Salmu 68:1-35
Na anademẹtọ hànjitọ lẹ tọn. Ohàn Davidi tọn.
68 Gbọ Jiwheyẹwhe ni fọ́n, na kẹntọ etọn lẹ ni vúnvún pé,Bo gbọ mẹhe gbẹwanna ẹn lẹ ni họnyi sọn nukọn etọn.+
2 Dile azọ̀ nọ yin fúfú sẹ̀ do, mọ wẹ hiẹ ni fú yé sẹ̀ do;Dile osẹ̀n nọ yọ́ to miyọ́n nù do,Mọ wẹ mẹylankan ni dọ̀n to Jiwheyẹwhe nukọn do.+
3 Ṣigba, gbọ dodonọ ni jaya;+Gbọ yé ni gọ́ na ayajẹ to Jiwheyẹwhe nukọn;Gbọ yé ni gọ́ na aglinjijẹ po homẹhunhun po.
4 Mì jihàn hlan Jiwheyẹwhe; mì jihàn pipà tọn lẹ do pà oyín etọn.+
Mì jihàn hlan Mẹlọ he juwajei gbọn danfafa ji.*
Jah* wẹ oyín etọn!+ Mì jaya to nukọn etọn!
5 Jiwheyẹwhe he to fininọ wiwe etọn+Wẹ otọ́ tọṣiọvi lẹ tọn podọ mẹhe nọ basi hihọ́na* asuṣiọsi lẹ.+
6 Jiwheyẹwhe nọ na ohọ̀ mẹhe to ṣokẹdẹ lẹ nado nọ nọ̀ e mẹ;+E nọ de gàntọ lẹ tọ́n bo nọ hẹn yé biọ adọkun mẹ.+
Ṣigba, tasinyẹntọ* lẹ nọ to dandannu glọ nado nọ aigba-klo de ji.+
7 Jiwheyẹwhe E, whenue hiẹ to anadena* omẹ towe lẹ,+Yèdọ whenue hiẹ zinzọnlin gbọn danfafa ji, (Sela)
8 Aigba sisọ;+Olọn sọ ja jikun,* na Jiwheyẹwhe tọn wutu;Sinai ehe sisọ ga, na Jiwheyẹwhe, yèdọ Jiwheyẹwhe Islaeli tọn wutu.+
9 Jiwheyẹwhe E, hiẹ hẹn jikun wududu ja;Hiẹ vọ́ huhlọn na omẹ towe lẹ* he agbọ́ ko pé.
10 Yé nọ osla gòhọ tọn towe mẹ;+Jiwheyẹwhe E, to dagbewà towe mẹ, hiẹ penukundo wamọnọ lẹ go.
11 Jehovah wẹ degbe;Yọnnu he to wẹndagbe lọ lá lẹ yin awhànpa daho de.+
12 Ahọlu awhànpa lọ lẹ tọn lẹ họnyi,+ mọwẹ yé họnyi!
Yọnnu he yin jijodo whégbè lẹ tindo mahẹ to ogblànnu lẹ mimá mẹ.+
13 Dile etlẹ yindọ mì sunnu lẹ mlọnai to miyọ́n osla mẹ tọn* lẹ ṣẹnṣẹn,Awà apoe tọn he yè yí fataka do ṣinyọ́n lẹ na tin,Gọna awàfún sika dagbedagbe tọn lẹ.
14 To whenue Ganhunupotọ lọ ko vúnvún ahọlu he to aigba lọ ji lẹ pé,+Osin-agó ja to Zalmọni.*
15 Osó Jiwheyẹwhe tọn* de wẹ osó Baṣani+ tọn yin;Osó he yiaga de wẹ osó Baṣani tọn yin.
16 Mì osó he yiaga lẹ emi, naegbọn mì do to nupọn po nuvẹun poHlan osó he Jiwheyẹwhe ko de* taidi fininọ etọn lọ?+
Matin ayihaawe, Jehovah na nọ nọ̀ finẹ kakadoi.+
17 Osọ́-kẹkẹ awhàn tọn Jiwheyẹwhe tọn lẹ yin fọtọ́n donu ao lẹ, yèdọ fọtọ́n donu fọtọ́n lẹ.+
Jehovah ko tọ́n sọn Sinai wá ofi wiwe lọ.+
18 Hiẹ hẹji yiaga;+Hiẹ plan kanlinmọ lẹ yì;Hiẹ yí sunnu lẹ di nunina,+Mọwẹ, etlẹ yin tasinyẹntọ lẹ,+ nado nọ nọ̀ ṣẹnṣẹn yetọn, Jah Jiwheyẹwhe E.
