Owalọ lẹ 12:1-25
12 To nudi ojlẹ enẹ dopolọ mẹ, ahọlu Hẹlọdi* jẹ homẹkẹndo delẹ to mẹhe tin to agun lọ mẹ lẹ ji.+
2 E hù Jakọbu nọvisunnu Johanu tọn+ po ohí po.+
3 To whenue e mọdọ e hẹn homẹ Ju lẹ tọn hùn, e zindonukọn nado wle Pita lọsu. (Ehe wá aimẹ to azán hùnwhẹ Akla Madotọ́n tọn lẹ gbè.)+
4 E wle e bo ze e do gànpamẹ+ bosọ ze e do alọmẹ na pipli ẹnẹ awhànfuntọ lẹ tọn nado nọ to ṣiṣọ́ ẹ gbọn yedelẹ didiọ dali. Pipli dopodopo bẹ awhànfuntọ ẹnẹ hẹn. Na e to linlẹn nado hẹn ẹn wá* gbẹtọ lẹ nukọn to Juwayi lọ godo.
5 Enẹwutu, Pita yin ginglọndo gànpamẹ, ṣigba agun lọ to dẹ̀ho hlan Jiwheyẹwhe vẹkuvẹku do ota etọn mẹ.+
6 To ozán he jẹnukọnna whenue Hẹlọdi jlo na hẹn Pita jẹgbonu lọ mẹ, Pita to amlọndọ to gẹdẹ awe mẹ to awhànfuntọ awe ṣẹnṣẹn, podọ hihọ́tọ he to ohọ̀n lọ ji lẹ to gànpa lọ ṣọ́.
7 Ṣigba, pọ́n! angẹli Jehovah* tọn ṣite to e dè,+ podọ hinhọ́n de họ́n to gànhọ lọ mẹ. E linú adà mẹ na Pita bo fọ́n ẹn bosọ dọmọ: “Fọ́n plaun!” Gẹdẹ lọ lẹ sọ flẹ sọn alọ etọn lẹ go.+
8 Angẹli lọ dọna ẹn dọmọ: “Sọnú* bo do afọpa towe lẹ.” Ewọ sọ wàmọ. Enẹgodo, e dọna ẹn dọmọ: “Ze awugbó towe do bo hodo mi.”
9 Ewọ sọ tọ́njẹgbonu bo hodo e, ṣigba e ma yọnẹn dọ nuhe angẹli lọ to wiwà lẹ yin nugbo. Na taun tọn, e lẹndọ numimọ de mọ wẹ emi te.
10 To whenue yé ko zẹ̀ hihọ́tẹn tintan po awetọ po go, yé jẹ họngbo gànyuu tọn he biọ tòdaho lọ mẹ kọ̀n, ehe sọ hùn na ede hlan yé. Whenue yé tọ́njẹgbonu, yé gbọn tòhomẹ-liho dopo ji bo to yìyì, angẹli lọ sọ yì sọn e dè to afọdopolọji.
11 Podọ to whenue nuhe to jijọ lọ wá họnwun na Pita, e dọmọ: “Todin, yẹn yọnẹn nugbonugbo dọ Jehovah* wẹ do angẹli etọn hlan nado whlẹn mi sọn alọ Hẹlọdi tọn mẹ podọ sọn nuhe Ju lẹ to nukundo lẹpo mẹ.”+
12 To whenue ehe ko họnwun na ẹn godo, e yì owhé Malia onọ̀ Johanu, mẹhe sọ nọ yin yiylọdọ Malku+ tọn gbè, fihe gbẹtọ sọha de pli dopọ te bo to dẹ̀ho.
13 Whenue e húhú ohọ̀n họngbo lọ tọn, deviyọnnu de he nọ yin Lodẹ wá nado siọ.
14 To whenue e họnwun na ẹn dọ ogbè Pita tọn wẹ, homẹhun in tlala sọmọ bọ e ma hùn họngbo lọ, ṣigba e họ̀nwezun biọ họmẹ bo na linlin dọ Pita wẹ to ote to họngbo ji.
15 Yé dọna ẹn dọmọ: “Alẹ̀ wẹ a hùn.” Ṣigba, e gbẹ́ tẹkudeji dọ ewọ wẹ. Yé jẹ didọ ji dọmọ: “Angẹli etọn wẹ.”
16 Ṣigba, Pita gbọṣi finẹ bo to họ̀nhúhú. To whenue yé hùn ohọ̀n lọ, yé mọ ẹn bọ avò vò yé.
17 Ṣigba, e mìalọ hlan yé nado nabọẹ bo dọna yé to gigọ́ mẹ lehe Jehovah* de e tọ́n sọn gànpamẹ do, e sọ dọna yé dọmọ: “Mì dọ onú ehelẹ na Jakọbu+ po mẹmẹsunnu lẹ po.” Enẹgodo, e tọ́njẹgbonu bo zingbejizọnlin yì fidevo.
18 Todin, to whenue ai ko họ́n, bẹwlu he fọ́n to awhànfuntọ lọ lẹ ṣẹnṣẹn gando nuhe na ko jọ do Pita go ma whè.
19 Hẹlọdi dín in vẹkuvẹku, podọ to whenue e ma mọ ẹn, e kanhose hihọ́tọ lọ lẹ bo degbe dọ yé ni yin pinplan yì nado yin yasana;+ ewọ sọ tọ́n sọn Jude yì Sesalea bo nọ finẹ na ojlẹ de.
20 Todin, e to homẹgble* do omẹ Tile po Sidoni po tọn lẹ go. Enẹwutu, yé kọngbedopọ bo wá e dè, podọ to whenue yé ko diọlinlẹnna Blastu godo, yèdọ dawe he nọ penukundo whẹho whédo ahọlu tọn tọn lẹ go,* yé jẹ jijọho dín ji, na otò ahọlu lọ tọn mẹ wẹ yé nọ mọ núdùdù yí sọn wutu.
21 To azán vonọtaun de gbè, Hẹlọdi yí avọ̀ ahọlu tọn do doaṣọ́na ede bo sinai do whẹdaján ji bosọ jẹ hodidọ gbangba tọn de dọna yé ji.
22 To whenẹnu, mẹhe pli dopọ lẹ jẹ awhádo ji dọmọ: “Ogbè yẹwhe de tọn wẹ, e ma yin gbẹtọ de tọn gba!”
23 To afọdopolọji, angẹli Jehovah* tọn linú in, na e ma na gigo Jiwheyẹwhe wutu, ewọ sọ jiwé bo kú.
24 Ṣigba, ohó Jehovah* tọn to whinwhẹ́n deji bo to gbigbayipe.+
25 Na nuhe dù Balnaba+ po Saulu po, to whenue yé ko hẹn alọgọ kọgbọ tọn yì Jelusalẹm godo,+ yé lẹkọwa bo plan Johanu,+ mẹhe sọ nọ yin yiylọdọ Malku hẹn.
Nudọnamẹ Odò Tọn
^ Enẹ wẹ, Hẹlọdi Aglipa I.
^ Kavi “hẹn ẹn wá owhẹ̀ nukọn.”
^ Kavi “Blagbajana dewe.”
^ Kavi “to adán ji.”
^ To paa mẹ, “nọ penukundo abò ahọlu tọn go.”
