Lomunu lẹ 6:1-23
6 Enẹwutu, etẹwẹ mí na dọ? Be mí na zindonukọn to ylando mẹ na nukundagbe majẹhẹ nido sọgan sudeji wẹ ya?
2 Gbede pọ́n! To whenuena e yindọ mí ko kú na ylando wutu,+ nawẹ míwlẹ sọgan to gbẹnọ zọnmii to e mẹ gbọn?+
3 Kavi be mìwlẹ ma yọnẹn dọ mímẹpo he yin bibaptizi to Klisti Jesu mẹ+ wẹ ko yin bibaptizi to okú etọn mẹ ya?+
4 Enẹwutu, mí ko yin dìdì po e po gbọn baptẹm mítọn to okú etọn mẹ gblamẹ,+ na mílọsu lẹ nido zan gbẹzan yọyọ de, kẹdẹdile Klisti yin finfọn sọn oṣiọ lẹ mẹ gbọn gigo Otọ́ lọ tọn gblamẹ do.+
5 Eyin mí ko yin kinkọndopọ hẹ ẹ to okú he taidi etọn nkọ mẹ,+ e họnwun dọ mí nasọ yin kinkọndopọ hẹ ẹ to fọnsọnku he taidi etọn nkọ mẹ ga.+
6 Na mí yọnẹn dọ gbẹtọ-yinyin hoho mítọn ko yin whiwhè do pòtin go hẹ ẹ,+ na agbasa ylandonọ mítọn ma nado tindo huhlọn do mí ji,+ bọ míwlẹ ma nado to afanumẹ ylando tọn yin zọnmii ba.+
7 Na mẹhe kú ko yin whẹsuna* sọn ylando etọn mẹ.
8 Humọ, eyin míwlẹ kú hẹ Klisti, mí yise dọ mí nasọ nọgbẹ̀ hẹ ẹ ga.
9 Na mí yọnẹn dọ, todin he Klisti ko yin finfọn sọn oṣiọ lẹ mẹ,+ e ma nasọ kú ba;+ okú masọ yin ogán do ewọ ji ba.
10 Na okú he ewọ kú, e kú na nuhe dù ylando* whladopo podọ kakadoi,+ ṣigba ogbẹ̀ he ewọ te, e to ogbẹ̀ na Jiwheyẹwhe.
11 Mọdopolọ, mìlọsu ga, mì nọ pọ́n mìde hlan di mẹhe ko kú na nuhe dù ylando, ṣigba bo tin to ogbẹ̀ na Jiwheyẹwhe gbọn Klisti Jesu dali.+
12 Enẹwutu, mì dike ylando zindonukọn nado to gandu taidi ahọlu do agbasa mìtọn he nọ kú ji+ bọ mì nado to tonusena ojlo etọn lẹ blo.
13 Mọdopolọ, mì zindonukọn nado nọ ze agbasa* mìtọn lẹ jo na ylando taidi adánwanu mawadodo tọn lẹ blo, ṣigba mì ze mìde jo na Jiwheyẹwhe taidi mẹhe gọwá ogbẹ̀ sọn oṣiọ lẹ mẹ, humọ mì ze agbasa* mìtọn lẹ jo na Jiwheyẹwhe taidi adánwanu dodowiwa tọn lẹ.+
14 Na ylando ma dona yin ogán do mì ji, dile mì mọdọ mì ma tin to osẹ́n glọ+ ṣigba tin to nukundagbe majẹhẹ glọ.+
15 Etẹwẹ ehe zẹẹmẹdo? Be mí na waylando na mí ma to osẹ́n glọ, ṣigba bo to nukundagbe majẹhẹ glọ wutu wẹ ya?+ Gbede pọ́n!
16 Be mì ma yọnẹn dọ eyin mì ze mìde jo na mẹde taidi afanumẹ tonusetọ lẹ, afanumẹ mẹhe mì nọ setonuna lọ tọn wẹ mì yin,+ vlavo mì yin afanumẹ na ylando+ he nọ dekọtọn do okú mẹ+ kavi mì yin afanumẹ na tonusise he nọ dekọtọn do dodowiwa mẹ ya?
17 Etomọṣo, opẹ́ wẹ na Jiwheyẹwhe dọ dile etlẹ yindọ mì ko yin afanumẹ na ylando dai, todin mì ko lẹzun tonusetọ sọn ahun mẹ na nuplọnmẹ wunmẹ enẹ he yin zizedo alọmẹ na mì.
18 Mọwẹ, to whenuena e yindọ mìwlẹ ko yin tuntundote sọn ylando mẹ,+ mì lẹzun afanumẹ lẹ na dodowiwa.+
19 Yẹn to hogbe he gbẹtọvi lẹ jẹakọ hẹ lẹ yizan na madogán agbasa tọn mìtọn wutu; na kẹdẹdile mìwlẹ ko ze awutugonu mìtọn lẹ jo taidi afanumẹ na mawé po sẹ́nhẹngba po he nọ dekọtọn do sẹ́nhẹngba mẹ, mọdopolọ todin, mì ze awutugonu mìtọn lẹ jo taidi afanumẹ na dodowiwa he nọ dekọtọn do wiwe-yinyin mẹ.+
20 Na whenue mìwlẹ yin afanumẹ na ylando dai, mì vò sọn dodowiwa mẹ.
21 To whelọnu lo, etẹwẹ yin sinsẹ́n lọ he mì nọ detọ́n to ojlẹ enẹ mẹ? Nuhe nọ huwinyan na mì todin lọ lẹ wẹ. Na okú wẹ opodo onú enẹlẹ tọn.+
22 Ṣigba todin, na mìwlẹ ko yin tuntundote sọn ylando mẹ ṣigba bo lẹzun afanumẹ lẹ na Jiwheyẹwhe wutu, mì to sinsẹ́n detọ́n na nuhe dù wiwe-yinyin,+ podọ opodo etọn wẹ ogbẹ̀ madopodo.+
23 Na ale ylando tọn wẹ okú,+ ṣigba nunina he Jiwheyẹwhe nọ namẹ wẹ ogbẹ̀ madopodo+ gbọn Klisti Jesu Oklunọ mítọn dali.+
Nudọnamẹ Odò Tọn
^ Kavi “tuntundote; jijona.”
^ Kavi “e kú nado de ylando sẹ̀.”
^ To paa mẹ, “awutugonu.”
^ To paa mẹ, “awutugonu.”
