Salmu 19:1-14
Na anademẹtọ hànjitọ lẹ tọn. Ohàn Davidi tọn.
19 Olọn lẹ to gigo Jiwheyẹwhe tọn lá;+Agahomẹ sọ to azọ́n alọ etọn tọn jla.+
2 Sọn okle de jẹ devo wẹ yé nọ to ohó túntún jẹgbonu,Podọ sọn ozán de jẹ devo wẹ yé nọ to oyọnẹn dehia.
3 Yé ma nọ dọho, podọ hogbe depope ma nọ yin sisè;Ogbè yetọn ma nọ yin sisè.
4 Ṣigba, ogbè* yetọn tọ́nyi aigba lẹpo ji,Podọ owẹ̀n yetọn yì opodo aigba fininọ lẹ tọn ji.+
Ewọ ko pẹ́n gòhọ de na owhè do olọn mẹ;
5 E taidi asisunọ yọyọ de he to tintọ́njẹgbonu sọn abò asisunọ yọyọ tọn mẹ;E nọ jaya taidi sunnu huhlọnnọ de he to alewezun etọn họ̀n.
6 E nọ tọ́n sọn opodo olọn tọn de,Bo nọ lilẹ́ yì opodo awetọ;+Bọ nudepope ma nọ yin whiwhla sọn yozò etọn nù.
7 Osẹ́n Jehovah tọn pé,+ bo nọ vọ́ huhlọn namẹ.*+
Nuflinmẹ Jehovah tọn sọgan yin jidedego,+ bo nọ hẹn wunvinọ zun nuyọnẹntọ.+
8 Anademẹ he wá sọn Jehovah dè lẹ yin dodo, bo nọ hẹnmẹ jaya;+Gbedide Jehovah tọn wé, bo nọ hẹn nukun sẹ́.+
9 Budisi Jehovah+ yin onú wiwe-ṣeke, bo nọ nọ̀ aimẹ kakadoi.
Whẹdida Jehovah tọn lẹ yin nugbo, popolẹpo wẹ yin dodo.+
10 Yé nọ jlomẹ hú sika,Yèdọ hú sika dagbedagbe* susugege,+Bosọ vivi hú owín,+ yèdọ owín he to kùnkùn sọn owínjá lẹ mẹ.
11 Avase ko yin nina devizọnwatọ towe gbọn yé gblamẹ;+Ale daho wẹ tin to tonusisena yé mẹ.+
12 Mẹnu wẹ sọgan doayi nuṣiwa edetiti tọn lẹ go?+
Jo ylando he n’wà to mayọnẹn mẹ lẹ na mi.
13 Humọ, hẹnalọdotena devizọnwatọ towe sọn nuyiwa sakla tọn lẹ mẹ;+A dike yé dugán do ji e blo.+
Whenẹnu wẹ yẹn na wé,+Bo lẹzun homẹvọnọ sọn ylando sinsinyẹn* lẹ mẹ.
14 Na ohó onù ṣie mẹ tọn lẹ po ayihamẹlinlẹnpọn ahun ṣie mẹ tọn poNi hẹn homẹ towe hùn,+ Jehovah E, hiẹ Osé ṣie+ po Mẹfligọtọ ṣie po.+
Nudọnamẹ Odò Tọn
^ Kavi vlavo, “nujlẹkàn.”
^ Kavi “nọ hẹn alindọn gọwá.”
^ Kavi “he yin kiklọ́we.”
^ Kavi “sọn sẹ́nhẹngba susu.”
