Whẹdatọ lẹ 10:1-18
10 To Abimẹlẹki godo, Tola he yin visunnu Pua tọn, visunnu Dodo tọn bo wá sọn hẹnnu Isakali tọn mẹ, fọ́n nado whlẹn Islaeli.+ Ewọ nọ nọ̀ Ṣamili he tin to lẹdo osó tọn Eflaimi tọn mẹ.
2 E dawhẹ to Islaeli na owhe 23. Enẹgodo, e kú bo yin dìdì do Ṣamili.
3 To ewọ godo wẹ Jaili Giliadinu lọ fọ́n bo dawhẹ to Islaeli na owhe 22.
4 Ewọ tindo visunnu 30 he nọ kùn kẹtẹkẹtẹ 30, podọ yé tindo tòdaho 30 he nọ yin yiylọdọ Havọti-jaili+ kakajẹ egbehe; podọ aigba Giliadi tọn ji wẹ yé tin te.
5 Enẹgodo, Jaili kú bo yin dìdì do Kamọni.
6 Islaelivi lẹ sọ vọ́ wà nuhe ylan to nukun Jehovah tọn mẹ+ bo jẹ Baali lẹ,+ boṣiọ Aṣitolẹti tọn lẹ, yẹwhe Alami* tọn lẹ, yẹwhe Sidoni tọn lẹ, yẹwhe Moabi tọn lẹ,+ yẹwhe Amọninu lẹ tọn lẹ+ po yẹwhe Filistinu lẹ tọn lẹ+ po sẹ̀n ji. Yé jo Jehovah do bo masọ nọ sẹ̀n ẹn ba.
7 To whenẹnu, Jehovah gblehomẹ sinsinyẹn do Islaeli go bo jo yé do alọ Filistinu lẹ po Amọninu lẹ po tọn mẹ.+
8 Enẹwutu, yé sayana Islaelivi lẹ bo gbidikọna yé sinsinyẹn to owhe enẹ mẹ—owhe 18 wẹ yé yí do gbidikọna Islaelivi lẹpo he to awà Jọdani tọn he yin aigba Amolinu lẹ tọn lọ ji to Giliadi.
9 Amọninu lẹ sọ nọ dasá Jọdani nado wá hoavùn hẹ hẹnnu Juda po Bẹnjamini po tọn gọna whédo Eflaimi tọn; yé sọ hẹn awusinyẹn Islaeli tlala.
10 To whenẹnu, Islaelivi lẹ dawhá ylọ Jehovah na alọgọ+ dọmọ: “Mí ko waylando do we, na mí ko jo hiẹ Jiwheyẹwhe mítọn do bo sẹ̀n Baali lẹ.”+
11 Ṣigba, Jehovah dọna Islaelivi lẹ dọmọ: “Be yẹn ma whlẹn mì sọn alọ Egiptinu lẹ,+ Amolinu+ lẹ, Amọninu lẹ, Filistinu+ lẹ,
12 Sidoninu lẹ, Amalẹkinu lẹ po Midianinu lẹ po tọn mẹ to whenue yé gbidikọna mì ya? To whenue mìwlẹ dawhá ylọ mi, yẹn whlẹn mì sọn alọ yetọn mẹ.
13 Ṣigba, mìwlẹ jo mi do bo sẹ̀n yẹwhe devo lẹ.+ Enẹwutu wẹ yẹn ma nasọ whlẹn mì ba.+
14 Mì yì yẹwhe he mì ko de lẹ dè bo dawhá ylọ yé na alọgọ.+ Na yewlẹ ni whlẹn mì to ojlẹ awusinyẹn tọn he mẹ mì te.”+
15 Ṣigba, Islaelivi lẹ dọna Jehovah dọmọ: “Míwlẹ ko waylando. Wà na mí kẹdẹdile e yọ́n to nukun towe mẹ do. Saa jaale bo whlẹn mí to egbé poun.”
16 Yé sọ de yẹwhe jonọ he tin to ṣẹnṣẹn yetọn lẹ sẹ̀ bo jẹ Jehovah sẹ̀n ji,+ bọ ewọ masọ sọgan zindonukọn nado to yajiji Islaeli tọn pọ́n ba.*+
17 To nukọn mẹ, Amọninu+ lẹ pli yede dopọ, bo whèsla do Giliadi. Enẹwutu, Islaelivi lẹ lọsu bẹ yede pli dopọ bo whèsla do Mizpa.
18 Omẹ Giliadi tọn lẹ po ahọvi etọn lẹ po sọ dọna ode awetọ dọmọ: “Mẹnu wẹ na nọ nukọnna mí nado hoavùn sọta Amọninu lẹ?+ Mì gbọ ewọ ni dugán do mẹhe nọ nọ̀ Giliadi lẹpo ji.”