19 Jehovah ni yin gigopana, ewọ he nọ hẹn agbàn mítọn egbesọegbesọ,+Yèdọ Jiwheyẹwhe nugbo whlẹngán mítọn tọn. (Sela)
20 Jiwheyẹwhe he nọ whlẹnmẹ wẹ Jiwheyẹwhe nugbo lọ yin na míwlẹ;+Podọ Jehovah Oklunọ Nupojipetọ lọ wẹ nọ deali họ̀ngán tọn sọn okú si.+
21 Mọwẹ, Jiwheyẹwhe na gbà ota kẹntọ etọn lẹ tọn hányán,Yèdọ ota mẹdepope he zindonukọn* to whẹhuhu mẹ tọn.+
22 Jehovah ko dọmọ: “Yẹn na plan yé lẹkọwa sọn Baṣani;+Yẹn na plan yé lẹkọwa sọn hùzànmẹ,
23 Na afọ towe lẹ nido yin kiklọ́ to ohùn mẹ+Bọ odẹ́ avún towe lẹ tọn nido didọ́ ohùn kẹntọ lẹ tọn.”
24 Yé mọ zọnlinzinzin awhàngbigba tọn towe lẹ, Jiwheyẹwhe E,Yèdọ zọnlinzinzin awhàngbigba Jiwheyẹwhe ṣie, Ahọlu ṣie tọn lẹ, biọ ofi wiwe lọ.+
25 Hànjitọ lẹ to zọnlinzin to nukọn, bọ hànsinọ lẹ to hànjinu okànnọ lẹ hò to godo na yé;+Awhli lẹ sọ to húnhò to ṣẹnṣẹn.+
26 Mì pà Jiwheyẹwhe to agun pipli* lẹ ṣẹnṣẹn;Mì pà Jehovah, mì mẹhe wá sọn Asisa Islaeli tọn mẹ lẹ emi.+
27 Finẹ wẹ Bẹnjamini,+ yèdọ yọpọvu lọ, to gandu do yé ji te,Podọ do ahọvi Juda tọn lẹ po gbẹtọgun yetọn he to awhádo po ji,Gọna ahọvi Zebuluni tọn lẹ po ahọvi Naftali tọn lẹ po.
28 Jiwheyẹwhe towe ko degbe dọ hiẹ na yin huhlọnnọ.
Do huhlọn towe hia, Jiwheyẹwhe E, hiẹ he ko yinuwado ota mítọn mẹ.+
29 Na tẹmpli towe he to Jelusalẹm lọ wutu,+Ahọlu lẹ na nọ hẹn nunina lẹ wá na we.+
30 Gbẹnuna gbekanlin he nọ nọ̀ ofán ṣẹnṣẹn lẹ,Oyìn he bẹ yede pli lẹ+ po oyìnvu yetọn lẹ po,Kakajẹ whenue gbẹtọ lẹ na dẹ́ do odò bo hẹn fataka lẹ wá.*
Ṣigba, ewọ vúnvún mẹhe nọ mọ awuvivi to awhàn mẹ lẹ pé.
31 Núzinzan gànvẹẹ tọn lẹ na yin hinhẹnwa* sọn Egipti;+Kuṣi na yawu hẹn nunina lẹ wá na Jiwheyẹwhe.
32 Mì ahọluduta aigba ji tọn lẹ emi, mì jihàn hlan Jiwheyẹwhe,+Mì jihàn pipà tọn lẹ hlan Jehovah, (Sela)
33 Yèdọ hlan mẹlọ he nọ hẹ olọn hoho olọn lẹ tọn.+
Pọ́n! E nọ hẹn ogbè etọn dọnú di hẹviosò, yèdọ ogbè huhlọnnọ etọn.
34 Mì pà Jiwheyẹwhe na huhlọn etọn.+
Gigo daho etọn tin to Islaeli ji,Huhlọn etọn sọ tin to jiwhé.*
35 Jiwheyẹwhe jiawu sọn fiwiwe gigonọ etọn* mẹ.+
Ewọ wẹ Jiwheyẹwhe Islaeli tọn,He nọ na hlọnhlọn po huhlọn po omẹ etọn lẹ.+
Mì pà Jiwheyẹwhe.
Nudọnamẹ Odò Tọn
^ Kavi vlavo, “to aslọ lẹ ji.”
^ “Jah” yin sándogli yinkọ lọ Jehovah tọn.
^ To paa mẹ, “nọ dawhẹna.”
^ Kavi “atẹṣitọ.”
^ To paa mẹ, “hiẹ tọ́nyi to nukọn na.”
^ To paa mẹ, “kùn.”
^ To paa mẹ, “ogú towe.”
^ Kavi vlavo, “to lẹngbọpo.”
^ Kavi “E taidi dọ osin-agó ja do Zalmọni ji.”
^ Kavi “Osó gigonọ.”
^ Kavi “jlo.”
^ Kavi “he to zọnlinzin pé.”
^ Kavi “mẹplidopọ.”
^ Kavi vlavo, “bo to afọtùn fataka lẹ ji.”
^ Kavi vlavo, “Afọzedaitọ lẹ na wá.”
^ To paa mẹ, “to aslọ lẹ mẹ.”
^ To paa mẹ, “towe.”
