Osọhia 9:1-21
9 Angẹli atọ́ntọ sọ kún opẹ̀n etọn.+ Yẹn sọ mọ sunwhlẹvu de he ko flẹ sọn olọn wá aigba ji, podọ họnhungan odò mapote tọn+ yin nina ẹn.
2 E sọ hùn odò mapote lọ, azọ̀ sọ tọ́njẹgbonu sọn odò lọ mẹ taidi azọ̀ zòhọ daho de tọn, podọ azọ̀ he tọ́n sọn odò lọ mẹ hẹn owhè po jẹhọn mẹ po dozinvlu.+
3 Owẹ̀n lẹ sọ tọ́njẹgbonu sọn azọ̀ lọ mẹ wá aigba ji+ bọ aṣẹ yin nina yé, yèdọ aṣẹ dopolọ he aklekle aigba ji tọn lẹ tindo.
4 E yin didọna yé ma nado gbleawuna ogbé aigba ji tọn kavi amamú kavi atin depope, adavo mẹhe ma tindo hiadonu Jiwheyẹwhe tọn to nukọn lẹ kẹdẹ.+
5 Podọ yè nagbè owẹ̀n lẹ, e ma yin nado hù yé gba, ṣigba nado sayana yé na osun atọ́n, podọ yasanamẹ yetọn taidi yasanamẹ aklekle+ tọn to whenue e mẹ̀ gbẹtọ.
6 Gbẹtọ lẹ na dín okú to azán enẹlẹ gbè, ṣigba bo ma na mọ ẹn to aliho depope mẹ, yé nasọ jlo vẹkuvẹku nado kú, ṣigba okú na họ̀nna yé.
7 Podọ awusọhia owẹ̀n lọ lẹ tọn taidi osọ́ he yin awuwlena na awhàn lẹ tọn;+ nuhe di jẹgbakun sika tọn sọ tin to ota na yé bọ nukunmẹ yetọn taidi nukunmẹ gbẹtọ lẹ tọn,
8 ṣigba yé tindo oda taidi oda yọnnu tọn. Adú yetọn lẹ sọ taidi kinnikinni lẹ tọn,+
9 bọ yé tindo tùnudo he taidi tùnudo gànyuu tọn lẹ. Nudidọ awà yetọn lẹ tọn sọ taidi nudidọ osọ́-kẹkẹ he to wezunhọ̀n jei awhàn lẹ tọn.+
10 Humọ, yé tindo osi adínọ lẹ he taidi aklekle lẹ tọn, podọ to osi yetọn lẹ go wẹ aṣẹ yetọn te nado gbleawuna gbẹtọ lẹ na osun atọ́n.+
11 Yé tindo ahọlu de to yé ji, yèdọ angẹli odò mapote tọn lọ.+ Oyín etọn to Heblugbe mẹ wẹ Abadọni,* ṣigba e nọ yin Apoliọni* to Glẹkigbe mẹ.
12 Dindọn dopo ko juwayi. Pọ́n! Awe dogọ+ na wá to onú ehelẹ godo.
13 Angẹli ṣidopotọ+ sọ kún opẹ̀n etọn.+ Yẹn sọ sè ogbè de sọn azò agbà sika tọn+ he to Jiwheyẹwhe nukọn lọ lẹ mẹ
14 he dọna angẹli ṣidopotọ lọ he tindo opẹ̀n dọmọ: “Tún angẹli ẹnẹ he yin sìnsìn to tọ̀sisa daho Euflate kọ̀n lẹ.”+
15 Angẹli ẹnẹ lọ lẹ he yè ko wleawuna na gànhiho, azán, osun podọ na owhe, sọ yin túntún nado hù mado-atọ̀ntọ gbẹtọ lẹ tọn.
16 Sọha awhànfuntọ osọ́ ji tọn lẹ tọn yin fọtọ́n donu ko donu fọtọ́n ao; yẹn sè sọha yetọn.
17 Podọ lehe yẹn mọ osọ́ lẹ to numimọ mẹ, gọna mẹhe sinai do yé ji lẹ do die: Yé tindo tùnudo lẹ he divẹẹ di miyọ́n bo yin juju di hayakintu bosọ yin koklo-jonọ di whèmi, ota osọ́ lọ lẹ tọn sọ taidi ota kinnikinni lẹ tọn,+ bọ miyọ́n, azọ̀ po whèmi po tọ́n sọn onù yetọn mẹ.
18 Mado-atọ̀ntọ gbẹtọ lẹ tọn sọ yin hùhù gbọn azọ̀nylankan atọ̀n ehelẹ dali, yèdọ gbọn miyọ́n, azọ̀ po whèmi he tọ́n sọn onù yetọn mẹ lẹ po dali.
19 Na aṣẹ osọ́ lọ lẹ tọn tin to onù yetọn mẹ podọ to osi yetọn go wutu, na osi yetọn taidi odàn lẹ bo tindo ota lẹ wutu, yé nọ yí ehelẹ do gbleawunamẹ.
20 Ṣigba, mẹhe pò bo ma yin hùhù gbọn azọ̀nylankan ehelẹ dali ma lẹnvọjọ sọn azọ́n alọ yetọn lẹ tọn mẹ; yé zindonukọn nado to aovi lẹ sẹ̀n, gọna boṣiọ sika tọn, fataka tọn, gànvẹẹ tọn, zannu tọn po atin tọn lẹ po, he ma sọgan mọnú kavi sènu kavi zinzọnlin.+
21 Yé masọ lẹnvọjọ sọn hlọnhuhu yetọn lẹ mẹ kavi sọn afinyọnnuwiwa yetọn lẹ mẹ kavi sọn fẹnnuwiwa zanhẹmẹ tọn* yetọn mẹ kavi sọn ajojijẹ yetọn lẹ mẹ.
