Salmu 108:1-13
Ohàn Davidi tọn.
108 Ahun ṣie nọte gligli, Jiwheyẹwhe E.
Yẹn na yí alindọn ṣie lẹpo* do jihàn bo pà we.+
2 Fọ́n, hànjinu okànnọ E; podọ hiẹ lọsu, ajalẹn E.+
Yẹn na fọ́n to afọnnu fuu.
3 Yẹn na nọ pà we to gbẹtọ lẹ ṣẹnṣẹn, Jehovah E,Yẹn nasọ nọ jihàn pipà tọn lẹ hlan we to akọta lẹ ṣẹnṣẹn.
4 Na owanyi nugbo towe klo, bo yiaga di olọn,+Podọ nugbonọ-yinyin towe jẹ jiwhé.
5 Jiwheyẹwhe E, hiẹ ni yin zizedaga hú olọn lẹ;Na gigo towe ni dlẹnkan jẹ aigba lẹpo ji.+
6 Yí adusilọ towe do whlẹn mí bo siọ mi,Na mẹyiwanna towe lẹ nido yin whinwhlẹngán.+
7 Jiwheyẹwhe ko dọho to wiwe-yinyin* etọn mẹ dọmọ:
“Yẹn na jẹaglin, yẹn na ze Ṣekẹmi jo+ taidi ogú de,Podọ yẹn na jlẹ gbigblo Agbàdo Sukoti tọn.+
8 Ṣie wẹ Giliadi,+ kẹdẹdile Manasse yin ṣie do,Eflaimi wẹ ogangbakun* he to ota na mi;+Juda wẹ yin ogánpò ṣie.+
9 Moabi wẹ basia he mẹ yẹn nọ klọ́nu te.+
Yẹn na dlan afọpa ṣie do Edomi ji.+
Yẹn nasọ dawhá awhàngbigba tọn do Filisti ji.”+
10 Mẹnu wẹ na plan mi yì tòdaho gángán lọ mẹ?
Mẹnu wẹ na plan mi kaka yì Edomi?+
11 Be e ma yin hiẹ Jiwheyẹwhe he ko gbẹ́ mí dai wẹ,Yèdọ hiẹ, Jiwheyẹwhe mítọn he masọ nọ tọ́nyi hẹ awhànpa mítọn lẹ ba?+
12 Gọalọna mí to ayimajai mítọn mẹ,+Na ovọ́ wẹ whlẹngán he nọ wá sọn gbẹtọvi dè.+
13 Jiwheyẹwhe wẹ na na mí huhlọn,+Ewọ nasọ tùnafọ kẹntọ mítọn lẹ ji.+
Nudọnamẹ Odò Tọn
^ To paa mẹ, “etlẹ yin gigo ṣie.”
^ Kavi vlavo, “to ofi wiwe.”
^ To paa mẹ, “figángán.”
