Osọhia 19:1-21
19 To ehe godo, n’sè nuhe taidi ogbè lélé angẹli susu tọn to olọn mẹ. Yé dọmọ: “Mì pà Jah!*+ Jiwheyẹwhe mítọn tọn wẹ whlẹngán, gigo po huhlọn po,
2 na nugbo po dodo po wẹ whẹdida etọn lẹ wutu.+ Na e ko hẹn whẹdida ṣẹ do galọtọ daho lọ he ko yí fẹnnuwiwa zanhẹmẹ tọn* etọn do hẹn aigba gblezọn lọ ji, ewọ ko sọ yiahọsu ohùn afanumẹ etọn lẹ tọn to e go.”*+
3 Yé sọ dọ whla awetọ to afọdopolọji dọmọ: “Mì pà Jah!*+ Azọ̀ Babilọni tọn sọ to tìtì kakadoi podọ doidoi.”+
4 Mẹho 24 lọ lẹ+ po mẹdida ẹnẹ lọ lẹ+ po sọ ṣinyọ́n nukunmẹ ai bo sẹ̀n Jiwheyẹwhe he sinai to ofìn lọ ji, bosọ dọmọ: “Niṣẹ!* Mì pà Jah!”*+
5 Humọ, ogbè de dọnú sọn ofìn lọ kọ̀n bo dọmọ: “Mì to Jiwheyẹwhe mítọn pà, mì afanumẹ etọn lẹpo emi,+ mì he dibusi i lẹ, yèdọ pẹvi po daho po.”+
6 Yẹn sọ sè nude dọnú taidi ogbè angẹli susu tọn, podọ taidi nudidọ osin susu tọn, podọ taidi nudidọ sinsinyẹn hẹviosò lẹ tọn. Yé dọmọ: “Mì pà Jah,*+ na Jehovah* Jiwheyẹwhe mítọn, Ganhunupotọ+ lọ ko jẹ gandu ji taidi ahọlu!+
7 Mì gbọ mí ni jaya bo gọ́ na ayajẹ susu bosọ na gigo e, na alọwle Lẹngbọvu lọ tọn ko wá bọ asi etọn ko wleawuna ede.
8 Mọwẹ, yè ko nagbè e nado yí alavọ dagbedagbe he to sisẹ́ bosọ wé do doaṣọ́—na alavọ dagbedagbe lọ nọtena azọ́n dodo omẹ wiwe lẹ tọn.”+
9 E sọ dọna mi dọ, “Kanwe dọmọ: Ayajẹnọ wẹ mẹhe yin oylọ-basina wá núdùdù whèjai alọwle Lẹngbọvu lọ tọn.”+ Humọ, e dọna mi dọmọ: “Ohó nugbo Jiwheyẹwhe tọn wẹ ehelẹ.”
10 Enẹwutu, yẹn ṣinyọ́n nukunmẹ ai to afọ etọn lẹ kọ̀n nado sẹ̀n ẹn. Ṣigba, e dọna mi dọmọ: “Ṣọ́ dewe! A wàmọ blo!+ Afanumẹ de poun wẹ yẹn kẹdẹdi hiẹ po mẹmẹsunnu towe lẹ po he tindo azọ́n kunnudide gando Jesu go tọn.+ Sẹ̀n Jiwheyẹwhe!+ Na kunnudide gando Jesu go wẹ lẹndai dọdai lẹ tọn.”+
11 Yẹn sọ mọ olọn hùndonuvo, podọ pọ́n! osọ́ wewe de.+ Mẹhe sọ sinai to e ji nọ yin yiylọdọ Nugbonọ+ podọ Nugbo,+ ewọ sọ nọ dawhẹ bosọ nọ funawhàn to dodo mẹ.+
12 Nukun etọn lẹ yin miyọ́n he to jiji de,+ jẹgbakun susu sọ tin to ota na ẹn. Oyín de yin kinkan do e go he mẹdepope ma yọnẹn adavo ewọ lọsu,
13 e sọ do awugbó de he go ohùn tin te,* bọ ewọ nọ yin yiylọdọ, Ohó+ Jiwheyẹwhe tọn.
14 Humọ, awhànpa he to olọn mẹ lẹ to hihodo e to osọ́ wewe lẹ ji, yé sọ do alavọ dagbedagbe wewe de, he wé-ṣeke.
15 Podọ ohí didá gaa de+ tọ́n sọn onù etọn mẹ, ehe e na yí do hò akọta lẹ bo na yí opò gànyuu tọn do dugán do* yé ji.+ Humọ, e tùnafọ ovẹn sinsẹ́n lẹ ji to ovẹn-finyọ́ndo adi homẹgble Jiwheyẹwhe Ganhunupotọ lọ tọn mẹ.+
16 E sọ tindo oyín de he yin kinkan do awugbó etọn go, mọwẹ, to asapada etọn go dọ, Ahọlu ahọlu lẹ tọn podọ Oklunọ oklunọ lẹ tọn.+
17 Yẹn sọ mọ angẹli de to ote to hinhọ́n owhè tọn mẹ, e sọ yí ogbè lélé do dawhá bo dọhlan ohẹ̀ he nọ zlọn to agahomẹ* lẹpo dọmọ: “Mì wáfi, mì pli dopọ na núdùdù daho whèjai tọn Jiwheyẹwhe tọn,+
18 na mì nido dù agbasalan ahọlu lẹ tọn, agbasalan awhàngán daho lẹ tọn, agbasalan omẹ huhlọnnọ lẹ tọn,+ agbasalan osọ́ lẹ po mẹhe sinai to yé ji lẹ po tọn,+ podọ agbasalan mẹlẹpo tọn, mẹhe to yedekannu lẹ tọn po afanumẹ lẹ tọn po, yèdọ pẹvi po daho po.”
19 Yẹn sọ mọ gbekanlin lọ po ahọlu aigba ji tọn lẹ po gọna awhànpa yetọn lẹ pli dopọ nado funawhàn hẹ mẹlọ he sinai to osọ́ ji podọ hẹ awhànpa etọn.+
20 Gbekanlin lọ yin wiwle gọna yẹwhegán lalo+ he basi ohia lẹ to nukọn etọn, yèdọ ehe e yí do klọ mẹhe mọ ohia gbekanlin lọ tọn+ yí lẹ po mẹhe nọ sẹ̀n boṣiọ etọn+ lẹ po. Yé omẹ awe lẹ yin dindọn dlan gbẹ̀te do agbàdo miyọ́n tọn he yí whèmi+ do to jiji lọ mẹ.
21 Ṣigba, mẹhe pò lẹ wẹ yè yí ohí gaa he tọ́njẹgbonu sọn onù mẹhe sinai to osọ́ ji lọ tọn mẹ do hù.+ Podọ ohẹ̀ lẹpo wẹ dù agbasalan yetọn gọ́ho.+
Nudọnamẹ Odò Tọn
^ Kavi “Halelujah!” “Jah” yin sándogli yinkọ lọ Jehovah tọn.
^ To paa mẹ, “sọn alọ etọn mẹ.”
^ Kavi “Halelujah!” “Jah” yin sándogli yinkọ lọ Jehovah tọn.
^ Kavi “Halelujah!” “Jah” yin sándogli yinkọ lọ Jehovah tọn.
^ Kavi “Amẹn” to Glẹkigbe mẹ.
^ Kavi “Halelujah!” “Jah” yin sándogli yinkọ lọ Jehovah tọn.
^ Kavi vlavo, “ohùn yin húnhúnhún do.”
^ To paa mẹ, “do yìn.”
^ Kavi “jiwhé; aga.”
