodo.+
