Osọhia 17:1-18
17 Dopo to angẹli ṣinawe he tindo agbán ṣinawe lọ lẹ+ mẹ wá bo dọna mi dọmọ: “Wá, yẹn na do owhẹ̀ he yin didá na galọtọ daho lọ he sinai to osin susu ji hia we,+
2 mẹhe ahọlu aigba ji tọn lẹ tindo kọndopọ fẹnnuwiwa zanhẹmẹ tọn* hẹ,+ bọ mẹhe nọ nọ̀ aigba ji lẹ yin hinhẹn nado nù ovẹn fẹnnuwiwa zanhẹmẹ etọn tọn* mú.”+
3 E sọ ze mi gbọn huhlọn gbigbọ tọn dali yì danfafa de ji. Yẹn sọ mọ yọnnu de to aisinsin to gbekanlin vẹẹ ṣẹ́ṣẹ́ de ji he gọ́ na oyín nùzinzan tọn lẹ bo tindo ota ṣinawe podọ azò ao.
4 Yọnnu lọ sọ do sopẹ́-vọ̀+ po avọ̀ vẹẹ ṣẹ́ṣẹ́ de po, bo yí sika, zannu he họakuẹ po peali lẹ po+ do doaṣọ́na ede, e sọ tindo kọfo sika tọn de to alọ etọn mẹ, he gọ́ na awuhiọnu lẹ po onú mawé fẹnnuwiwa zanhẹmẹ tọn* etọn lẹ po.
5 Oyín de, yèdọ nudabla de yin kinkan do nukọn na ẹn dọmọ: “Babilọni Daho lọ, onọ̀ galọtọ+ lẹ po awuhiọnu aigba ji tọn lẹ po tọn.”+
6 Yẹn sọ mọdọ yọnnu lọ nù ohùn omẹ wiwe lẹ tọn po ohùn kunnudetọ Jesu tọn lẹ tọn po mú.+
Todin, to whenue n’mọ ẹn, e paṣa mi tlala.
7 Enẹwutu, angẹli lọ dọna mi dọmọ: “Naegbọn e do paṣa we? Yẹn na dọ nudabla yọnnu+ lọ tọn podọ gbekanlin lọ he ji e sinai do he tindo ota ṣinawe podọ azò ao lọ tọn na we:+
8 Gbekanlin lọ he hiẹ mọ, ko tin dai, ṣigba masọ tin ba, ṣogan e na tọ́njẹgbonu sọn odò mapote lọ mẹ+ to madẹnmẹ bo na yin vivasudo. Podọ to whenue mẹhe nọ nọ̀ aigba ji lẹ—yèdọ mẹhe oyín yetọn lẹ ma ko yin kinkan do owe-hihá ogbẹ̀ tọn+ mẹ sọn didoai aihọn tọn whenu lẹ—na mọdọ gbekanlin lọ ko tin dai, ṣigba bo masọ tin ba, ṣogan bo na wá tin, awú na ji yé.
9 “Ehe biọ ayiha zinzin tọn:* Ota ṣinawe+ lọ lẹ nọtena osó ṣinawe, he ji yọnnu lọ sinai do lẹ.
10 Podọ ahọlu ṣinawe wẹ: Atọ́n ko jai, dopo to ote bọ dopo he pò ma ko wá todin gba; ṣigba to whenue e na wá, ojlẹ gli de wẹ e dona gbọṣi aimẹ na.
11 Podọ gbekanlin lọ he ko tin ṣigba bo masọ tin,+ ahọlu de wẹ ewọ lọsu yin ga, yèdọ ṣinatọ̀ntọ, ṣigba e wá sọn ṣinawe lọ lẹ mẹ bo na yin vivasudo.
12 “Azò ao he hiẹ mọ lẹ nọtena ahọlu ao, he ma ko mọ ahọluduta de yí todin, ṣigba yé mọ aṣẹpipa ahọlu tọn yí na gànhiho dopo hẹ gbekanlin lọ.
13 Ehelẹ tindo linlẹn dopo, enẹwutu wẹ yé yí huhlọn po aṣẹpipa yetọn po na gbekanlin lọ.
14 Ehelẹ na funawhàn hẹ Lẹngbọvu+ lọ, ṣigba na ewọ yin Oklunọ oklunọ lẹ tọn podọ Ahọlu ahọlu lẹ tọn+ wutu, Lẹngbọvu lọ na gbawhàn yetọn.+ Humọ, mẹyiylọ, mẹdide po nugbonọ he tin to e dè lẹ po nasọ wàmọ.”+
15 E sọ dọna mi dọmọ: “Osin he hiẹ mọ lẹ, fihe galọtọ lọ sinai do, nọtena gbẹtọ lẹ, gbẹtọgun lẹ, akọta lẹ po ogbè lẹ po.+
16 Podọ azò ao+ he hiẹ mọ lẹ gọna gbekanlin lọ,+ ehelẹ wẹ na gbẹwanna galọtọ lọ+ bo na hẹn ẹn zun ovọ́ bo nasọ hẹn ẹn jẹmẹ́, yé na dù olàn etọn bo nasọ yí miyọ́n do fiọ ẹ gbidigbidi.+
17 Na Jiwheyẹwhe wẹ yí i do ahun yetọn mẹ nado hẹn linlẹn etọn di,+ mọwẹ, nado hẹn linlẹn dopo akàn yetọn di gbọn ahọluduta yetọn nina gbekanlin lọ dali,+ kakajẹ whenue ohó Jiwheyẹwhe tọn lẹ na ko yin hinhẹndi.
18 Podọ yọnnu+ he hiẹ mọ lọ nọtena otò daho lọ he dugán do ahọlu aigba ji tọn lẹ ji.”
Nudọnamẹ Odò Tọn
^ Kavi “wuntuntun.”
