Salmu 81:1-16
Na anademẹtọ hànjitọ lẹ tọn; to Gititi* ji. Ohàn Asafi tọn.+
81 Mì yí ayajẹ do dawhá hlan Jiwheyẹwhe, he yin huhlọn mítọn.+
Mì dawhá awhàngbigba tọn hlan Jiwheyẹwhe Jakọbu tọn.
2 Mì kehàn bo ze ohún,Ajalẹn he tindo ogbè milomilo po hànjinu okànnọ po.
3 Mì kún opẹ̀n to whenue osun yọyọ tọ́n,+Yèdọ to whenue osun blebu sọawuhia to azán hùnwhẹ mítọn tọn gbè.+
4 Na gbedide de wẹ e yin na Islaeli,Yèdọ osẹ́ndoai de he Jiwheyẹwhe Jakọbu tọn na.+
5 Ewọ wẹ ze e dai taidi nuflinmẹ de na Josẹfu+To whenue Ewọ tọ́njẹgbonu sọta aigba Egipti tọn.+
Yẹn sè ogbè* mẹhe n’ma yọnẹn de tọn dọmọ:
6 “Yẹn de agbàn pinpẹn he to abọ́ etọn ji sẹ̀;+Alọ etọn lẹ vò sọn ohà lọ hinhẹn go.
7 Hiẹ ylọ mi to ayimajai towe mẹ, bọ yẹn whlẹn we;+Yẹn siọ we sọn aslọ he mẹ hẹviosò to núdọ te mẹ.*+
Yẹn whlé we pọ́n to osin Mẹliba* tọn lẹ kọ̀n.+ (Sela)
8 Mì sè, mì omẹ ṣie lẹ emi, yẹn nasọ dekunnu sọta mì.
Islaeli E, eyin hiẹ ko dotoaina mi wẹ.+
9 Yẹwhe jonọ depope ma na tin to ṣẹnṣẹn towe,Podọ hiẹ ma na dẹ́ do odò na yẹwhe jonọ de.+
10 Yẹn Jehovah wẹ Jiwheyẹwhe towe,Mẹhe plan we sọn aigba Egipti tọn ji.+
Kẹ̀ onù towe do nùvo, yẹn nasọ hẹn we gọ́ho.+
11 Ṣigba, omẹ ṣie lẹ ma dotoaina ogbè ṣie;Islaeli ma litaina mi.+
12 Enẹwutu, yẹn jo yé do nado hodo ahun sinsinyẹn yetọn;Yé wà nuhe sọgbe to nukun yetọn mẹ.*+
13 Eyin omẹ ṣie lẹ ko dotoaina mi wẹ,+Eyin Islaeli ko zinzọnlin to aliho ṣie lẹ ji wẹ!+
14 Yẹn na ko gbawhàn kẹntọ yetọn lẹ tọn plaun;Yẹn na ko lẹ́ alọ ṣie sọta mẹgbeyantọ yetọn lẹ.+
15 Mẹhe gbẹwanna Jehovah lẹ na sisọ to nukọn etọn,Kọdetọn* yetọn nasọ nọ aimẹ kakadoi.
16 Ṣigba, ewọ na yí likun dagbe hugan* do yìn we*+Bo na yí owín he tọ́n sọn osé mẹ do hẹn we gọ́ho.”+
Nudọnamẹ Odò Tọn
^ Kavi “akọgbè.”
^ Zẹẹmẹdo “Whẹgbè Dido.”
^ To paa mẹ, “sọn fiwhiwhlá hẹviosò tọn mẹ.”
^ To paa mẹ, “Yé zinzọnlin to ayinamẹ yetọn lẹ mẹ.”
^ To paa mẹ, “Ojlẹ.”
^ To paa mẹ, “he dojó.”
^ To paa mẹ, “ewọ,” enẹ wẹ, omẹ Jiwheyẹwhe tọn lẹ.
